«Украіне патрэбна вайсковая дапамога — без абмежаваньняў. Як без абмежаваньняў Расея выкарыстоўвае супраць нас увесь свой арсэнал. Зьнішчае ўсё жывое. Любыя аб’екты — ад дамоў да цэркваў, ад харчовых складоў да ўнівэрсытэтаў, ад мастоў да шпіталяў», — заявіў Уладзімір Зяленскі ў часе выступу на саміце NATO у фармаце відэасувязі.
Прэзыдэнт Украіны дадаў, што на пачатку расейскай агрэсіі ён зьвярнуўся з просьбай зрабіць над Украінай беспалётную зону, а таксама аб перадачы танкаў і самалётаў.
«Украіна зьвярталася да вас па самалёты, каб мы ня страчвалі столькі людзей. Вы маеце тысячы баявых самалётаў, але нам пакуль не далі ніводнага. Мы зьвярталіся па танкі, каб мы маглі разблякаваць нашы гарады, якія цяпер гінуць — Марыюпаль, Бярдзянск, Мелітопаль, іншыя. Гарады, у якіх Расея трымае ў закладніках сотні тысяч людзей і штучна стварае голад — ні вады, ні ежы, нічога», — паведаміў Зяленскі.
«Украіна прасіла адсотак, адзін адсотак ад усіх вашых танкаў! Дайце або прадайце нам. Але мы пакуль ня маем дакладнага адказу. Найстрашнейшае ў час вайны — ня мець дакладных адказаў на просьбы аб дапамозе», — падкрэсьліў прэзыдэнт Украіны.
Уладзімір Зяленскі дадаў, што Расея не зьбіраецца спыняцца на Ўкраіне і ўпэўнены, што ў NATO гэта ўжо разумеюць.
«Украінцы ніколі ня думалі, што Альянс і дзяржавы Альянсу — гэта рознае, што ў пытаньнях жыцьця і сьмерці вы асобна можаце быць сілай, а разам — не; што NATO можа баяцца дзеяньняў Расеі. Я ўпэўнены, што вы ўжо разумееце, што Расея ня мае намеру спыняцца на Ўкраіне. Ня думае і ня будзе. Яна хоча ісьці далей. Супраць усходніх чальцоў NATO, дзяржаў Балтыі, Польшчы — гэта дакладна. Ці перастане тады NATO думаць пра гэта, перажываць, як адрэагуе Расея?» — адзначыў Зяленскі.
Украінскі прэзыдэнт таксама заклікаў альянс больш ніколі не гаварыць пра тое, што армія Ўкраіны не адпавядае стандартам NATO:
«Мы паказалі, на што здольныя нашы стандарты. І як шмат мы можам даць агульнай бясьпецы ў Эўропе і сьвеце, як шмат мы можам зрабіць для абароны ад агрэсіі супраць усяго, што вы шануеце. Але NATO яшчэ належыць паказаць, што Альянс можа зрабіць для выратаваньня людзей. Паказаць, што гэта сапраўды найбольш магутнае абароннае аб’яднаньне ў сьвеце. І сьвет чакае. І Ўкраіна чакае. Чакае рэальных дзеяньняў. Рэальных гарантыяў бясьпекі», — заявіў Уладзімір Зяленскі.
ГЛЯДЗІЦЕ ТАКСАМА: У Брусэлі адкрыўся саміт NATO, па абедзе адкрыюцца яшчэ два — Вялікай сямёркі і Эўразьвязу. Пра што там гавораць ГЛЯДЗІЦЕ ТАКСАМА: «Марадэрства, гвалт, выкраданьні». Зяленскі расказаў парлямэнту Швэцыі пра дзеяньні расейскіх вайскоўцаў ва ЎкраінеВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.