Найбольш горача застаецца ў паўднёвых раёнах — у Мікалаеўскай і Херсонскай вобласьці, а таксама на ўсходзе — у Данецкай, Луганскай, Харкаўскай і Днепрапятроўскай вобласьці.
Харкаў
21 ліпеня ад расейскіх абстрэлаў пацярпелі Золачава, Калугіна-Башкіраўка, Лябяжае, Рогань, а таксама Кіеўскі раён Харкава, дзе ад разрыву касэтных снарадаў загінулі чатыры мясцовыя жыхары і яшчэ 25 атрымалі раненьні.
Як паведамляюць выратавальнікі і паліцыя, расейцы сваімі абстрэламі тэрарызуюць мірных жыхароў. Сярод пашкоджаных і зруйнаваных аб’ектаў толькі цывільныя: транспартны прыпынак, жылыя будынкі, гандлёвыя павільёны, аўтамабілі і гаспадарчыя пабудовы.
Раніцай 22 ліпеня аб абстрэлах пакуль не паведамляюць.
У Харкаве пасьля абстрэлу. 12 ліпеня 2022
Днепрапятроўская вобласьць
Другі тыдзень галоўным аб’ектам расейскіх войскаў у гэтай вобласьці застаецца Нікапаль і Нікапальскі раён, якія абстрэльваюцца цераз раку Дняпро з тэрыторыі акупаванага расейцамі гораду Энэргадару Запароскай вобласьці.
Пераважна страляюць з установак «Град». Загінула жанчына.
Як паведамляюць мясцовыя ўлады, пашкоджана 11 прыватных будынкаў, гаспадарчыя пабудовы, перабітыя газа- і водаправод.
ГЛЯДЗІЦЕ ТАКСАМА: У выніку расейскага абстрэлу ў Тарэцку Данецкай вобласьці загінулі 6 чалавекЛуганшчына і Данеччына
Расейскія войскі абстрэльваюць амаль кожную вёску і горад Луганскай вобласьці, нягледзячы на тое, што яе яны амаль цалкам ужо захапілі.
Украінскія ўлады Луганскай вобласьці сьцьвярджаюць, што пастаянным агнём расейцы хочуць выціснуць украінскія войскі з умацаваных пазыцый. У рэгіёне ідзе пазыцыйная барацьба — часам расейцы набліжаюцца да ўкраінскіх пазыцый настолькі, каб магчыма было залучыць у бой танкавыя рэзэрвы.
21 ліпеня ўкраінскія войскі змаглі адбіць штурм расейцаў, якія атакавалі з тэрыторыі Лісічанскага нафтаперапрацоўчага заводу.
Цяпер найбольш актыўныя баі адбываюцца каля Верхнекамянкі, але расейцы так пакуль і ня вышлі на адміністрацыйную мяжу Луганскай вобласьці.
У Данецкай вобласьці расейскія войскі не спыняюць спробаў захапіць Бахмут, Славянск і Сіверск. Але ўкраінскія войскі пакуль моцна трымаюць пазыцыі ў тым кірунку.
ГЛЯДЗІЦЕ ТАКСАМА: Міністар абароны Расеі загадаў войскам РФ ва Ўкраіне «нарасьціць дзеяньні на ўсіх напрамках»Мікалаеўшчына і Херсонская вобласьць
Украінскія ўлады паведамляюць, што расейцы працягваюць абстрэльваць Мікалаеўскі і Баштанскі раён. Расейскія снарады пацэлілі ў сельскагаспадарчыя пабудовы, гаражны каапэратыў і краму. Паводле папярэдняй інфармацыі, абышлося без ахвяр.
У апэратыўным камандаваньні «Поўдзень» адзначылі, што ў Херсонскай вобласьці Ўзброеныя сілы Ўкраіны зьнішчылі яшчэ пяць апорных пунктаў і два склады расейскіх войскаў у Скадоўску і Берыслаўскім раёне.
Што гавораць экспэрты
Экспэрты амэрыканскага Інстытуту вывучэньня вайны (ISW) таксама зьвяртаюць увагу на тое, што Расея абмяжоўваецца лякальнымі і дробнымі атакамі, якія не дазволілі ёй захапіць якую-небудзь вырашальную тэрыторыю ва Ўкраіне.
«З 16 ліпеня расейскія войскі працягвалі лякальныя атакі на ўсход ад Сіверску, а таксама на ўсход і поўдзень ад Бахмуту (Данецкая вобласьць. — РС). На 21 ліпеня яны не дасягнулі якіх-небудзь сур’ёзных тэрытарыяльных заваёў у гэтых раёнах. Расейская групоўка на паўночным захадзе ад Славянску фактычна правяла менш наземных удараў уздоўж мяжы між Харкаўскай і Данецкай абласьцямі, чым падчас афіцыйнай апэратыўнай паўзы (з 7 да 16 ліпеня. — РС)», — адзначаецца ў чарговай справаздачы інстытуту.
Паводле экспэртаў, адсутнасьць пасьпяховых наземных наступаў за межамі раёнаў Славянску, Сіверску і Бахмуту сьведчыць, што расейскі наступ, імаверна, не завершыцца захопам Славянску ці Бахмуту.
ГЛЯДЗІЦЕ ТАКСАМА: Харкаў, Мікалаеў і Нікапаль пад абстрэламі з расейскіх «Градаў» і «Ўраганаў». Украінцы зьнішчаюць расейскія базыВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.