Літоўская мытня ўзмоцніць кантроль над тымі, хто часта перасякае літоўска-беларускую мяжу, гаворыцца ў паведамленьні ведамства.
Як адзначаюць у Літоўскай мытні, за першыя 4 месяцы 2022 году літоўска-беларускую мяжу перасекла амаль у 4 разы больш аўтамабіляў (агулам больш за 124 тысячы), чым за аналягічны пэрыяд мінулага году.
Літоўскія мытнікі заўважылі тэндэнцыю, што з моманту ўвядзеньня бязьвізавага рэжыму некаторыя езьдзяць на машынах у Беларусь па «некалькі разоў за месяц» «ня ўтойваючы, што робяць гэта, каб купіць танных цыгарэт, паліва і прадуктаў», адзначаюць у ведамстве.
«Падобна, справа ня толькі ў атрыманьні больш таннага паліва і іншых тавараў для ўласных патрэбаў. Са свайго боку мы павінны ацаніць патэнцыйныя рызыкі і, асабліва сёньня, небясьпекі нелегальнага бізнэсу», — заявіў кіраўнік Мытнага дэпартамэнту Літвы Дарус Жвіронас.
Паводле яго, для гэтага літоўская мытня ўзмоцніць кантроль за асобамі і транспартнымі сродкамі, якія часта перасякаюць мяжу зь Беларусьсю.
ГЛЯДЗІЦЕ ТАКСАМА: Беларусь працягнула бязьвізавы ўезд грамадзянам Літвы і Латвіі да канца 2022 годуУ ведамстве адзначаюць, што ў сувязі з уведзенымі прэвэнтыўнымі мерамі і ўзмацненьнем жорсткасьці кантролю можа зьнізіцца прапускная здольнасьць транспарту на літоўска-беларускіх памежных пераходах.
З красавіка ў Беларусі ўвялі «бязьвіз» для грамадзян Літвы і Латвіі. Аляксандар Лукашэнка некалькі разоў заяўляў, што жыхары балтыйскіх краін купляюць у Беларусі тавары першай неабходнасьці, якіх, паводле яго, у іхных дзяржавах нібыта няма. «Едуць людзі да нас, купляюць соль. У іх няма солі! Вялікі, багаты Захад, а солі няма!» — заявіў ён 29 красавіка сёлета.
Зь сярэдзіны красавіка да 13 чэрвеня, як сьцьвярджае Дзяржаўны памежны камітэт Беларусі, Беларусь па «бязьвізе» наведалі 43 149 грамадзян Літвы.
ГЛЯДЗІЦЕ ТАКСАМА: Віцебская вобласьць часова зьняла абмежаваньні на вываз прадуктаў у Літву і Латвію