У Расеі абвясьцілі мэту другога этапу вайны ва Ўкраіне — выхад у Крым і Прыднястроўе: 58-ы дзень вайны Расеі супраць Украіны

Галоўнае на гэты момант

• У Мінабароны Расеі абвясьцілі мэту другога этапу вайны ва Ўкраіне — выхад у Крым і Прыднястроўе.
• ААН: з пачатку вайны ва Ўкраіне загінулі прынамсі 2345 мірных жыхароў, 2919 параненыя.
• Марыюпаль зьнішчаны на 95-98%, у горадзе больш за 400 параненых украінскіх вайскоўцаў, — Зяленскі. Расейскія войскі працягваюць бамбіць «Азоўсталь», нягледзячы на скасаваньне штурму Пуціным.
• Расея стварыла вакол заблякаванага ёю Марыюпалю 4 фільтрацыйныя лягеры для мужчын, якія знаходзяцца ў горадзе.
• Расейцы захапілі 22 аб’яднаныя тэрытарыяльныя грамады ў Харкаўскай вобласьці з 56.
• Украінскія памежнікі выйшлі на ахову ўсёй лініі мяжы зь Беларусьсю.
• Уцекачоў ад вайны ва Ўкраіне ўжо больш за 5 млн чалавек.
• Расейцы вядуць інтэнсіўныя атакі на Данбасе.
• Адбыўся пяты абмен палоннымі паміж Украінай і Расеяй.

Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, пакуль немагчымая.

Што адбываецца 21 і 22 красавіка

Місія ААН зафіксавала ў Бучы 50 наўмысных забойстваў

Місія ААН, якая працуе на тэрыторыі Ўкраіны, зафіксавала 50 наўмысных забойстваў цывільных жыхароў у Бучы, учыненых расейскімі вайскоўцамі.

Такія дзеяньні прыраўноўваюцца да ваенных злачынстваў, гаворыцца ў справаздачы місіі.

У Мінабароны Расеі абвясьцілі мэту другога этапу вайны ва Ўкраіне — выхад у Крым і Прыднястроўе

Намесьнік камандуючага Цэнтральнай вайсковай акругі Расеі Рустам Міньнекаеў назваў дзьве мэты, якіх расейскія войскі плянуюць дасягнуць у часе другога этапу вайны супраць Украіны. Як паведамляе расейскае выданьне «Коммерсант», гаворка ідзе аб забесьпячэньні сухапутнага выхаду ў Крым і Прыднястроўе.

«З пачатку другой фазы спэцапэрацыі, яна ўжо пачалася літаральна два дні таму, адной з задач расейскай арміі зьяўляецца ўсталяваньне поўнага кантролю над Данбасам і Паўднёвай Украінай. Гэта дазволіць забясьпечыць сухапутны калідор у Крым, а таксама ўзьдзейнічаць на жыцьцёва важныя аб’екты ўкраінскай эканомікі», — сказаў Рустам Міньнекаеў на гадавым зборы Саюзу прадпрыемстваў абаронных галінаў прамысловасьці Сьвярдлоўскай вобласьці 22 красавіка.

Аварыя самалёта ў Запароскай вобласьці

22 красавіка ў Вальнянскім раёне Запароскай вобласьці разьбіўся самалёт АН-26, які выконваў тэхнічны палёт. Цяпер вядома пра аднага загінулага і двух параненых, на месцы працуюць ратавальнікі, паведамілі тэлеканалу «Суспільне» ў абласной адміністрацыі.

Славянск, імаверна, абстралялі касэтнымі боепрыпасамі — мэр гораду

«Ноч была трывожная, горад трапіў пад абстрэл, паводле папярэдніх зьвестак, з ужываньнем касэтных боепрыпасаў. На шчасьце, абышлося без ахвяраў», — сказаў у відэазвароце кіраўнік вайсковай адміністрацыі гораду Вадзім Лях і заклікаў людзей эвакуавацца.

Гэта ня першы выпадак, калі расейскія вайскоўцы выкарыстоўваюць касэтныя боепрыпасы. У ААН паведамілі, што на 30 сакавіка сьледчыя расьсьледуюць 24 выпадкі ўжываньня расейскіх касэтных боепрыпасаў ва Ўкраіне. Расея, нягледзячы на шматлікія сьведчаньні, заяўляе, што не абстрэльвае мірных жыхароў Украіны.

Украінскі генэральны штаб: расейцы прабіваюцца на поўдзень і захад ад Ізюму

Генэральны штаб украінскіх Узброеных сілаў у зводцы з раніцы 22 красавіка паведамляе, што расейскія войскі спрабуюць прабівацца далей на поўдзень ад гораду Ізюм, спрабуючы атачыць данбаскую групоўку ўкраінскіх войскаў.

«На Ізюмскім кірунку супернік засяродзіў да 25 батальённа-тактычных групаў [...] Вораг зьдзяйсьняе спробы весьці наступ у кірунку паселішча Завады. Выйшаў на паўночныя ўскраіны Дуброўнага, спрабуе замацавацца на дасягнутай мяжы», — гаворыцца ў зводцы.

Завады на захад ад Ізюму, Дуброўнае — на поўдзень ад яго і ўсяго за пару дзясяткаў кілямэтраў на паўночны захад ад аглямэрацыі Славянск — Краматорск, а з усходу да яе расейцы спрабуюць прабіцца з акупаваных тэрыторыяў Луганскай і Данецкай абласьцей.

Сьцісла пра сытуацыю на іншых кірунках, паводле ўкраінскага Генэральнага штабу:

• Расейцы па-ранейшаму часткова блякуюць Харкаў сіламі да сямі батальённа-тактычных групаў, абстрэльваюць пазыцыі ўкраінцаў і горад.
• На ўсіх усходніх участках фронту расейцы ў мінулыя суткі актывізаваліся і атакуюць, у прыватнасьці, у раёнах Зарэчнага, Рубежнага, Папаснай, Наватошкаўскага, Мар’інкі.
• Усяго на тэрыторыі Данецкай і Луганскай абласьцей за содні былі адбітыя 10 атак, зьнішчаныя 6 танкаў, 8 іншых панцырных машын, 15 аўтамабіляў і 4 артылерыйскія сыстэмы, сьцьвярджаюць у Генэральным штабе Ўзброеных сілаў Украіны.
• На Запароскім кірунку расейскія войскі нарошчваюць сілы і выбудоўваюць лягістыку.

У Кіеўскай вобласьці выявілі целы 1084 мірных жыхароў, большасьць забітыя стралковай зброяй

«Хачу сказаць, што цяпер колькасьць целаў загінулых, якія агледзелі сьледчыя і вывезьлі ў судова-мэдычныя ўстановы, складае ўжо 1084 чалавекі. Гэта мірныя людзі, якія ня мелі дачыненьня ні да тэрытарыяльнай абароны, ні да іншых вайсковых фармаваньняў. Ад 50 да 75% — гэта людзі, забітыя са стралковай зброі. Гэта кулямёт, або снайпэрская вінтоўка, або аўтамат, у залежнасьці ад населенага пункта», — сказаў Андрэй Небытаў у эфіры нацыянальнага тэлемаратону.

Паводле яго зьвестак, да гэтага часу неідэнтыфікаванымі застаюцца больш як 300 целаў загінулых. У Барадзянцы, дзе да гэтага часу ідзе разбор завалаў, знойдзена больш за 80 цел загінулых, паведаміў Андрэй Небытаў.

З падкантрольнай Украіне часткі Данецкай вобласьці зьехалі тры чвэрці насельніцтва, — мясцовыя ўлады

Паводле кіраўніка Данецкай абласной адміністрацыі Паўла Кірыленкі, да пачатку вайны на падкантрольнай Украіне тэрыторыі вобласьці жылі 1 мільён 670 тысяч чалавек, а цяпер засталіся каля 430 тысяч.

У другім найбуйнейшым горадзе вобласьці пасьля Марыюпалю — Краматорску, з словаў Кірыленкі, засталася прыкладна пятая частка насельніцтва: 40 тысяч з даваенных 200 тысяч.

Найбуйнейшым горадам украінскай часткі Данецкай вобласьці быў амаль пяцісоттысячны Марыюпаль. Колькі жыхароў засталося там, Кірыленка не назваў. Мэр Марыюпалю Вадзім Бойчанка ўчора заявіў, што цяпер у горадзе застаюцца каля 100 тысяч мірных жыхароў, з пачатку вайны больш за 20 тысяч загінулі ад варожай артылерыі. Тым часам прызначаны ўладамі так званай «ДНР» кіраўнік адміністрацыі гораду Канстанцін Івашчанка сьцьвярджае, што цяпер у горадзе знаходзяцца каля 250 тысяч чалавек.

Улады Харкаўскай і Луганскай абласьцей паведамляюць пра абстрэлы рэгіёнаў

Кіраўнік Луганскай абласной адміністрацыі Сяргей Гайдай паведаміў 22 красавіка, што расейскія войскі за мінулы дзень 11 разоў абстрэльвалі рэгіён. Пад агнём апынуліся Севераданецк, Лісічанск, Папасная, Рубежнае і Горная гарадзкая грамада. Параненыя чатыры чалавекі, пашкоджаны сем будынкаў, заявіў Гайдай.

Харкаў і Харкаўская вобласьць за мінулыя содні каля 50 разоў зазнавалі абстрэлы, паведаміў кіраўнік абласной адміністрацыі Алег Сінягубаў. Сярод мірнага насельніцтва ёсьць ахвяры, дадаў ён. Актыўныя баі вядуцца ў Ізюмскім кірунку, сказаў Сінягубаў, падкрэсьліўшы, што ўкраінскія ўзброеныя сілы ўтрымліваюць пазыцыі.

СБУ папярэдзіла аб магчымых правакацыях Расеі на Вялікдзень

Служба бясьпекі Ўкраіны заклікала вернікаў быць асабліва пільнымі ў Вялікдзень, бо магчымыя правакацыі Расеі супраць мірных жыхароў у час сьвятаў і богаслужэньняў. Паводле СБУ, расейскія СМІ ўжо пачалі рыхтаваць глебу для правакацый расейскай арміі. «І загадзя перакладаюць адказнасьць за іх на прадстаўнікоў «нацыяналістычных аб’яднаньняў».

У грамадзян Украіны, вывезеных у Расею, адбіраюць украінскія пашпарты, а ўзамен выдаюць даведку аб міграцыі

Пра гэта заявіла ўпаўнаважаная Вярхоўнай Рады Ўкраіны ў правах чалавека Людміла Дзянісава ў эфіры тэлеканалу «Настоящее время».

«Напрыклад, у нас ёсьць сям’я, перавезеная ў Суздаль Уладзімірскай вобласьці. А далей ім даюць, калі да іх прыйдуць нейкія службы, міграцыйную даведку. І яны вось з гэтай міграцыйнай даведкай далей і езьдзяць», — заявіла Дзянісава.

Паводле яе, цяпер вядзецца работа над тым, каб грамадзяне Ўкраіны, у якіх адабралі пашпарты, змаглі выехаць з Расеі ў краіны Эўразьвязу па гэтай даведцы.

Ва Ўкраіну прыбылі экспэрты-крыміналісты са Славаччыны

Як паведаміла генэральны пракурор Украіны Ірына Венядзіктава 22 красавіка, гэта паліцыянты, судова-мэдычныя экспэрты і антраполяг, якія будуць дапамагаць украінскім калегам у расьсьледаваньні ваенных злачынстваў. Першая група ўжо ў Кіеве.

ААН: з пачатку вайны ва Ўкраіне загінулі прынамсі 2345 мірных жыхароў

Паводле зьвестак на поўнач 20 красавіка, ва Ўкраіне зафіксаваныя 5264 ахвяры сярод мірнага насельніцтва: 2345 забітых і 2919 параненых, — гаворыцца ў паведамленьні ААН. Загінулі 703 мужчыны, 429 жанчын, 44 дзяўчынкі і 63 хлопчыкі, а таксама 70 дзяцей і 1036 дарослых, пол якіх пакуль невядомы. Раненьні атрымалі 339 мужчын, 271 жанчына, 61 дзяўчынка і 66 хлопчыкаў, а таксама 158 дзяцей і 2024 дарослых, пол якіх пакуль невядомы.

У ААН падкрэсьліваюць, што рэальныя лічбы могуць быць нашмат большыя, бо інфармацыя зь месцаў, дзе ідуць баі, даходзіць са спазьненьнем, а таксама шмат паведамленьняў чакаюць пацьвярджэньня.

208 дзяцей загінулі ва Ўкраіне з пачатку вайны

Больш за 594 дзіцяці пацярпелі ў выніку вайны Расеі супраць Украіны. Па стане на раніцу 22 красавіка 208 дзяцей загінулі, 386 параненыя, паведамляе Офіс Генпракурора Ўкраіны. Лічбы не канчатковыя, бо ідзе праца па іх устанаўленьні ў месцах вядзеньня актыўных баявых дзеяньняў, на часова акупаваных і вызваленых тэрыторыях.

Паводле ювэнальных пракурораў, больш за ўсё пацярпела дзяцей у Данецкай вобласьці — 120, Кіеўскай — 113, Харкаўскай — 91, Чарнігаўскай — 66, Херсонскай — 44, Мікалаеўскай — 41, Луганскай — 37, Запароскай — 25, Сумскай — 17, у Кіеве — 16, Жытомірскай вобласьці — 15.

З прычыны бамбардаваньняў і абстрэлаў узброенымі сіламі РФ пашкоджана 1141 навучальная ўстанова, зь іх 99 разбураныя цалкам.

22 красавіка гуманітарныя калідоры ва Ўкраіне працаваць ня будуць

Пра гэта паведаміла віцэ-прэм’ер Украіны Ірына Верашчук. Паводле яе, на патэнцыйных маршрутах для эвакуацыі занадта небясьпечна.

Зяленскі: Марыюпаль зьнішчаны на 98%

Прэзыдэнт Украіны Ўладзімір Зяленскі ў інтэрвію францускаму тэлеканалу BFMTV заявіў, што акупанты зьнішчылі ў Марыюпалі 95-98% будынкаў.

«Гэта больш падобна не да вайны, а да тэрарыстычнай апэрацыі Расеі супраць Марыюпалю і жыхароў гэтага гораду. Там усё зьнішчана — 95-98% усіх будынкаў, усё, што ёсьць. Мы з вамі гаворым пра школы, дзіцячыя садкі, звычайныя жылыя кварталы, заводы, набярэжную — гэта прыморскі горад. Усё!» — падкрэсьліў Зяленскі.

Са словаў прэзыдэнта, горад увесь час пад абстрэламі, таму многія баяцца нават выходзіць з схованкі. Разам з тым частка людзей рушыла на падкантрольную Ўкраіне тэрыторыю, але частку «эвакуавалі» на падкантрольныя Расеі тэрыторыі. Зяленскі адзначыў, што тысячы людзей, якія выехалі ў Расею або на часова акупаваную частку Ўкраіны, проста зьніклі.

У Марыюпалі больш за 400 параненых украінскіх вайскоўцаў, паведаміў сёньня Ўладзімір Зяленскі.

Адбыўся чарговы абмен палоннымі

21 красавіка ўкраінскі бок вярнуў дахаты 19 чалавек, зь іх 10 вайскоўцаў і 9 цывільных. Па словах віцэ-прэм’ера Ўкраіны Ірыны Верашчук, сярод іх ёсьць параненыя. Яна не ўдакладніла, паводле якой схемы адбываўся абмен. Міністэрства абароны Расеі з камэнтаром не выступала.

На спадарожнікавых здымках зафіксавалі 300-мэтровую брацкую магілу ў акупаванай войскамі РФ вёсцы Мангуш каля Марыюпалю

Згодна са спадарожнікавымі здымкамі, выкапаная тут траншэя зьявілася арыенціровачна ў канцы сакавіка. На здымку ад 23 сакавіка яе яшчэ не было. На наступным здымку гэтай мясцовасьці ад 29 сакавіка ўжо бачна выкапаная траншэя даўжынёй больш за 300 мэтраў і, верагодна, тэхніка, якая яе зрабіла.

Расейскія войскі бамбяць «Азоўсталь», нягледзячы на адмену штурму, — дарадца мэра

Большая частка Марыюпалю цяпер пад кантролем расейскіх войскаў, апроч прамысловай пляцоўкі мэталюргічнага гіганта «Азоўсталь». 21 красавіка стала вядома, што ў часе справаздачы міністра абароны Расеі Сяргея Шайгу Ўладзімір Пуцін аддаў загад скасаваць штурм мэталюргічнага камбінату «Азоўсталь» у Марыюпалі.

Пасьля гэтага дарадца мэра Марыюпалю Пётр Андрушчанка паведаміў, што расейскія войскі зноў праводзяць бамбардзіроўку і абстрэл тэрыторыі «Азоўсталі».

«Гэта проста для разуменьня „зялёных калідораў для «Азоўсталі»“ і „перамогі Пуціна ў Марыюпалі“. Я ўпэўнены — акупанты ня спыняцца да поўнага зьнішчэньня ўсіх, хто ўнутры „Азоўсталі“. Ні нашых абаронцаў, ні цывільных», — напісаў Андрушчанка ў Тэлеграме.

Украінскі бок заяўляе, што на тэрыторыі прадпрыемства знаходзяцца каля 1000 цывільных асобаў і 500 параненых вайскоўцаў, і патрабуе арганізаваць гуманітарны калідор.

У захопленай Херсонскай вобласьці расейскія войскі абвясьцілі мабілізацыю і анансавалі рэфэрэндум

У Херсонскай вобласьці, якая знаходзіцца пад кантролем расейскіх войскаў, абвешчана аб мабілізацыі мужчын, паведамляе прэс-служба Генштабу Ўзброеных сіл Украіны.

Апэратыўнае камандаваньне «Поўдзень» Узброеных сіл Украіны паведаміла, што расейскія войскі пры дапамозе ўкраінскіх калябарантаў рыхтуюць на 27 красавіка фальшывы рэфэрэндум у акупаванай Херсонскай вобласьці.

У Барадзянцы знайшлі дзьве брацкія магілы

Дзевяць загінулых, у тым ліку 15-гадовую дзяўчынку, знайшлі на месцах масавага пахаваньня мірных жыхароў Барадзянкі, паведаміў начальнік паліцыі Кіеўскай вобласьці Андрэй Небытаў.

Брацкія магілы былі знойдзеныя 20 красавіка. У адной зь іх знаходзіліся двое 35-гадовых мужчын, а побач — цела 15-гадовай дзяўчынкі. У іншым месцы пахаваньня паліцыя выявіла чатырох мужчын і дзьвюх жанчын, імёны загінулых пакуль не ўстаноўленыя. У некаторых з загінулых ёсьць прыкметы катаваньняў. Целы ўсіх загінулых былі дастаўленыя ў моргі Кіеўшчыны для далейшых экспэртыз.

У Харкаве разбураныя 1929 жылых дамоў, а каля 30% харкаўчан пакінулі горад

Цяпер з гораду можна выехаць цягніком ці машынай, усе ахвочыя маюць такую магчымасьць, кажа гарадзкі галава Харкава Ігар Церахаў. «Прыкладна 30% харкаўчан — гэта ў асноўным жанчыны, дзеці, пажылыя людзі — выехалі з гораду», — паведаміў ён.

Ваеннае становішча ва Ўкраіне падоўжылі да 25 траўня

Дэпутаты Вярхоўнай Рады Ўкраіны ўхвалілі працяг у краіне рэжыму ваеннага становішча яшчэ на 30 дзён. Ваеннае становішча было ўведзена 24 лютага, у дзень расейскага ўварваньня, рэжым яго дзеяньня працягваўся да 26 сакавіка. Цяпер ваеннае становішча ў краіне будзе дзейнічаць да 25 траўня.

Ваеннае становішча азначае магчымасьць увядзеньня шэрагу абмежаваньняў, у тым ліку — камэнданцкай гадзіны, абмежаваньняў на ўезд або выезд з гораду і іншых.

Украінскія ўлады: адзіны гуманітарны калідор — з Херсонскай вобласьці — не спрацаваў

Заплянаваны на 21 красавіка «зялёны калідор» з акупаваных сёлаў Херсонскай вобласьці ў Днепрапятроўскую не спрацаваў, напісаў кіраўнік Днепрапятроўскай вайсковай адміністрацыі Валянцін Разьнічэнка. Гэта быў адзіны калідор, узгоднены бакамі на 21 красавіка.

Падобную заяву зрабіў губэрнатар Херсонскай вобласьці Генадзь Лагута. «Для эвакуацыі насельніцтва было накіравана 10 аўтобусаў, аднак акупанты не прапусьцілі транспарт», — удакладніў ён. Расейскі бок не камэнтаваў гэтыя заявы.

Расейцы захапілі 22 аб’яднаныя тэрытарыяльныя грамады ў Харкаўскай вобласьці з 56

Расейскія вайскоўцы захапілі 22 абʼяднаныя тэрытарыяльныя грамады ў Харкаўскай вобласьці, 34 надалей кантралююцца ўкраінскімі ўладамі, паведаміў кіраўнік Харкаўскай абласной вайсковай адміністрацыі Алег Сінягубаў.

Паводле яго, расейцы выкарыстоўваюць іх як транзытныя зоны.

З пачатку расейскага ўварваньня ў горадзе Папасная Луганскай вобласьці загінула больш за 100 чалавек

Гэта сьцьвярджае кіраўнік аблдзяржадміністрацыі Сяргей Гайдай, спасылаючыся на зьвесткі гарадзкой вайскова-цывільнай адміністрацыі. Паводле яго, у горадзе застаюцца больш за 2,5 тысячы жыхароў, эвакуацыя «ўскладненая», «цяпер расейцы кантралююць каля паловы гораду».

«Вулічныя баі ідуць бесьперапынку, людзі жывуць у бамбасховішчах, выйсьці на вуліцу ня маюць магчымасьці праз шчыльнасьць абстрэлаў», — піша Гайдай. Ён адзначае, што ў Папаснай няма ацалелых дамоў.

Ва Ўкраіне з прычыны вайны пацярпелі 347 мэдычных установаў

У выніку вайны ва Ўкраіне на 21 красавіка пашкоджаныя 347 установаў аховы здароўя, 36 зь іх разбураныя; выйшлі з ладу 78 машын хуткай дапамогі, паведаміў міністар аховы здароўя Віктар Ляшко. «Паводле папярэдніх падлікаў, на поўнае аднаўленьне працы з абсталяваньнем гэтым 36 аб’ектам неабходна 13 млрд. грыўняў», — дадаў ён.

Дэмантаж абэліску і выдаленьне расейскамоўных шыльдаў

У Бярдзічаве Жытомірскай вобласьці ўлады дэмантавалі абэліск удзельнікам грамадзянскай вайны, а менавіта чырвонай дывізіі Шчорса. У 1919 годзе яна перамагла ў баях за горад сечавых стральцоў Сымона Пятлюры, у цэнтры гораду зрабілі супольную магілу шчорсаўцаў, а над ёю паставілі абэліск. Цяпер яго дэмантавалі ў рамках дэкамунізацыі, піша ТСН.

У Хмяльніцкім тым часам здымаюць расейскамоўныя шыльды — іх набралася ў горадзе некалькі дзясяткаў.

Уцекачы ад вайны

Паводле зьвестак ААН, з пачатку вайны па 21 красавіка Ўкраіну пакінулі ўжо больш за 5 мільёнаў 133 тысячы чалавек. Зь іх:

• 2 млн 867 тысяч прыехалі ў Польшчу,
• 769,6 тысячы — у Румынію,
• 578,3 тысячы — у Расейскую Фэдэрацыю,
• 480,9 тысячы — у Вугоршчыну,
• 430,2 тысячы — у Малдову,
• 349,3 тысячы — у Славаччыну,
• 23,9 тысячы — у Беларусь.

Насельніцтва Ўкраіны (уключаючы кантраляваную Расеяй тэрыторыю) складае каля 44 мільёнаў чалавек.

Што адбываецца ў Расеі

Расея ўвяла новыя пэрсанальныя санкцыі супраць грамадзян ЗША і Канады

21 красавіка МЗС Расеі ўвёў пэрсанальныя санкцыі супраць 29 грамадзян ЗША. Сярод іх галоўны рэдактар англамоўнай вэрсіі «Медузы» Кевін Ротрак, сузаснавальнік Фэйсбуку — Марк Цукербэрг, LinkedIn — Раян Расланскі, віцэ-прэзыдэнт ЗША Камала Гарыс з мужам і яшчэ шэраг чыноўнікаў, прадпрымальнікаў і журналістаў.

Таксама МЗС Расеі абвясьціў аб пэрсанальных санкцыях супраць 61 грамадзяніна Канады. У сьпісе — дзяржаўныя службоўцы, вайсковыя камандзіры, кіраўнікі грамадзкіх арганізацый і супрацоўнікі СМІ.

Міністэрства абароны Расеі вырашыла абмежаваць доступ да зьвестак аб сваяках вайскоўцаў, якія загінулі ва Ўкраіне

Зьвесткі пра вайскоўцаў, што загінулі пры правядзеньні «спэцапэрацыяў», яшчэ з 2015 году сталі дзяржаўнай таямніцай, але льготы іхным сем’ям афармляюць цывільныя чыноўнікі раённых адміністрацыяў. Цяпер Міністэрства абароны РФ просіць урад перадаць гэтыя паўнамоцтвы вайсковым камісарыятам, што зробіць больш закрытай інфармацыю пра загінулых удзельнікаў вайны супраць Украіны, піша ВВС.

Кампанія Henkel абвясьціла, што сыходзіць з Расеі з прычыны вайны

Нямецкая кампанія — вытворца бытавой хіміі Henkel вырашыла спыніць дзейнасьць у Расеі. Пра гэта гаворыцца ў заяве кампаніі. У кампаніі паабяцалі, што 2500 яе супрацоўнікаў пакуль працягнуць працаваць і атрымліваць заробак, а плян выхаду Henkel з расейскага рынку яшчэ рыхтуецца.

У Henkel дадалі, што асуджаюць вайну Расеі супраць Украіны і гвалт над бязьвіннымі мірнымі жыхарамі.

Пуцін падпісаў закон аб арыштах да 15 «сутак» за адмаўленьне «вырашальнай ролі» СССР «у разгроме нацысцкай Нямеччыны»

Пакараньне для фізычных асобаў — штраф да 2 тысяч рублёў або адміністрацыйны арышт да 15 дзён. Для юрыдычных асобаў — штраф да 50 тысяч рублёў, пры паўторным парушэньні ім пагражае прыпыненьне дзейнасьці на тэрмін да 90 дзён.

Удзел Беларусі ў вайне

Беларусь дазволіла Расеі скарыстаць сваю тэрыторыю для нападаў на Ўкраіну з поўначы; расейцы выкарыстоўваюць беларускія аэрадромы для палётаў і беларускія пляцоўкі для ракетных абстрэлаў гарадоў Украіны. Разам з тым на баку Ўкраіны ў розных злучэньнях ваююць беларусы. Створаны батальён імя Кастуся Каліноўскага.

Расейская тэхніка масава пакідае Беларусь

Тэлеграм-канал «Беларускі Гаюн» паведаміў, што 85% расейскай тэхнікі ўжо вывезена зь Беларусі. Жыхары беларускага Палесься таксама заўважылі, што вайскоўцаў з Расеі ў гарадах усё менш. Жыхары Гомля кажуць, што наогул не заўважаюць цяпер на сваіх вуліцах расейскіх вайскоўцаў.

Як рэагуе сьвет

Аўстралія ўвяла новыя санкцыі супраць Расеі

Аўстралійскі ўрад зацьвердзіў новыя санкцыі 22 красавіка. На гэты раз пад іх трапілі 144 чальцы Савету Фэдэрацыі РФ (з двухсот), Кацярына Ціханава і Марыя Варанцова — іх аўстралійскі ўрад называе дочкамі Ўладзіміра Пуціна (раней санкцыі супраць іх увялі ЗША і Вялікая Брытанія). Пад санкцыі трапіла і дачка кіраўніка МЗС Расеі Сяргея Лаўрова — Кацярына Вінакурава.

Усяго ў аўстралійскім санкцыйным сьпісе ўжо каля 750 расейцаў. Таксама забаронены экспарт у Расею, у прыватнасьці, алюмінію і прадметаў раскошы.

Вялікая Брытанія ўвядзе эмбарга на пастаўкі срэбра і ікры з Расеі і павялічыць мыта на некаторыя беларускія тавары

У рамках новых санкцый, пра якія Вялікая Брытанія паведаміла 21 красавіка, уводзіцца забарона на імпарт з Расеі срэбра, лесаматэрыялаў, ікры і іншай прадукцыі. На шэраг тавараў з Расеі і Беларусі, уключаючы алмазы і каўчук, на 35% павялічаць мыта. Таксама Брытанія ўнесла ў санкцыйныя сьпісы 26 фізычных асобаў і арганізацый з Расеі, у тым ліку — чыноўнікаў Мінабароны і МНС, кіраўніка Расейскай чыгункі, канцэрн «Калашнікаў», ракетна-касьмічны цэнтар «Прагрэс» і інш.

Эстонія і Латвія аднымі зь першых у сьвеце прызналі ваенную агрэсію Расеі генацыдам украінскага народу

Адпаведныя заявы дзяржавы прынялі 21 красавіка. Таксама сёньня Сойм Латвіі прыняў папраўкі ў закон, якія прадугледжваюць магчымасьць пазбаўляць грамадзянства за падтрымку ваенных злачынстваў.

Літва заканадаўча забараніла дэманстрацыю сымбаляў «Z» і «V», а таксама аранжава-чорную стужку

Асобна ў дакумэнце адзначана забарона на аранжава-чорную («георгіеўскую») стужку, літары «Z» і «V». За дэманстрацыю такой сымболікі прадугледжаны штраф у памеры 300–700 эўра, а для юрыдычных асоб ён будзе даходзіць да 1200 эўра. Паўторнае парушэньне пацягне за сабой штраф у памеры 500–900 эўра для фізычных асоб або 800–1500 эўра — для юрыдычных асоб.

Раней сымбалі, якія асацыююцца з расейскімі акупантамі, забаранілі ва Ўкраіне, Малдове і Нямеччыне.

Канада ўвяла новыя санкцыі супраць 14 расейцаў

19 красавіка Канада ўвяла санкцыі супраць старшыні расейскага Цэнтрабанку Эльвіры Набіулінай, бізнэсоўцаў Пятра Авэна і Міхаіла Гуцэрыева, сэнатара Аляксандра Торшына, віялянчэліста Сяргея Ралдугіна, дачок Пуціна Кацярыны Ціханавай і Марыі Варанцовай, а таксама яшчэ семярых расейцаў.