Зь юрыдычнага факультэту БДУ «па сьпісах» звольнілі яшчэ траіх выкладчыкаў

Прафэсары Юлія Гаўрыльчанка і Кірыл Тамашэўскі і старшая выкладчыца Тацяна Аўдзеева больш не выкладаюць на юрыдычным факультэце Беларускага дзяржаўнага ўнівэрсытэту. Яны звольненыя «па сьпісах», піша тэлеграм-канал студэнтаў і выкладчыкаў юрфаку Law Verum.

«На гэты момант вядома пра некалькіх топавых юрыстаў, якія былі вымушаныя пакінуць выкладаньне ў БДУ і сваіх студэнтаў, нават ня ўбачыўшы, як тыя выпускаюцца», — адзначае канал.

• Юлія Гаўрыльчанка — доктар юрыдычных навук, прафэсар катэдры гаспадарчага права, адна з заснавальніц магістратуры па IT-праве;
• Кірыл Тамашэўскі — доктар юрыдычных навук, прафэсар катэдры грамадзянскага працэсу і працоўнага права;
• Тацяна Аўдзеева — старшы выкладчык катэдры грамадзянскага права.

Зьявілася інфармацыя, што звольнены з факультэту і Сяргей Пратасавіцкі — кандыдат юрыдычных навук, дацэнт катэдры грамадзянскага права. Адзін з аўтараў камэнтару да Грамадзянскага кодэксу, які вывучаецца ўсімі студэнтамі-юрыстамі. Аднак затым канал абверг гэтую інфармацыю, паведаміўшы, што інфармацыя аказалася недакладнай.

Гэта ня першыя «чысткі» на факультэце: у 2020-2021 «за палітыку» тут звольнілі як мінімум трох выкладчыкаў: Яраслава Ката, Алену Лаеўскую і Алену Басалай.

Ад пачатку пратэстаў пасьля масавых фальсыфікацыяў на прэзыдэнцкіх выбарах 2020 году ўлады пачалі ціск на ўнівэрсытэцкую супольнасьць. Шэраг выкладчыкаў звольніліся пасьля гутарак з адміністрацыяй і спэцслужбамі, якія завяршыліся падпісаньнем заяваў «пры згодзе бакоў» або празь непадаўжэньне кантракту.

Улады ініцыявалі супраць выкладчыкаў і студэнтаў гучную крымінальную справу, асудзіўшы многіх на турэмнае зьняволеньне. Многія выкладчыкі і студэнты вымушана пакінулі Беларусь. Сілавікі тым часам затрымліваюць выкладчыкаў і студэнтаў нават у аўдыторыях падчас заняткаў.