Цяпер цяжка адназначна рабіць высновы аб тым, што ў апошнія дні адбываецца ва ўсходніх і паўднёвых абласьцях Украіны і які бок мае перавага на полі бою, паколькі вайсковае кіраўніцтва абедзьвюх краін выдае вельмі абмежаваную інфармацыю пра баявыя дзеяньні, страты і пазыцыі бакоў.
Свабода сабрала ключавыя паведамленьні Расеі і Ўкраіны аб баявых дзеяньнях.
Расея спрабуе захапіць Харкаў, каб адкрыць шлях на поўдзень
Міністэрства абароны Расеі ў ноч на 11 красавіка паведаміла аб перакідваньні сіл і працягу маршаў на слабажанскім кірунку. Расейскія войскі, паводле афіцыйнага паведамленьня, правялі «манэўраны бой» у раёне Тапольскага Ізюмскага раёну Харкаўскай вобласьці. Пры гэтым Мінабароны Расеі прыводзіць цытату аднаго з камандзіраў танкавай роты Заходняй вайсковай акругі аб задачы «узяць населеныя пункты і забясьпечыць калідор для праходу расейскіх сіл далей на поўдзень». Камандзір расказаў, што калі яны «бралі населены пункт», украінскія жаўнеры нібыта здаваліся адразу, як толькі бачылі расейскую вайсковую тэхніку.
У зводцы Генэральнага штабу Ўзброеных сіл Украіны пра бой каля Тапольскага не паведамляюць. Паводле ўкраінскага штабу, расейцы спрабавалі наступаць у кірунках Даўгенькага і Дзьмітраўкі, але вымушаны былі адступіць на ранейшыя пазыцыі, а сілы 6-й агульнавайсковай арміі і берагавых войскаў паўночнага флёту Расеі працягваюць частковае блякаваньне і абстрэлы Харкава.
Харкаўская абласная адміністрацыя паведаміла, што за апошнія суткі расейскія войскі нанесьлі каля 66 удараў з артылерыі, мінамётаў і ракетных сыстэм. Пацярпелі Салтаўка, Пяціхаткі, Халодная Гара, Пісочын, Залачыў, Балаклія, Дзергачы. Загінулі 11 мірных жыхароў, у тым ліку 7-гадовае дзіця, і 14 атрымалі раненьні.
ГЛЯДЗІЦЕ ТАКСАМА: У Чарнігаве ў выніку абстрэлаў расейскімі войскамі загінулі каля 700 грамадзян, 70 целаў ня могуць апазнацьУ Кіеве кажуць, што расейцы зьнішчылі аэрапорт у Дніпры, а ў Маскве — што ангар з С-300
Міністэрства абароны Расеі сьцьвярджае, што 10 красавіка ракетамі «Калібр» на поўдні Дніпра зьнішчылі ангар з чатырма комплексамі С-300, якія паставіла Кіеву «адна з эўрапейскіх краін».
Насамрэч у Дніпры расейцы цалкам зьнішчылі аэрапорт. Ад расейскіх абстрэлаў загінулі пяць ратавальнікаў. Паводле дарадцы Офісу прэзыдэнту Ўкраіны Аляксея Арастовіча, на Дніпро расейцы скінулі 10 ракет.
У паўднёвым горадзе Мікалаеў, як паведаміў кіраўнік абласной вайсковай адміністрацыі Віталь Кім, абстрэламі расейцы зьнішчылі два пустыя ангары, што належалі замежнаму прадпрыемству. Але расейскае Міністэрства абароны пераконвае, што ў тых ангарах знаходзіліся склады боепрыпасаў.
ГЛЯДЗІЦЕ ТАКСАМА: У Мікалаеве ракетай зруйнавалі будынак абласной адміністрацыі. ФОТАРасейцы ня ведаюць, якія паселішчы бамбяць
У зводках вайсковых ведамстваў Расеі і Ўкраіны незалежна ад напрамкаў, дзе вядуцца баявыя дзеяньні, адзначаюць розныя населеныя пункты.
Міністэрства абароны Расеі заявіла, што ў ноч на 11 красавіка яе паветраныя сілы нанесьлі авіяўдары «па базе рамонту ўзбраеньня і супрацьпаветранай вайсковай тэхнікі ў паселішчы Вялікая Навасёлаўка». Але такога населенага пункту ва Ўкраіне няма. Ёсьць Вялікая Навасёлка ў Данецкай вобласьці. Там ёсьць прыватнае прадпрыемства па рамонце сельгастэхнікі. Само паселішча знаходзіцца за 90 км ад Данецку, а за 18 км ад яго праходзіць аўтадарога Данецк — Запарожжа.
Паводле ўкраінскага Генштабу, на данецкім кірунку расейцы не пакідаюць спробаў узяць пад кантроль населеныя пункты Папаснае, Рубежнае, Ніжняе і Новабахмутаўка. Расейскія сілы спрабавалі штурмаваць Залатое, але беспасьпяхова, як сьцьвярджае ўкраінскі бок.
Генштаб Узброеных сіл Украіны паведаміў, што расейскія войскі працягваюць штурм у раёне заводу «Азоўсталь» і марскога порту Марыюпалю, выкарыстоўваючы артылерыю і авіяцыю.
ГЛЯДЗІЦЕ ТАКСАМА: Украінскі алігарх Ахметаў: Марыюпальскія мэталюргічныя прадпрыемствы ў акупацыі працаваць ня будуцьМарыюпаль — галоўная мішэнь расейцаў
Дарадца Офісу прэзыдэнту Ўкраіны Аляксей Арастовіч у эфіры ўсеўкраінскага тэлемаратону заявіў, што галоўнай задачай украінскай арміі застаецца абарона Марыюпалю.
Паводле яго, на іншых кірунках — Кіеў, Запарожжа, Дніпро, — расейскія сілы ня змогуць весьці актыўных баявых дзеяньняў, паколькі на пачатку вайны Ўкраіна разграміла элітныя расейскія вайсковыя падразьдзяленьні, а цяпер Расея перамясьціла цэнтар сваёй увагі на ўсход і поўдзень.
«Галоўная стаўка (Расеі) — гэта канчаткова ўзяць Марыюпаль і атачэньне нашых войскаў у кірунку з Ізюму (Харкаўская вобласьць) у бок Дніпра і з Валнавахі (Данецкая вобласьць). Па-першае, ім на гэта ня хопіць сіл, а па-другое, пра гэта ведае вайскова-палітычнае кіраўніцтва краіны і робіць пэўныя захады», — патлумачыў Аляксей Арастовіч.
Паводле яго, тое, што Расея хоча і можа — гэта розныя рэчы. «Яны абвяшчаюць „напалеонаўскія пляны“ пра тое, як яны ўсё захопяць і разьдзеляць, але не выходзіць. З вайсковага пункту гледжаньня назапашаныя Расеяй рэзэрвы вельмі слабыя, па якасьці гэтая групоўка нашмат горшая, чым гэта было на пачатку вайны, і ня здольная выканаць такія заданьні», — дадаў дарадца Офісу прэзыдэнту Ўкраіны.
У той жа час Аляксей Арастовіч мяркуе, што Расея можа павялічыць ракетныя абстрэлы ўкраінскіх гарадоў. «Там вельмі шмат ракетнага ўзбраеньня, але на зямлі, я мяркую, мы справімся», — перакананы ён.
ГЛЯДЗІЦЕ ТАКСАМА: Зяленскі ацаніў колькасьць ахвяраў у блякадным Марыюпалі ў дзясяткі тысяч чалавек. 47-ы дзень вайны Расеі супраць УкраіныВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.