У выведцы Міністэрства абароны Ўкраіны мяркуюць, што здольнасьць Расеі трымаць свае войскі ў Херсоне ўкраінскія войскі аслабілі сваімі ўдарамі па маршрутах матэрыяльна-тэхнічнага забесьпячэньня расейскіх сілаў.
«Пры адступленьні расейскія войскі разбурылі некалькі мастоў і, пэўна, замінавалі, каб запаволіць і затрымаць наступ украінскіх сілаў. Страта заходняга берагу Херсону, хутчэй за ўсё, перашкодзіць Расеі рэалізаваць свае стратэгічныя памкненьні стварыць наземны калідор да Адэсы», — адзначылі брытанскія выведнікі.
Паводле іх, расейскія войскі застаюцца ўразьлівымі пры пераправе цераз Дняпро.
«Цалкам імаверна, што адыход [расейцаў] будзе адбываецца цягам некалькіх дзён з абаронай пазыцыяў і артылерыйскім агнём для прыкрыцьця сілаў, што адыходзяць», — патлумачыла брытанская выведка.
ГЛЯДЗІЦЕ ТАКСАМА: Расейцы пры адыходзе з Херсону падарвалі некалькі мастоў, каб перашкодзіць наступу ўкраінскага войскаШто паведамляюць украінскія мэдыя аб сытуацыі ў Херсоне
Украінскія СМІ паведамляюць, што Расея пачала адводзіць свае войскі з Херсону яшчэ 8 лістапада. А ў ноч з 8 на 9 лістапада расейцы перакінулі сілы з Сьнігуроўкі Мікалаеўскай вобласьці ў раён вёскі Корсунка і гораду Новая Кахоўка.
Раніцай 9 лістапада расейцы пакінулі пункты дысьлякацыі ў раёне Мілавога і пачалі выводзіць войскі з раёну Аляксандраўка — Станіслаў — Праўдзіна. Гэта суправаджалася інтэнсіўным артылерыйскім агнём з боку расейскіх войскаў, якія, імаверна, так прыкрывалі адыход асноўных сілаў.
У той жа час прадстаўнікі ўкраінскай улады заклікалі не сьпяшацца верыць расейцам.
Тым часам адразу на некалькіх тэлеграм-каналах, якія зьвязваюць з украінскімі вайскоўцамі паведамілі, што Снігуроўка Мікалаеўскай вобласьці ўжо знаходзіцца пад кантролем Узброеных сіл Украіны.
Аднак Генэральны штаб Узброеных сіл Украіны пакуль гэтую інфармацыю афіцыйна не пацьвердзіў, але і не зьняпраўдзіў.
«Мы працягваем вядзеньне наступальнай апэрацыі паводле свайго пляну. Чакайце афіцыйнае паведамленьне Генэральнага штабу аб вядзеньні баявых дзеяньняў Узброенымі сіламі Ўкраіны», — заявіў намесьнік начальніка галоўнага апэратыўнага ўпраўленьня Генэральнага штабу Ўзброеных сілаў Украіны Аляксей Громаў 10 лістапада на брыфінгу ў Кіеве.
Галоўнакамандуючы Ўзброенымі сіламі Ўкраіны Валер Залужны паведаміў, што на херсонскім кірунку з 1 кастрычніка ўкраінскае войска прасунулася ўглыб расейскіх пазыцый на 36,5 кілямэтра і аднавілі кантроль над 41 населеным пунктам вобласьці.
«Цягам мінулых содняў на кірунку Петрапаўлаўка — Новарайск падразьдзяленьні сіл абароны прасунуліся на 7 кілямэтраў, узялі пад кантроль населеных пунктаў, вярнулі Ўкраіне да 107 квадратных кілямэтраў. На кірунку Первамайскае — Херсон мы прасунуліся на 7 кілямэтраў, узялі пад кантроль 6 населеных пунктаў, плошча вызваленай зямлі — 157 квадратных кілямэтраў», — паведаміў Валер Залужны.
Што папярэднічала
9 лістапада камандуючы расейскай групоўкай ва Ўкраіне генэрал Сяргей Суравікін прапанаваў міністру абароны Расеі Сяргею Шайгу адвесьці войскі ў Херсонскай вобласьці на левы бераг Дняпра. Гэта будзе азначаць здачу гораду Херсону ўкраінскім сілам. Шайгу пагадзіўся з прапановай.
ГЛЯДЗІЦЕ ТАКСАМА: Расейскія войскі пакідаюць ХерсонПерад гэтым расейскія СМІ і акупацыйныя ўлады паведамілі, што ў ДТЗ загінуў прадстаўнік акупацыйнай адміністрацыі Херсоншчыны Кірыл Стрэмавусаў. Працягваюцца баі за вызваленьне вобласьці. Расейцы, адступаючы, разбураюць там масты.
ГЛЯДЗІЦЕ ТАКСАМА: Зьявілася інфармацыя пра сьмерць яшчэ аднаго прарасейскага калябаранта на поўдні Ўкраіны, СтрэмавусаваХерсон быў акупаваны расейскімі войскамі ў пачатку сакавіка — як адзіны абласны цэнтар Украіны, узяты падчас расейскага ўварваньня. На фоне наступу УСУ расейскія акупацыйныя ўлады ў другой палове кастрычніка пачалі прымусова вывозіць жыхароў некаторых раёнаў Херсонскай вобласьці.
ГЛЯДЗІЦЕ ТАКСАМА: У офісе прэзыдэнта Ўкраіны ня ўбачылі вываду расейскіх войскаў з ХерсонуВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.