У Расеі ў абвінавачаных у распаўсюдзе «ілжывай інфармацыі» аб вайне пачалі арыштоўваць маёмасьць

«Гаворка ідзе аб арышце банкаўскіх рахункаў, транспартных сродкаў і кватэр ва ўласнасьці», — напісаў ён у тэлеграм-канале.

Праваабаронца не назваў прозьвішчаў абвінавачаных, але ўдакладніў, што ўсе яны знаходзяцца за мяжой і абвешчаныя ў вышук.

Як адзначае Чыкаў, Крымінальна-працэсуальны кодэкс дазваляе арыштоўваць маёмасьць «для забесьпячэньня выкананьня прысуду ў частцы спагнаньня штрафу». Па частцы 2 артыкула 207.3 можа быць прызначаны штраф ад трох да пяці мільёнаў рублёў. Максымальнае пакараньне — ад пяці да дзесяці гадоў пазбаўленьня волі.

А што ў Беларусі

Беларускія ўлады разглядаюць магчымасьць крымінальнага новаўвядзеньня – завочных судоў і канфіскацыі маёмасьці ў тых, хто не знаходзіцца ў Беларусі. Прадстаўнікі ўлады выказваліся, што такія меры могуць быць прынятыя да дэмакратычных лідэраў, якія цяпер за мяжой.

У Беларусі ў траўні дэпутаты Палаты прадстаўнікоў ухвалілі законапраект аб увядзеньні завочных судоў. Згодна зь імі, у Беларусі зьявіцца інстытут так званага спэцыяльнага вядзеньня. Яго будуць прымяняць у дачыненьні да тых, хто знаходзіцца за межамі краіны і, на думку сьледзтва, учыніў злачынствы «супраць дзяржавы, супраць міру і бясьпекі чалавецтва або злачынствы, якія пагражаюць нацыянальнай бясьпецы». Такая мера павінна забясьпечыць таксама права дзяржавы на «спэцыяльную канфіскацыю» маёмасьці завочна асуджаных.

У канцы траўня стала вядома пра разгром сілавікамі кватэры блогера Андрэя Павука на Гомельшчыне, катэджа Веранікі і Валерыя Цапкалаў пад Менскам. Летась арыштавалі менскую кватэру дачкі Паўла Латушкі. Усе яны цяпер за мяжой, супраць усіх заведзеныя крымінальныя справы.