«Сёньня ўначы вораг зноў нанёс падступны начны ракетны ўдар. Па Запарожжы і ваколіцах выпусьцілі каля сямі ракет С-300», — паведаміў кіраўнік Запароскай абласной вайсковай адміністрацыі Аляксандар Старух.
Паводле яго, на ваколіцах Запарожжа часткова разбураны жылы дом. З-пад завалаў змаглі ўратаваць трох жыхароў.
Апошнія два дні пад інтэнсіўнымі ўдарамі расейцаў знаходзіцца і востраў Хорціца, дзе знаходзіцца прыродны і гістарычны комплекс. Хорціца — гістарычны цэнтар запароскага казацтва, цяпер там знаходзіцца мэмарыяльны комлекс і найбольш папулярны ўкраінскі турыстычны цэнтар.
Наступствы расейскага абстрэлу Запарожжа. Кастрычнік 2022
11 кастрычніка, які і некалькі дзён раней, у Запарожжа прыляцелі 12 ракет.
Паводле абласной адміністрацыі, за мінулы дзень ад абстрэлаў Запароскай вобласьці загінулі 8 грамадзян і яшчэ 7 атрымалі раненьні.
У Офісе прэзыдэнта Ўкраіны паведамілі, што 11 кастрычніку ў выніку інтэнсіўнага абстрэлу расейцамі Віньніцкай, Днепрапятроўскай, Запароскай, Данецкай і Львоўскай абласьцей загінулі 14 грамадзян і 34 атрымалі раненьні.
У зводцы Міністэрства абароны Расеі прызнала свае атакі на Запарожжа. Паводле ведамства, удары наносіліся ў раёне Запарожжа, нібыта па штабе «нацыяналістычнага фармаваньня «Правы сэктар», па вузлу сувязі нацыяналістычнага фармаваньня «Азоў» і двух пунктах дысьлякацыі замежных наймітаў».
За тыдзень — сотня ракет
Як кажуць мясцовыя, штодзень на Запарожжа і ваколіцы прылятае па 12-16 ракет. І так ужо ўсе апошнія сем дзён. Ракеты выпускаюць залпамі па некалькі адзінак з адлегласьці 100 кілямэтраў. Найчасьцей менавіта з акупаваных тэрыторый вобласьці — Энэргадара і Такмака.
Мясцовыя жыхары сьцьвярджаюць, што некалькі разоў расейскія войскі ўдарылі па рэабілітацыйным цэнтры, дзе навучаліся і аднаўляліся дзеці з асаблівымі патрэбамі. Цяпер цэнтар амаль цалкам зруйнаваны — выбітыя шыбы, разьбіты дах і, адпаведна, клясы для заняткаў. Кіраўніцтва цэнтру нават не бярэцца прагназаваць, ці магчыма будзе адрамантаваць гэтую ўстанову.
Людзі хаваюцца ад расейскіх абстрэлаў у падземным пераходзе. Запарожжа, 6 кастрычніка 2022
Расея акупавала палову Запароскай вобласьці
З пачатку ўварваньня Расея акупавала найбуйнейшыя гарады рэгіёну — Бярдзянск, Мелітопаль і Энэргадар, дзе знаходзіцца найбуйнейшая ў Эўропе атамная электрастанцыя.
Абласны цэнтар зьяўляецца прыфрантавым горадам. Раней улады рэгіёну заяўлялі, што Расея пасьля псэўдарэфэрэндуму спрабуе зрабіць у Запароскай вобласьці нешта падобнае на «дзяржаўную мяжу» ў раёне блёк-паста ў вёсцы Васільеўка.
ГЛЯДЗІЦЕ ТАКСАМА: «Жалезная заслона», баі, чэргі і людзкія пакуты на мяжы з акупаванымі Расеяй раёнамі на поўдні ЎкраіныАналягічныя ўдары Расея наносіла па Марыюпалі. Цяпер гэты горад акупаваны цалкам. Зруйнавана ўся інфраструктура і 90% жылых дамоў.
ГЛЯДЗІЦЕ ТАКСАМА: Запароскую АЭС цалкам абясточылі з прычыны абстрэлаўВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.