Па стане на 10 траўня праваабаронцам стала вядома, што аднаго з затрыманых і зьмешчаных у СІЗА КДБ, былога кіраўніка незалежнага прафсаюза работнікаў радыёэлектроннай прамысловасьці (РЭП) Генадзя Фядыніча перавялі ў СІЗА №1 на вуліцы Валадарскага ў Менску.
Фядыніча затрымалі 19 красавіка падчас масавага «хапуну» прадстаўнікоў незалежных прафсаюзаў. Перавялі на Валадарку і лідэра аршанскага незалежнага прафсаюзу РЭП Васіля Берасьнева.
Паводле папярэдняй інфармацыі, іх абвінавачваюць ва ўдзеле ў экстрэмісцкім фармаваньні (ч.1 арт. 361 Крымінальнага кодэксу).
У Генадзя Фядыніча ў СІЗА абвастрыліся праблемы са здароўем — ад стрэсу ўзровень цукру ў крыві амаль не зьбіваецца інсулінам.
Вядома таксама, што ў СІЗА КДБ ім не перадавалі лістоў і перадач. Берасьневу ж не передалі нават акуляраў.
ГЛЯДЗІЦЕ ТАКСАМА: Міжнародная арганізацыя працы запатрабавала вызваліць беларускіх прафсаюзных лідэраўЧастку затрыманых актывістаў незалежных прафсаюзаў абвінавачваюць ва ўдзеле ў дзеяньнях, якія груба парушаюць грамадзкі парадак.
Так, кіраўнік ячэйкі свабоднага прафсаюзу з Полацка Мікалай Шарах выйшаў з СІЗА КДБ пад падпіску аб нявыезьдзе. Яго падазраюць паводле ч. 1 арт. 342 Крымінальнага кодэксу (удзел у дзеяньнях, якія груба парушаюць грамадзкі парадак).
Дагэтуль застаецца за кратамі 66-гадовы намесьнік старшыні Свабоднага прафсаюзу мэталістаў Аляксандар Еўдакімчык, якога таксама абвінавачваюць паводле ч. 1 арт. 342 Крымінальнага кодэксу.
ГЛЯДЗІЦЕ ТАКСАМА: Прайшло 10 дзён з моманту затрыманьня прафсаюзных лідэраў і актывістаў. Што пра іх вядома сёньня ГЛЯДЗІЦЕ ТАКСАМА: «Ніколі не забудуся, ніколі не дарую!», — жонка затрыманага прафсаюзнага лідэра Бухвостава