У сваім звароце Сьвятлана Ціханоўская заявіла, што гэта больш ня ўнутраны канфлікт у Беларусі, а вайна, дзе Беларусь на баку агрэсара, хоць народ супраць.
«Цяпер бараніць трэба ня толькі палітзьняволеных ці новыя выбары. Бараніць трэба самое існаваньне нашай краіны, яе незалежнасьць і сувэрэнітэт. Свабода і адказнасьць заўсёды ідуць побач. І надышоў час кожнаму ўзяць адказнасьць за сваю краіну. Ствараць нацыянальны антываенны рух і рыхтавацца адстойваць свой сувэрэнітэт.
Дарагія ўкраінцы, ад імя нашай краіны я выказваю вам салідарнасьць і падтрымку, а ад імя беларусаў хачу сказаць: нам сорамна за тое, якую ролю тэрыторыя нашай краіны грае ў гэтай вайне. І мы гатовы рабіць усё, што спатрэбіцца, каб спыніць агрэсараў і гэтую катастрофу.
Жыве Беларусь! І Слава Україні!»
Раней Офіс беларускай дэмакратычнай лідэркі правёў экстраны званок, каб падтрымаць беларусаў Украіны. На званку абмяркоўвалі ваенныя дзеяньні ва Ўкраіне і атаку Расеі, паведамілі ў прэс-службе Ціханоўскай.
Офіс рэкамэндаваў выяжджаць з Украіны праз адкрытыя межы, калі ёсьць такая магчымасьць. Прадстаўнікі дыяспары адзначылі, як важна цяпер чытаць толькі правераныя крыніцы інфармацыі.
Таксама Офіс падкрэсьліў, што вайну пачаў Пуцін, Лукашэнка стаў яго саўдзельнікам, але самі беларусы супраць вайны і хочуць яе спыніць.
Таксама паведамляецца, што сёньня Сьвятлана Ціханоўская правядзе прэс-канфэрэнцыю ў Пасольстве Літоўскай Рэспублікі ў Францыі ў пытаньні ўдзелу рэжыму Лукашэнкі ў расейскай агрэсіі супраць Украіны. Брыфінг пачнецца а 13:00 паводле парыскага часу.
«Парушэньне нормаў нацыянальнага і міжнароднага права недапушчальнае»
Сваю пазыцыю наконт рашэньня Пуціна аб пачатку спэцыяльнай ваеннай апэрацыі супраць Украіны агучыла і каманда асуджанага на 14 гадоў пазбаўленьня волі Віктара Бабарыкі.
Паплечнікі экс-банкіра асудзілі акт адкрытай агрэсіі Расеі ў дачыненьні да незалежнай і сувэрэннай дзяржавы Ўкраіна, а таксама спробы ўцягнуць у вайну беларускі народ.
Расея напала на Ўкраіну. Першыя фатаздымкі
«Выказваем падтрымку народу Украіны і ахвярам агрэсіі. Беларусы не жадаюць вайны. Мы разам!» — гаворыцца ў паведамленьні.
Што да падзей на паўднёвым усходзе Ўкраіны, пазыцыя каманды Бабарыкі наступная :
- Парушэньне тэрытарыяльнай цэласнасьці, сувэрэнітэту і гарантый бясьпекі незалежнай дзяржавы ставіць пад пагрозу рэгіянальную бясьпеку, парушае базавыя правы чалавека і адкідае разьвіцьцё чалавечага капіталу на дзясяткі гадоў таму.
- Адзіным магчымым спосабам вырашэньня ўнутраных і замежнапалітычных канфліктаў павінны заставацца прамыя перагаворы і іншыя дыпляматычныя мэтады.
- Парушэньне нормаў нацыянальнага і міжнароднага права недапушчальнае.
«Мяркуем, што бакі канфлікту, зацікаўленыя бакі і міжнародная супольнасьць павінны прыкласьці максымум намаганьняў для дээскаляцыі існай сытуацыі, захаваньня ўзятых на сябе міжнародных абавязаньняў і захаваньні патэнцыялу для разьвіцьця рэгіёну».
ГЛЯДЗІЦЕ ТАКСАМА: «Удзел Беларусі ў вайне з Украінай — гэта катастрофа для Беларусі». Вынікі апытаньня Chatham House«Украіна і ўкраінцы, прабачце беларусам»
Выказаў сваю падтрымку народу Украіны і апазыцыйны палітык Анатоль Лябедзька.
«Украіна і ўкраінцы, прабачце нам за тое, што танкі паехалі з тэрыторыі Беларусі; за тое, што тэрыторыя нашай краіны стала пагрозай для вашай свабоды і незалежнасьці... Але памятайце, большасьць беларусаў з вамі. Лукашэнка — гэта не Беларусь! Слава Украіне! Жыве Беларусь!» — напісаў Лябедзька.
«Уся адказнасьць за гэтае шалёнае рашэньне ляжыць на Пуціну»
Экс-кандыдат на прэзыдэнта, былы палітвязень, каардынатар грамадзянскай кампаніі «Эўрапейская Беларусь» Андрэй Саньнікаў напісаў, што «сёньня ноччу Расея перайшла фатальную рысу і пачала поўнамаштабнае ўварваньне ва Ўкраіну».
«Уся адказнасьць за гэтае шалёнае рашэньне ляжыць на Пуціну. Ні ў кога не павінна быць ніякіх сумневаў: зьдзейсьнена страшнае злачынства супраць чалавецтва. Расея пачала захопніцкую вайну супраць Украіны, багатую на велізарныя ахвяры, у тым ліку сярод мірнага насельніцтва. У гэты цяжкі час хочацца выказаць безумоўную падтрымку беларусаў народу і ўраду Ўкраіны. Сьвет на вашым баку, вы абавязкова пераможаце агрэсара і абароніце сваё права на свабоду і незалежнасьць. Слава Ўкраіне!
Жыве Беларусь!» — напісаў палітык.
Напад Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.