Хроніка перасьледу 3 жніўня: пэнсіянэра судзяць за заклікі да пратэсту і абразы Лукашэнкі; затрыманьні ў Браславе, Магілёве, Менску і Пінску

«Скапіяваў дадзеныя амаль 1,5 мільёна грамадзян». Жыхара Віцебску асудзілі на 4,5 года калёніі

У Віцебскім абласным судзе на чатыры з паловай гады калёніі ўзмоцненага рэжыму асудзілі 35-гадовага мясцовага жыхара Паўла Нікіценку, паведамляе «Вясна». У закрытым рэжыме яго асудзілі па шасьці артыкулах Крымінальнага кодэксу Беларусі. Справу разглядаў судзьдзя Яўген Буруноў, падрабязнасьці не вядомыя.

Паведамляецца, што работнік разьлікова-касавага цэнтру ў Віцебску за тры гады скапіяваў з інфармацыйнай сыстэмы пэрсанальныя дадзеныя амаль 1,5 мільёна грамадзян Беларусі. Таксама ён нібыта быў адміністратарам «дэструктыўнага» тэлеграм-канала і разьмяшчаў у інтэрнэце інфармацыю, якая зьмяшчае: заклікі, указаньні і навучаньні пабуджальнага характару аб зьдзяйсьненьні групавых дзеяньняў, якія груба парушаюць грамадзкі парадак; абразы ў адрас Лукашэнкі і старшыні ЦВК, інструкцыю па зьдзяйсьненьні супрацьпраўных дзеяньняў у дачыненьні да міліцыянтаў.

Праваабаронцам вядома, што пры затрыманьні Паўла Нікіценку моцна зьбілі і здароўе ён да гэтага часу не аднавіў.

Затрыманьні ў Пінску

Берасьцейскай «Вясьне» паведамляюць пра затрыманьні, якія ўчора адбыліся ў Пінску. Затрымалі ня менш за 5 чалавек, сярод іх тыя, каго раней ужо неаднаразова затрымлівалі: Алесь Рамановіч, Дзяніс Сядых.

У людзей зладзілі вобшукі. Аднаму з затрыманых, меркавана, пагражае крымінальны артыкул «за распальваньне варожасьці».

2 тыдні таму «зачысткі» праходзілі ў іншых гарадах Берасьцейскай вобласьці — Янаве і Драгічыне.

Затрымалі дырэктарку турагенцтва «Віяполь» Галіну Патаеву

У праўладных тэлеграм-каналах зьявілася інфармацыя пра затрыманьне ў Менску кіраўніцы турыстычнага агенцтва «Віяполь», выкладчыцы катэдры эканамічнай геаграфіі БДУ Галіны Патаевай, заўважыла «Наша Ніва».

Жанчыне закідаюць удзел у пратэстах 2020 году. Яна, па словах сілавікоў, «актыўна падтрымлівала ўдзельнікаў масавых беспарадкаў» і «займалася распаўсюджваньнем экстрэмісцкіх матэрыялаў». Таксама ў яе на старонках у сацыяльных сетках нібыта былі лягатыпы незалежных СМІ і нацыянальная сымболіка. На відэазапісе, які апублікавалі сілавікі, яна кажа, што ў жніўні-кастрычніку 2020 году ў сваіх сацсетках разьмяшчала матэрыялы Радыё Свабода і Белсату.

Кампанія «Віяполь» ладзіла беларускамоўныя экскурсіі.

У Горадні судзяць пэнсіянэра

У судзе Ленінскага раёну Горадні 2 жніўня пачаўся разгляд справы 70-гадовага пэнсіянэра зь Нясьвіжа Васіля Дземідовіча, паведамляе Праваабарончы цэнтар «Вясна».

Васіль Дземідовіч

Дземідовіча абвінавачваюць паводле шэрагу артыкулаў Крымінальнага кодэксу Беларусі: арт. 369 (абраза прадстаўніка ўлады), арт. 391 (абраза судзьдзі альбо народнага засядацеля ў сувязі з ажыцьцяўленьнем ім правасудзьдзя), ч. 1 арт. 368 (публічная абраза прэзыдэнта) і ч. 1 арт. 293 (падрыхтоўка да арганізацыі масавых беспарадкаў, якія суправаджаюцца гвалтам над асобай, пагромамі, падпаламі, зьнішчэньнем маёмасьці, збройным супрацівам прадстаўнікам улады).

Справу разглядае судзьдзя Юры Казакевіч.

Паводле сьледзтва, 70-гадовы Дземідовіч зь верасьня 2021 па студзень 2022 году разьмяшчаў у тэлеграм-каналах паведамленьні з абразамі прадстаўнікоў улады, у тым ліку вышэйшых службовых асоб. Таксама ён нібыта выказваў пагрозы прымяненьнем гвалту ў дачыненьні да супрацоўнікаў праваахоўнай і судовай сыстэм, пры гэтым публічна іх зьневажаючы. Сьледчыя зафіксавалі каля 60 такіх фактаў.

Вядома таксама, што Васіля Дземідовіча ўжо каралі за ўдзел у акцыях пратэсту.

На фэстывалі Viva Braslav затрымалі «за дэманстрацыю экстрэмісцкай сымболікі»

Праўладныя тэлеграм-канал паведамляюць пра затрыманьне Міхаіла Тарлоўскага. Яны называюць хлопца анархістам і пішуць, што падчас Viva Braslav ён хадзіў бяз майкі, таму міліцыянты і заўважылі «экстрэмісцкія» тату — сярод іх сымбаль анархізму (літара «А»), «АСАВ», герб «Пагоня», бел-чырвона-белы сьцяг, «1918 БНР».

Затрыманьне ў Магілёве

У Магілёве затрымалі работнка «Магілёўліфтмашу» Сяргея Балашэнку. Супрацоўнікі 11-га ўпраўлення ГУБАЗіК МУС РБ палічылі, што Сяргей Балашэнка нібыта распаўсюджваў матэрыялы, прызнаныя «экстрэмісцкімі», паведамляе @MAYDAYMog.