«Масковія і масквіны». Дэпутаты дзьвюх абласных радаў Украіны заклікалі парлямэнт перайменаваць Расею

«Магчымае сьцьвярджэньне, што назва „Масковія“ можа не адпавядаць міжнароднай назьве дзяржавы, адпрэчваецца афіцыйнай украінскай назвай дзяржавы Bundesrepublik Deutschland — Фэдэратыўная Рэспубліка Нямеччына. Пры гэтым найбольш распаўсюджанай назвай краіны зьяўляецца „Германія“ і яе моўныя формы. Найглыбейшы знаўца маскоўскае душы Ф. Дастаеўскі адзначаў: „Найбольшай сілай Маскоўшчыны было тое, што эўрапейцы ня зналі нас, масквінаў“, — адзначаецца ў звароце.

Дэпутаты перакананыя, што „аднаўленьне гістарычнай справядлівасьці, вяртаньне паўночнаму суседу яго сапраўднай назвы будзе мець істотны ўплыў на грамадзка-палітычныя працэсы ва Ўкраіне і на само разьвіцьцё Ўкраінскай дзяржавы“.

У звароце таксама сьцьвярджаецца:

«Масковія пачала махляваць палітычным перайменаваньнем яшчэ пасьля Пераяслава 1654 году, а пашырыла яго пасьля нашае паразы пад Палтавай 1709 году. Тады яна, не зважаючы ні на якія гістарычныя факты, не пераймаючыся ніякімі падставамі, проста абвясьціла сябе „Россией“, а значыць, спадкаемцай усіх культурных і палітычных набыткаў Русі. А каб наша нацыя лепш зразумела, што менавіта такая зьмена азначае палітычна, масквін назваў сябе „великорусским“, а ўкраінца — „малорусским“. І гэты прынцып „велико-мало“ стаў зьместам усіх маскоўска-украінскіх дачыненьняў з таго часу і дагэтуль. А калі эўрапейскія ўрады старым звычаем адрасавалі ліст у Масковію, маскоўскаму ўраду, то масквіны вярталі іх назад з пазнакай, што такой „не существует“, а ёсьць толькі „Россия“ і „российский“. Так азіяты-масквіны сталі „русскими“, а мангольская Масковія — „Россией“. Як доказ, дагэтуль немагчыма знайсьці ніводнай мапы Эўропы ці сьвету, на якой тэрыторыя Масковіі называлася неяк інакш, у прыватнасьці, Расеяй».

З такой ініцыятывай першымі выступілі дэпутаты Ровенскай абласной рады, а два дні таму іх падтрымалі дэпутаты Львоўскай абласной рады. Яны мяркуюць, што назва Масковія мае выкарыстоўвацца на дзяржаўным, дыпляматычным і афіцыйна-спраўным узроўні.

23 сьнежня прэзыдэнт Расеі Ўладзімір Пуцін заявіў, што «Ўкраіну стварыў Уладзімір Ільліч Ленін» і што прэзыдэнт Украіны Ўладзімір Зяленскі «пасьля абраньня падпаў пад уплыў радыкальных элемэнтаў, якіх ва Ўкраіне называюць нацыкамі».