Колькі беларусаў у гарадах, якія атакуе Расея пры дапамозе кіраўніцтва Беларусі

Беларусы — трэцяя колькасьцю нацыянальная група, якая пражывае ва Ўкраіне. Паводле агульнадзяржаўнага перапісу 2001 году (у 2020-м перапіс праводзіўся толькі для ацэнкі колькасьці насельніцтва. — РС), ва Ўкраіне жывуць прадстаўнікі 130 нацыянальнасьцяў.

Найбольш — украінцаў (37 мільёнаў 541 тысяча 700 асобаў) і расейцаў (8 мільёнаў 334 тысячы 100 асобаў).

Свабода сабрала афіцыйныя зьвесткі аб колькасьці беларусаў у рэгіёнах, якія найбольш цярпяць ад авіяўдараў і артылерыйскіх абстрэлаў.

Харкаў і Харкаўская вобласьць

Абстрэлы Харкава пачаліся 24 лютага са зьнішчэньня вайсковай інфраструктуры. Расейскія войскі спрабавалі ўзяць горад у аблогу, каб прарвацца да франтавой лініі ў Данецкай і Луганскай абласьцях і захапіць тыя тэрыторыі, якія не ўваходзяць у гэтак званыя «ЛНР» і «ДНР». Калі горад не ўдалося атачыць, расейцы пачалі бесьперапынна абстрэльваць жылыя кварталы Харкава і ягоных навакольных паселішчаў.

ГЛЯДЗІЦЕ ТАКСАМА: Першы ракетны напад на Львоў; людзі застаюцца ў падвале разбомбленага тэатру ў Марыюпалі. 23-і дзень вайны Расеі супраць Украіны

У Харкаўскай вобласьці на 2001 год жылі 14 тысяч 752 беларусы.

Харкаўскі эканамічны ўнівэрсытэт носіць імя ўраджэнца Пінску Сямёна Кузьняца — амэрыканскага эканаміста, статыстыка, дэмографа і гісторыка эканомікі. У 1971 годзе ён стаў ляўрэатам Нобэлеўскай прэміі ў эканоміцы памяці. У пачатку ХХ стагодзьдзя ён вучыўся ў гэтай навучальнай установе.

Найбольш вядомыя беларусы ў Харкаве: Яўген Грыневіч (у 2000-х зь перапынкамі працаваў у Харкаўскай гарадзкой радзе), Людміла Рубаненка (эканамістка, доўга ўзначальвала фінансава-бюджэтнае ўпраўленьне Харкаўскай гарадзкой рады), Алена Шаўцова (дырэктарка мастацкай школы).

У 2018 годзе ў Харкаве адкрылі мэмарыяльную дошку ў памяць народнага артыста Беларусі Віктара Вуячыча – ён нарадзіўся ў гэтым горадзе.

У 2018 годзе ў Харкаве адкрылі мэмарыяльную дошку ў памяць народнага артыста Беларусі Віктара Вуячыча — ён нарадзіўся ў гэтым горадзе.

Марыюпаль і Данецкая вобласьць

Згодна са статыстыкай 2001 году, у Данецкай вобласьці — 44,5 тысячы беларусаў, у тым ліку 1 399 — у акупаваным Данецку. Невядома, якая колькасьць беларусаў выехала, а якая засталася пасьля таго, як у 2014 годзе там абвясьцілі так званую «народную рэспубліку».

Беларускі амбасадар Ігар Сокал на сустрэчы з мэрам Марыюпалю Вадзімам Бойчанкам абмяркоўвае пастаўкі беларускай тэхнікі

Беларускі амбасадар Ігар Сокал на сустрэчы з мэрам Марыюпалю Вадзімам Бойчанкам абмяркоўвае пастаўкі беларускай тэхнікі. Жнівень 2019 году.

У Марыюпалі, які бамбуюць расейскія войскі і ў якім праз блякаду цяпер няма ні вады, ні цяпла, ні электрычнасьці і разбураная амаль уся інфраструктура і жыльлёвы сэктар, да вайны пражывала 3 858 беларусаў.

Ахтырка і Сумская вобласьць

У Сумскай вобласьці было зарэгістравана 4 320 беларусаў. Найбольшая іхная частка, паводле статыстыкі, сканцэнтравана ў Ахтырцы (500 асобаў) і Ахтырскім раёне (500 асобаў). У Канатопе — 400. Усё гэта эпіцэнтры баявых дзеяньняў.

Таксама па 500 беларусаў пражывалі ў Краснапольскім і Сумскім раёне, а ў Сумах — 400. Адметна, што ў Ахтырцы 100 асобаў назвалі беларускую сваёй роднай мовай, і па 300 — у Ахтырскім і Краснапольскім раёне.

Кіеўская вобласьць

У Кіеўскай вобласьці, паводле статыстыкі, пражывалі 8 698 беларусаў. У тым ліку па 600 — у Ірпяні і Браварах, 4 100 — у Славуцічы (горад, пабудаваны для абслугоўваньня закрытай Чарнобыльскай АЭС), а таксама па 300 беларусаў у Іванкаўскім і Макараўскім раёнах, у якіх адбываюцца баявыя дзеяньні.

Вайна Расеі супраць Украіны

А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.