«Арыштаваныя вагоны, якія належаць кампаніям з Расеі і Беларусі, ужо працуюць на карысьць украінскай дзяржавы. Згодна з судовымі рашэньнямі, імі распараджаецца „Укрзалізниця“. Вялікія партыі шкла, сканфіскаваныя ў прадпрыемстваў, падкантрольных беларусам і расейцам, ужо накіравалі на адбудаваньне зруйнаванай ворагам інфраструктуры. То бок ужо маем вынік гэтай працы: арыштаваныя сродкі і маёмасьць не ляжаць мёртвым грузам, а працуюць», — сказаў Вадзім Мельнік у інтэрвію ўкраінскаму інфармацыйнаму агенцтву «Укрінформ».
Паводле яго, найбліжэйшым часам Вярхоўная рада Ўкраіны павінна ўхваліць законапраект, які дазволіць нацыяналізацыю арыштаванай беларускай і расейскай маёмасьці.
Вадзім Мельнік паведаміў, што кошт арыштаваных расейскіх і беларускіх актываў перавышае 44 мільярды грыўняў (1,1 мільярда даляраў у эквіваленце. — РС). Ён не ўдакладняе, якую частку з гэтай сумы складаюць беларускія актывы.
Паводле яго, нядаўна ўкраінская дзяржава атрымала 580 мільёнаў грыўняў (14,5 мільёна даляраў у эквіваленце. — РС) у выніку продажу арыштаваных беларускіх угнаеньняў — больш як 2200 тон хлёрыстага калію і больш як 17,3 тысячы тон аміяку.
У верасьні кіраўнік Беларускай чыгункі Ўладзімер Марозаў заявіў, што пасьля ўварваньня Расеі на тэрыторыі Ўкраіны засталося сем тысяч беларускіх вагонаў, зь іх пяць тысяч належаць Беларускай чыгунцы.
ГЛЯДЗІЦЕ ТАКСАМА: У Менску расказалі, колькі страцілі ад арышту ва Ўкраіне беларускіх вагонаў, і заявілі, што хочуць іх вярнуцьПраваахоўныя органы Ўкраіны з красавіка пэрыядычна выяўляюць на ўкраінскай тэрыторыі і арыштоўваюць беларускія вагоны, якія належалі Беларускай чыгунцы, «Беларуськалію», іншым беларускім кампаніям.
Ад пачатку расейскага ўварваньня, якое Беларусь падтрымала, даўшы сваю тэрыторыю і вайсковую інфраструктуру для расейскіх войскаў і абстрэлаў, ва Ўкраіне іх арыштавалі і перадалі ў кіраваньне структуры, якая займаецца абслугоўваньнем сканфіскаванай маёмасьці.
Разам з вагонамі арыштавалі і прадукцыю, якую яны перавозілі, — нафтапрадукты, мэтал, транспарт, угнаеньні.
ГЛЯДЗІЦЕ ТАКСАМА: Ва Ўкраіне з пачатку поўнамаштабнага ўварваньня арыштавалі расейскія і беларускія актывы на $1,1 млрдУ большасьці выпадкаў арышт на вагоны наклалі ў рамках крымінальных справаў аб «фінансаваньні дзеяньняў, учыненых з мэтай гвалтоўнай зьмены або зрынаньня канстытуцыйнага ладу або захопу дзяржаўнай улады, зьмены межаў тэрыторыі або дзяржаўнай мяжы Ўкраіны».
Вядомы таксама выпадак, калі крымінальную справу завялі па факце наўмыснага ўхіленьня ад сплаты падаткаў і збораў у асабліва вялікіх памерах. Праваахоўныя органы Ўкраіны выявілі схему паставак беларускіх угнаеньняў, калі іх завозілі быццам бы транзытам, але папраўдзе разгружалі і прадавалі на тэрыторыі Ўкраіны.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.