Міністэрства транспарту Літвы падрыхтавала законапраект аб забароне транзыту зь Беларусі

Паводле зьвестак агенцтва BNS, рэалізацыя гэтай меры зробіць немагчымым транзыт угнаеньняў кампаніі «Беларуськалій» праз тэрыторыю Літвы.

Паводле ТАСС, Міністэрства транспарту і камунікацый Літвы падрыхтавала законапраект, які забараняе транзыт тавараў зь Беларусі.

Паводле яго інфармацыі, у законапраекце, які ведамства зарэгістравала 10 сьнежня, зьмяшчаецца прапанова ўраду і Сэйму Літвы накласьці санкцыі на імпартаваную зь Беларусі прадукцыю, якая закупляецца непасрэдна або пастаўляецца з гэтай краіны ўскосна. Рэалізацыя такой меры прадухіліць транзыт угнаеньняў беларускай кампаніі «Беларуськалій» праз тэрыторыю Літвы, гаворыцца ў паведамленьні.

ГЛЯДЗІЦЕ ТАКСАМА: Міністар транспарту Літвы падаў у адстаўку праз скандал зь «Беларуськаліем» сьледам за кіраўніком МЗС

«Угоды, заключаныя да ўвядзеньня санкцый у Літве, неадкладна павінны быць скасаваныя ў аднабаковым парадку або пры згодзе бакоў, або іх выкананьне мусіць быць спынена на час дзеяньня санкцый, — гаворыцца ў тлумачальнай запісцы да законапраекту. — Забараняецца заключаць пагадненьні, рэалізацыя якіх супярэчыла б дзейным у Літве санкцыям».

ГЛЯДЗІЦЕ ТАКСАМА: Кіраўнік МЗС Літвы заявіў пра магчымую адстаўку ў сувязі са скандалам вакол транзыту «Беларуськалію»

Як сьцьвярджае Міністэрства транспарту і камунікацый Літвы, законапраект накіраваны на гарантаваньне інтарэсаў бясьпекі, якія парушаюцца Беларусьсю з дапамогай гібрыднай агрэсіі. Раней у панядзелак міністар камунікацый і транспарту Літвы Марус Скуодзіс паведаміў, што падаў прэм’ер-міністру Інгрыдзе Шыманіце заяву аб адстаўцы з прычыны сытуацыі вакол транзыту ўгнаеньняў беларускай кампаніі «Беларуськалій».

9 жніўня ЗША ўвялі санкцыі супраць дзясяткаў беларускіх кампаній, уключаючы ААТ «Беларуськалій», якія набылі моц 8 сьнежня. Аднак літоўская дзяржаўная кампанія Lietuvos geležinkeliai (LG) заяўляла 8 сьнежня, што грузы «Беларуськалію» будуць праходзіць празь Літву да студзеня. Гэта азначае, што, як і раней, праз тэрыторыю Літвы будуць праходзіць па шэсць-дзевяць саставаў за суткі. Паводле дамовы з LG беларускі бок ужо загадзя разьлічыўся за правоз гэтых грузаў.

Што варта ведаць пра санкцыі ЗША

Першыя санкцыі, якія ўвяла адміністрацыя прэзыдэнта Джорджа Буша пасьля прэзыдэнцкіх выбараў у Беларусі ў 2006 годзе, прадугледжвалі блякаваньне ўласнасьці і актываў групы высокіх чыноўнікаў, уключна з Аляксандрам Лукашэнкам. Санкцыі распаўсюджваліся таксама і на сем’і гэтых чыноўнікаў. Ім таксама забаранілі ўезд на тэрыторыю ЗША.

Пазьней асобам, у тым ліку і новым, якія папоўнілі сьпісы, забаранілі мець актывы на тэрыторыі ЗША і весьці бізнэс з амэрыканскімі партнэрамі.

Пасьля прэзыдэнцкіх выбараў у Беларусі напрыканцы 2010 году ЗША пашырылі сьпіс беларускіх чыноўнікаў, якім забаронены ўезд у ЗША. Акрамя таго, грамадзянам ЗША забаранілі весьці бізнэс зь дзяржаўным канцэрнам «Белнафтахім» і шэрагам іншых прадпрыемстваў. Гэтак Злучаныя Штаты адрэагавалі на рэпрэсіі пасьля выбараў, у тым ліку на зьняволеньне шэрагу кандыдатаў у прэзыдэнты.

Пра якія беларускія прадпрыемствы ідзе гаворка

«Белнафтахім»,
«Белнафтахім ЗША»,
«Нафтан»,
«Беларускі нафтавы гандлёвы дом»,
«Белшына»,
«Гродна Азот»,
«Гроднахімвалакно»,
ААТ «Лякафарба»,
ААТ «Полацак-Шкловалакно».

Прадпрыемствам i грамадзянам ЗША было забаронена ўступаць у эканамічныя і фінансавыя дачыненьні з гэтымі арганізацыямі, а ўся іх маёмасьць і рахункі, якія знаходзяцца на тэрыторыі ЗША, былі замарожаныя. Да таго ж многія краіны і кампаніі адмаўляюцца працаваць з прадпрыемствамі, якія знаходзяцца пад санкцыямі ЗША.

У кастрычніку 2015 году Міністэрства фінансаў ЗША прыпыніла санкцыі супраць гэтых дзевяці беларускіх прадпрыемстваў у сувязі з «пэўным прагрэсам у сфэры дэмакратыі і правоў чалавека», а таксама з мэтай падтрымкі незалежнасьці і сувэрэнітэту Беларусі.
Пасьля прэзыдэнцкіх выбараў у Беларусі ў жніўні 2020 году і рэпрэсій, якія адбыліся пасьля іх, ЗША аднавілі санкцыі ад 3 чэрвеня 2021 году. Адпаведнае рашэньне 19 красавіка 2021 году апублікавала Міністэрства фінансаў ЗША. Злучаныя Штаты дабіваюцца вызваленьня ўсіх палітвязьняў.