Deutsche Welle нагадвае, што за час палітычнага крызісу пасьля прэзыдэнцкіх выбараў у жніўні 2020 году ўлады плянамерна аказваюць ціск на незалежныя мэдыя. Журналістаў затрымліваюць, заводзяць крымінальныя справы, блякуюць сайты СМІ, канфіскуюць тэхніку. Цяпер у турме 28 прадстаўнікоў мэдыя, зь іх трое — галоўныя рэдактары.
Марына Золатава на пазытыве
Галоўную рэдактарку найбуйнейшага навінавага рэсурсу краіны Tut.by Марыну Золатаву арыштавалі 18 траўня. У гэты дзень сілавікі прыйшлі зь ператрусам у рэдакцыю і да супрацоўнікаў, заблякавалі сайт і фактычна зьнішчылі партал. Яе і яшчэ 14 калег абвінавачваюць ва ўхіленьні ад сплаты падаткаў, а журналісцкую прадукцыю прызналі «экстрэмісцкай».
ГЛЯДЗІЦЕ ТАКСАМА: Марына Золатава з СІЗА: «Прызнаць Tut.by экстрэмісцкім — значыць зьнішчыць 20-гадовы архіў беларускай гісторыі»Як расказаў яе муж Васіль Кішкурна, лісты з турмы даходзяць даволі хутка: яны пазытыўныя, сьветлыя, добрыя і напоўненыя цеплынёй.
Цытаты праз краты. Спэцыяльны праект. Марына Золатава.
«Жыва цікавіцца, як дзеці, давала ўказаньні дачцэ з нагоды паступленьня ва ўнівэрсытэт. Высока ацаніла намаганьні каманды, якая працягвае справу ў выглядзе новага праекту Zerkalo.io. Адчувае падтрымку з боку сям’і, калег і знаёмых — атрымлівае шмат лістоў», — дзеліцца Васіль Кішкурна.
Ягор Марціновіч трымаецца бадзёра
Галоўнага рэдактара газэты «Наша Ніва» Ягора Марціновіча затрымалі ў ліпені на падставе падазрэньняў у «зьдзяйсьненьні групавых дзеяньняў, якія парушаюць грамадзкі парадак». Але абвінавачаньне выстаўлена згодна з ч. 2 арт. 216 КК: нанясеньне маёмаснай шкоды без прыкметаў крадзяжу групай асобаў. Прэтэнзіі сілавікоў зьвязаныя з аплатай камунальных паслуг офісу.
ГЛЯДЗІЦЕ ТАКСАМА: Галоўнаму рэдактару «Нашай Нівы» адмовілі ў спатканьні са сваякамі, хадайніцтва аб зьмене меры стрыманьня адхіліліЯгоная жонка Адар’я Гуштын, таксама журналістка, нагадвае, што хутка міне два месяцы зьняволеньня, але ніякіх сьледчых дзеяньняў не праводзіцца. Стандартная практыка палітычнага перасьледу, удакладняе яна.
Зьняволены галоўны рэдактар «Нашай нівы» Ягор Марціновіч.
«Знаходзіцца ў турме Ягору, як чалавеку актыўнаму, досыць складана. Пры гэтым ён стараецца трымацца бадзёра, такі па натуры: калі яму цяжка, пра тое ня скажа, будзе нас усіх аберагаць. Адказвае на ўсе лісты, якія атрымлівае, але мы ведаем, што ня ўсе яму перадаюць, гэта таксама форма ціску», — гаворыць Адар’я Гуштын.
Ірына Леўшына не дае паказаньняў
Галоўную рэдактарку агенцтва БелаПАН Ірыну Леўшыну затрымалі 18 жніўня. Спачатку праз падазрэньне ў «падрыхтоўцы дзеяньняў, што груба парушаюць грамадзкі парадак», а празь некалькі тыдняў выставілі абвінавачаньне на падставе артыкулу аб ухіленьні ад выплаты падаткаў.
ГЛЯДЗІЦЕ ТАКСАМА: Журналістаў-палітвязьняў Ірыну Леўшыну і Дзьмітрыя Наважылава перавялі ў СІЗА на ВаладарскагаДля яе дачкі Ганны Леўшыной гэта не было нечаканасьцю, бо да таго ўлады расправіліся практычна з усімі незалежнымі СМІ. Кажа, што не панікавала, маці пасьля ператрусу яшчэ пасьпела даць апошнія ўказаньні. Зь менскага ізалятару № 1 пакуль дайшоў толькі адзін ліст журналісткі.
«Са слоў адваката, яна адчувае сябе добра. Ніякіх сьледчых дзеяньняў не праходзіць, таму што мама не дае паказаньняў. У яе добрыя суседзі, гэта на сёньня галоўнае. Вучыцца мець зносіны з рознымі катэгорыямі людзей. Яшчэ піша, што па раніцах гарлапаняць чайкі, якія прылятаюць са Сьвіслачы і, напэўна, міма нашага дому. Гэта грэе душу», — цытуе дачка ліст ад мамы.
Усіх зьняволеных рэдактараў і супрацоўнікаў незалежных СМІ праваабаронцы прызналі палітычнымі вязьнямі.