Пад ударам другі раз цягам апошніх сямі дзён зноў апынуўся Шаўчэнкаўскі раён сталіцы Ўкраіны — тут знаходзяцца амаль усе структуры дзяржаўнага кіраваньня, большасьць вышэйшых навучальных устаноў, культурныя аб’екты, тэатры, замежныя амбасады і, вядома ж, жылыя дамы.
У часе першай атакі 10 кастрычніка на гэты раён загінулі два дзясяткі мірных жыхароў і амаль 90 атрымалі раненьні. Падчас другой атакі, 17 кастрычніка, загінула маладая сям’я, Багдан і Вікторыя Замчанкі, якія чакалі дзіця. Свабода сабрала, што пра іх вядома.
«Яны не хацелі зьяжджаць»
Віка і Багдан ня мелі свайго жытла. Яны арандавалі кватэру ў чатырохпавярховым доме, пабудаваным яшчэ на пачатку ХХ стагодзьдзя мясцовым прадпрымальнікам.
Уласьніца кватэры паведаміла, што адразу пасьля першай атакі расейцаў на суседні квартал яна прапанавала ім пераехаць у больш бясьпечнае месца. Але Багдан адмовіўся, сказаўшы: «Міна двойчы ў адну варонку не трапляе».
Калі жанчына даведалася аб новай атацы, прыехала да будынку, але пабачыла, што ейнай кватэры ўжо няма, а тэлефоны Вікі і Багдана па-за зонай дасяжнасьці.
Атака расейскага дрона на Кіеў, 17 кастрычніка 2022
«Віка заўсёды была моцнай»
Пасьля таго, як стала вядома аб гібелі маладой сям’і, украінская кампанія Goodwine паведаміла, што Віка працавала ў іх самілье.
«Сёньня вельмі цёмны дзень для нашай кампаніі. Мы страцілі Віку, нашу самелье, неймаверна добрага і чуйнага чалавека, частку нашай сям’і», — паведаміла кампанія на сваёй старонцы ў Facebook. Віка працавала самелье шэсьць гадоў.
«Яна была адзінай дзяўчынай у аддзеле, але ніколі не была слабой, для яе не існавала складаных задач і выклікаў. Яна шчыра любіла віно і сваю працу», — адзначылі ў кампаніі.
«Сёньня яе цела знайшлі ў абдымках з каханым мужам Багданам і катом у будынку, куды прыляцеў расейскі дрон. Яны чакалі дзіця. Мы шалёна любілі Віку. Упэўнены, любілі і вы. Складана падабраць патрэбныя словы.
Але скажам фразу Вікі, якую яна стала паўтарала: „Трэба менш сябе шкадаваць“. Такой моцнай мы яе запомнім назаўжды», — падкрэсьлілі калегі Вікі.
Зяленскі пра гібель сям’і: новае «дасягненьне» Пуціна
Пасьля гібелі Вікі і атак дронаў на 25 населеных пунктаў Украіны прэзыдэнт Уладзімір Зяленскі не падбіраў слоў.
«У Кіеве яны забілі маладую сям’ю, пацэліўшы ў дом іранскім „Шагедам“. Хлопец і цяжарная дзяўчына на шостым месяцы. Уладзімір Пуцін можа запісаць сабе чарговае „дасягненьне“ — забіў яшчэ адну цяжарную жанчыну», — сказаў Уладзімір Зяленскі ў вячэрнім звароце да ўкраінцаў.
Украінскія вайскоўцы спрабуюць зьбіць расейскі дрон над Кіевам. 17 кастрычніка
ГЛЯДЗІЦЕ ТАКСАМА: Другі тыдзень ідуць расейскія атакі на цывільныя аб’екты Ўкраіны: атакавалі Кіеў, Мікалаеў і іншыя гарады. ФОТАВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.