Сярод іншага ён адказаў на пытаньні пра гвалт супраць цывільных грамадзян Украіны і пра палонных брытанцаў, асуджаных на сьмерць у самаабвешчанай «ДНР».
«Мы не ўрываліся ва Ўкраіну»
«Вы ведаеце, мы не ўрываліся ва Ўкраіну. Мы абвясьцілі спэцыяльную ваенную апэрацыю, калі ў нас ужо не засталося ніякага спосабу растлумачыць Захаду, што ён займаецца злачыннай дзейнасьцю, уцягваючы Ўкраіну ў NATO», — заявіў Лаўроў.
Вайна Расеі супраць Украіны ідзе з 24 лютага, загінулі тысячы цывільных і вайскоўцаў, звыш 7 мільёнаў чалавек сталі ўцекачамі. Расейскія ракеты і бомбы разбурылі многія аб’екты інфраструктуры і жылыя будынкі.
ГЛЯДЗІЦЕ ТАКСАМА: Удар па Мікалаеве; украінскія войскі заяўляюць, што падбілі расейскі буксір «Василий Бех». 114-ы дзень вайны Расеі супраць Украіны«Мы не саромеемся паказваць сябе такімі, якія мы ёсьць»
Карэспандэнт ВВС працытаваў словы Вярхоўнага камісара ААН у правах чалавека Мішэль Бачэлет, пра тое, што ў вёсцы Ягаднае ў Чарнігаўскай вобласьці расейскія вайскоўцы 28 дзён утрымлівалі 360 чалавек, у тым ліку 74 дзіцяці і пяць чалавек з інваліднасьцю, у падвале школы без прыбіральні і амаль без вады (10 пажылых людзей памерлі).
«Гэта барацьба з нацызмам?» — спытаў карэспандэнт ВВС.
«Вы ведаеце, на жаль, міжнародныя чыноўнікі, уключаючы Вярхоўнага камісара ў правах чалавека, у тым ліку — на вялікі мой жаль — генэральнага сакратара ААН і многіх іншых прадстаўнікоў Арганізацыі Аб’яднаных Нацый, схільныя да ціску Захаду. І вельмі часта выступаюць рупарам тых фэйкавых навін, якія распаўсюджвае Захад», — адказаў Лаўроў.
«Гэта значыць, атрымліваецца Расея зноў белая і пухнатая?» — спытаў журналіст.
«Не, Расея ня белая і не пухнатая. Расея такая, якая яна ёсьць. І мы не саромеемся паказваць сябе такімі, якія мы ёсьць», — адказаў міністар.
Ягаднае знаходзіцца за 140 км на поўнач ад Кіева пад Чарнігавам і недалёка ад мяжы зь Беларусьсю. Вёска знаходзілася пад кантролем расейскага войска амаль месяц. Калі вайскоўцы ўвайшлі ў сяло, яны забралі мужчын, жанчын і дзяцей з дамоў, пагражаючы ім зброяй, і завялі ў падвал мясцовай школы, дзе пратрымалі чатыры тыдні.
ГЛЯДЗІЦЕ ТАКСАМА: Як сёньня выглядае Буча, дзе ў масавым пахаваньні знайшлі 117 цел расстраляных расейцамі ўкраінцаў. ФОТА«А вы лічыце, у вас незалежны суд?»
9 чэрвеня суд у самаабвешчанай «ДНР» прысудзіў сьмяротнае пакараньне брытанцам Шону Пінэру і Эйдэну Асьліну, а таксама грамадзяніну Марока Саадуну Брагіму, прызнаўшы іх вінаватымі ў наёмніцтве, спробе гвалтоўнага захопу ўлады. Усе трое — вайскоўцы ўзброеных сіл Украіны, якія падпісалі кантракты яшчэ да пачатку расейскага ўварваньня.
«У вачах Захаду Расея нясе адказнасьць за лёс гэтых людзей. Вы ня лічыце, што...» — пачаў задаваць пытаньне журналіст ВВС.
«Не, — не чакаючы канца пытаньня, адказаў міністар замежных спраў Расеі. — Слухайце, мяне вочы Захаду не цікавяць наогул. Мяне цікавіць толькі міжнароднае права. Па міжнародным праве найміты не зьяўляюцца камбатантамі. Таму, што ў вас у вачах, шчыра кажучы, ня мае значэньня».
«Яны ня найміты. Яны служылі ва Ўкраінскіх узброеных сілах», — парыраваў журналіст.
«Гэта павінен вызначыць суд», — сказаў Лаўроў.
На пытаньне, ці лічыць ён суд у «ДНР» незалежным, ён адказаў:
«Я перакананы, што там незалежны суд. А вы лічыце, у вас [у Вялікай Брытаніі] незалежны суд?»
ГЛЯДЗІЦЕ ТАКСАМА: «Фіктыўны прысуд», — у Вялікай Брытаніі і ЗША пракамэнтавалі сьмяротны вырак у самаабвешчанай «ДНР» брытанскім добраахвотнікамВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.