ГЛЯДЗІЦЕ ТАКСАМА: Вярхоўны суд пакараў Віктара Бабарыку 14 гадамі пазбаўленьня волі. Ён ня мае права абскарджваць
«Вясна»: «Сьледзтва і суд у гэтай справе адбываліся зь вельмі грубымі парушэньнямі»
Сябра рады Праваабарончага цэнтру «Вясна» Валянцін Стэфановіч выказаў пазыцыю арганізацыі наконт агучанага Віктару Бабарыку прысуду. Ён заявіў, што сьледзтва і суд у гэтай справе адбываліся зь вельмі грубымі парушэньнямі прынцыпаў справядлівага судовага разбору.
«Гэты несправядлівы і жорсткі прысуд яшчэ больш замацаваў нашую перакананасьць у выключна палітычна матываваным перасьледзе Віктара Бабарыкі. Сутнасьць — перасьлед за рэалізацыю права на кіраваньне сваёй краінай праз удзел у свабодных і дэмакратычных выбарах, якія праводзяцца на рэгулярнай аснове».
Стэфановіч падкрэсьліў, што праваабаронцы, як і раней, патрабуюць ад уладаў Беларусі неадкладнага вызваленьня Віктара Бабарыкі, сябраў ягонай ініцыятыўнай групы і выбарчага штабу.
ГЛЯДЗІЦЕ ТАКСАМА: «Рэальны канкурэнт». 5 цытат Віктара Бабарыкі з залі судуСьвятлана Ціханоўская: «Ад нас з вамі залежыць, ці ператворыцца гэты год у 14 гадоў»
Сьвятлана Ціханоўская назвала турэмны тэрмін Бабарыку «вар’яцкім». Яна лічыць, што былому кіраўніку «Белгазпрамбанку» і прэтэндэнту ў кандыдаты на прэзыдэнцкіх выбарах 2020 году вынесьлі прысуд «за веру ў ідэю».
«Аднойчы нам будзе складана растлумачыць сваім унукам, што гэта сапраўды адбывалася. Але Віктар казаў, што краіне патрэбен добры мэнэджар, — і я ведаю, што надыдзе час, калі такі мэнэджар дапаможа нам з вамі адбудаваць краіну».
Ціханоўская лічыць, што доўгія турэмныя тэрміны даюцца, каб забіць у беларусаў любыя іншыя думкі, хоць аддалена падобныя да веры і надзеі.
«Але для Віктара — як і для тысяч невінаватых людзей у турмах — надзвычай каштоўная надзея ў нашых сэрцах. Дзеля гэтай надзеі ён не пайшоў на пагадненьне з рэжымам. І ён па-ранейшаму верыць у нас. Але ці верым мы ў сябе самі? Віктар Бабарыка ўжо больш за год у турме. І толькі ад нас з вамі залежыць, ці ператворыцца гэты год у 14 гадоў».
ГЛЯДЗІЦЕ ТАКСАМА: Што трэба ведаць пра справу Віктара Бабарыкі і «Белгазпрамбанку»Амбасада ЗША: «Рэжым Лукашэнкі ня спыніцца ні перад чым, каб утрымаць уладу»
Амбасада Злучаных Штатаў у Менску назвала прысуд суворым і сфабрыкаваным.
«Рэжым Лукашэнкі ня спыніцца ні перад чым, каб утрымаць уладу» — паведамілі амэрыканскія дыпляматы.
Перасьлед Віктара Бабарыкі. Што важна ведаць
- Віктара Бабарыку абвінавацілі ў «адмываньні» сродкаў, атрыманых злачынным шляхам (па частцы 2 арт. 235 КК), і атрыманьні хабару ў асабліва буйным памеры (па частцы 3 арт. 430 КК).
- У крымінальнай справе «Белгазпрамбанку» 122 тамы. Справу разглядаў Вярхоўны суд у будынку суду Маскоўскага раёну.
- 22 сакавіка абарона Бабарыкі заявіла пярэчаньні на прад’яўленыя абвінавачаньні, бо апісаньне, якое ёсьць у іх, не дазваляла ў дастатковай ступені зразумець, у якіх менавіта дзеяньнях абвінавачанага Бабарыкі ўгледзілі злачынства, заявіў адвакат Дзьмітры Лаеўскі. Таксама ён адзначыў, што ў абвінавачаньні няма апісаньня інкрымінаваных дзеяньняў з указаньнем часу, месца, спосабу, іншых абставінаў іх учыненьня. Адвакат папрасіў далучыць да матэрыялаў справы дакумэнт, у якім выклаў «дэфэкты абвінавачаньня».
- Віктар Бабарыка віны не прызнае.
Хроніка перасьледу
- 10 чэрвеня Аляксандар Лукашэнка даручыў заняцца праверкамі прыватных кампаніяў, якія нібыта звальняюць тых, хто адмаўляецца ставіць подпісы за вылучэньне альтэрнатыўных кандыдатаў. Ён загадаў «прашарсьціць гэтых пузатых буржуяў, каб яны несьлі адказнасьць за людзей».
- 11 чэрвеня ў «Белгазпрамбанку» і шэрагу іншых кампаній, у знаёмых патэнцыйнага кандыдата ў прэзыдэнты Віктара Бабарыкі прайшлі ператрусы. Камітэт дзяржкантролю заявіў аб завядзеньні крымінальных спраў за адмываньне грошай і ўхіленьне ад выплаты падаткаў у асабліва буйным памеры.
- Віктар Бабарыка назваў гэта атакай на яго асабіста, хоць сам у справе тады не фігураваў, і заявіў пра «палітычны характар» дзеяньняў сьледчых, якія ня маюць прамога кампрамату на яго.
- 11 чэрвеня арыштавалі каардынатарку выбарчага штабу Бабарыкі Сьвятлану Купрэеву па абвінавачаньні ва ўхіленьні ад выплаты падаткаў у асабліва буйным памеры.
- 12 чэрвеня Лукашэнка заявіў, што Бабарыка таксама датычны да справы, маўляў, «гэта адна шайка-лейка». Праз 4 гадзіны Дзяржкантроль заявіў, што мае доказы датычнасьці былога банкіра да злачынстваў.
- Фігурантамі «справы „Белгазпрамбанку“» сталі каля 20 чалавек.
- 15 чэрвеня Нацыянальны банк прызначыў у «Белгазпрамбанку» часовую адміністрацыю на чале з Надзеяй Ермаковай. Расейскія акцыянэры банку («Газпромбанк» і «Газпром») назвалі гэтае рашэньне незаконным.
- 17 чэрвеня ўлады арыштавалі без тлумачэньняў выбарчы фонд Віктара Бабарыкі з 100 тысячамі рублёў на рахунку.
- 18 чэрвеня затрымалі Віктара Бабарыку і яго сына Эдуарда Бабарыку — кіраўніка ініцыятыўнай групы. У дамах сям’і Бабарыкаў прайшлі ператрусы.
- Кіраўнік КДК Іван Тэртэль назваў Бабарыку «непасрэдным арганізатарам» «махлярскай схемы з адмываньнем грошай» з удзелам былых і дзейных топ-мэнэджараў «Белгазпрамбанку».
- 19 чэрвеня праваабаронцы прызналі палітвязьнямі Віктара, Эдуарда Бабарыкаў і затрыманых сябраў ініцыятыўнай групы.
- Штаб Бабарыкі падрыхтаваў да здачы 435 тысяч подпісаў.
- 20 чэрвеня адвакаты падалі пакет дакумэнтаў для рэгістрацыі Віктара Бабарыкі кандыдатам у прэзыдэнты.
- 2 ліпеня стала вядома, што Бабарыку вінавацяць па трох фінансавых артыкулах Крымінальнага кодэксу.
- 14 ліпеня ЦВК адмовіў Віктару Бабарыку ў рэгістрацыі празь неадпаведнасьць прадстаўленай дэклярацыі аб даходах і маёмасьці.
- 10 кастрычніка Лукашэнка сустрэўся зь Віктарам Бабарыкам і іншымі палітвязьнямі ў СІЗА КДБ.
- 17 лютага 2021 году пачаўся суд над Віктарам Бабарыкам і былымі супрацоўнікамі «Белгазпрамбанку». На працэс не пусьцілі нікога зь незалежных журналістаў.
- 6 ліпеня Бабарыку асудзілі на 14 гадоў пазбаўленьня волі. Вырак вынес судзьдзя Ігар Любавіцкі. Бабарыка не прызнаў віны, ягоныя абаронцы яшчэ раз заявілі аб палітычных матывах справы.
- 12 ліпеня стала вядома, што Бабарыку этапавалі ў ПК №1 у г. Наваполацак.
- 12 кастрычніка з ізалятараў выйшлі некалькі чалавек, затрыманых у справе «Белгазпрамбанку». Ім зьмянілі меру стрыманьня, але іншыя падрабязнасьці справы невядомыя.
- У кастрычніку 2023 году арганізацыя былых сілавікоў BelPol паведамляла, што Віктар Бабарыка ў калёніі мае праблемы з сэрцам. Паводле інфармацыі арганізацыі, Бабарыку нанесьлі «сур’ёзныя цялесныя пашкоджаньні», прычым зрабілі гэта людзі, якія не адносяцца да пэрсаналу наваполацкай калёніі, дзе той сядзіць.