11 ліпеня яна напісала на сваім сайце, што пасьля візыту ва Ўкраіну «з расчараваньнем даведалася, што, замест таго, каб прызнаць сваю армію і распачаць агульнанацыянальную падтрымку, Кіеў на чале з Андрэем Ермаком фактычна гуляе ў палітыку. Акрамя таго, Кіеў, падобна, мае грошы на рэканструкцыю другаснай інфраструктуры, але ня мае грошай на падтрымку вайскоўцаў, напрыклад на даўно абяцанае жыльлё для байцоў АТО».
«На жаль, спадар Ярмак замест таго, каб разьвеяць занепакоенасьць, якую я выказала на мінулым тыдні, распачаў супраць мяне паклёпніцкую кампанію. Многія амэрыканцы і эўрапейцы даўно адчуваюць сур’ёзныя асьцярогі з нагоды Ермака. Калі б ён быў дзяржаўным дзеячам, як чалавек з і без таго сумнеўнай рэпутацыяй, ён падаў бы ў адстаўку гэтай зімой пасьля таго, як запэўніў украінскае кіраўніцтва, што ніякага нападу з боку Расеі не адбудзецца, што зьнізіла гатоўнасьць Украіны. Аднак ніколі ня позна зрабіць правільныя рэчы», — адзначыла Вікторыя Спартц.
Яна заявіла, што выказала свае асьцярогі не «дзеля палітычнай выгады», і назвала адсутнасьць нагляду за зброяй, якая пастаўляецца Ўкраіне, «фактарам, які спрыяе затрымкам, у той час як належны нагляд і лягістыка толькі павялічаць хуткасьць і эфэктыўнасьць».
ГЛЯДЗІЦЕ ТАКСАМА: Расея абстрэльвае поўдзень і ўсход Украіны. У горадзе Часаў Яр на Данеччыне пад заваламі знайшлі 24 забітых. ФОТА11 ліпеня журналісты выданьня «Українська правда» ў інтэрвію спыталі Спартц: «Чаго вы чакаеце ад Украіны — адстаўкі Ермака або зьмены працэдур?»
Яна адказала: «Праблема не ў Ермаку. У вашай краіны ёсьць праблемы, якія не вырашаюцца. І калі я пытаюся, чаму яны не вырашаюцца, нашы людзі мне адказваюць, што гэта празь Ермака. Таму гэта і паднялася. Праблема ў тым, што ваша краіна не рыхтуецца да вайны, ня робіць правільных рэчаў, і гэта мяне вельмі хвалюе».
8 ліпеня кангрэсвумэн Спартц апублікавала ліст прэзыдэнту ЗША Джо Байдэну, у якім заклікала яго адміністрацыю праверыць надзейнасьць перамоваў з кіраўніком Офісу прэзыдэнта Зяленскага Андрэем Ермаком, піша ўкраінская служба Радыё Свабода. У прыватнасьці, яна зьвярнула ўвагу на тое, што Ярмак прызначыў сваім намесьнікам Алега Татарава, які, паводле яе, «больш за год зацягвае прызначэньне незалежнага антыкарупцыйнага пракурора».
ГЛЯДЗІЦЕ ТАКСАМА: Офіс прэзыдэнта Ўкраіны: Беларусь у санкцыйным пакеце разам з Расеяй, але актыўнага ўдзелу ў вайне не бярэУ МЗС Украіны пракамэнтавалі гэты ліст. Як заявіў прэс-сакратар МЗС Алег Ніколенка, Украіна «глыбока ўдзячная» ЗША за падтрымку ў супрацьдзеяньні расейскай агрэсіі, але «на гэтым фоне шырокамаштабнай падтрымкі нядаўнія дзеяньні і заявы члена Кангрэсу ЗША Вікторыі Спартц вылучаюцца асаблівым кантрастам. Яны зьяўляюцца непрыхаванай спробай вярнуць у амэрыканскую палітыку клясычныя наратывы расейскай прапаганды пра нібыта сувязі кіраўніцтва Ўкраіны і Расеі і ўцягнуць нашу дзяржаву ва ўнутраную палітыку ЗША».
Пасьля гэтай заявы Спартц заклікала МЗС Украіны «не пераходзіць на асобы», успрымаць яе заявы сур’ёзна і пералічыла некаторыя сур’ёзныя, на яе думку, абвінавачаньні ў адрас Ермака. Офіс прэзыдэнта ніяк не рэагаваў на заявы.
ГЛЯДЗІЦЕ ТАКСАМА: Украіна расчараваная рашэньнем Канады вярнуць у Нямеччыну турбіны для «Паўночнага патоку – 1»Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.