Ва Ўкраіне нацыяналізуюць беларускае судна, якое абслугоўвала Расею ва ўкраінскіх водах

Дзяржаўнае бюро расьсьледаваньняў Украіны заявіла аб арышце і пачатку працэсу нацыяналізацыі беларускага судна «Надежда» і сухагрузавай баржы, якія знаходзіліся ў акваторыі Ізмаільскага порту на Адэшчыне і выконвалі апэрацыі для Расеі ў тэрытарыяльных водах Украіны.

Цяпер судна і баржу перадалі на захоўваньне ў Адміністрацыю марскіх партоў Украіны і адначасова зьвярнуліся да Адэскай абласной вайсковай адміністрацыі з ініцыятывай іх нацыяналізацыі.

«Цяпер яны будуць працаваць у інтарэсах дзяржавы, для будаўніцтва і эканамічнага разьвіцьця Ўкраіны», — адзначылі ў Дзяржаўным бюро расьсьледаваньняў Украіны.

У красавіку Офіс генэральнага пракурора Ўкраіны паведаміў, што з пачатку расейскага вайсковага ўварваньня ва Ўкраіну ўкраінскія праваахоўныя органы ініцыявалі нацыяналізацыю 17 800 чыгуначных вагонаў, якія належаць прадпрыемствам Расеі і Беларусі. Але пры гэтым колькасьць менавіта беларускіх вагонаў не ўдакладнялі.

У красавіку стала вядома, што Оўруцкая гарадзкая рада зьвярнулася ў Кабінэт міністраў Украіны з прапановай нацыяналізаваць Оўруцкі друзавы завод, які дагэтуль застаецца ўласнасьцю Беларусі. Але пакуль адпаведнае рашэньне не ўхвалена.

ГЛЯДЗІЦЕ ТАКСАМА: Ва Ўкраіне ў сувязі з вайной ініцыявалі нацыяналізацыю беларускага прадпрыемства ў Жытомірскай вобласьці

Шэраг супольных беларуска-ўкраінскіх прадпрыемстваў, створаных ва Ўкраіне пры ўдзеле беларускіх дзяржаўных кампаній, у тым ліку ў сфэры гандлі нафтапрадуктамі і мінэральнымі ўгнаеньнямі, па-ранейшаму застаюцца ўласнасьцю Беларусі, хаця ў большасьці зь іх адбыліся зьмены ў складзе бэнэфіцыярных уласьнікаў.

Як адбываецца працэс канфіскацыі

Расьсьледаваньне крымінальных спраў вядуць Дзяржаўнае бюро расьсьледаваньняў і Бюро эканамічнай бясьпекі.

ГЛЯДЗІЦЕ ТАКСАМА: МАЗ і БелАЗ выйшлі з заснавальнікаў сваіх украінскіх «дачок». Гэта дапамагае абыйсьці санкцыі

Рашэньне аб канфіскацыі мусяць ухваліць суды ў тых рэгіёнах, дзе знаходзяцца арыштаваныя вагоны.

Пасьля гэтага сканфіскаваная маёмасьць будзе перададзеная ў кіраваньне Нацыянальнага агенцтва Ўкраіны ў пытаньнях знаходжаньня, вышуку і кіраваньня актывамі, атрыманымі ад карупцыйных і іншых злачынстваў (АРМА). Агенцтва мусіць абвясьціць публічны конкурс, каб вызначыць юрыдычную ці фізычную асобу для кіраваньня арыштаванымі актывамі.

ГЛЯДЗІЦЕ ТАКСАМА: Як расейскія танкі і ракеты спынілі рэкордны гандаль Беларусі і Ўкраіны

Беларускі карабель «Надзея», які выконвае рэйсы ва Ўкраіне

ГЛЯДЗІЦЕ ТАКСАМА: Генэральная пракуратура Ўкраіны падлічыла колькасьць сканфіскаваных беларускіх і расейскіх чыгуначных вагонаў

Вайна Расеі супраць Украіны

А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.