Суды і выракі 30 чэрвеня: 3 гады калёніі за спробу абараніць маці ад АМАПу, 2,5 гады «хіміі» за абразу сілавікоў

Хацеў абараніць маці — атрымаў тры гады калёніі

У Гомлі пакаралі пазбаўленьнем волі на 3 гады Сяргея Дзецука. У сакавіку АМАП уварваўся ў кватэру, дзе ён жыве з маці, і груба абыходзіўся з 66-гадовай жанчынай, былой выкладчыцай БелДУТ. Сын спрабаваў абараніць маці і трапіў пад крымінальны артыкул.

66-гадовую Валерыю Дзецук у сакавіку абвінавацілі ў «несанкцыянаваным масавым мерапрыемстве» — пікеце ў лесе. Ранкам 6 сакавіка ў кватэру кандыдаткі хімічных навук, былой выкладчыцы ўнівэрсытэту, уварваўся АМАП. Назаўтра сын расказаў Свабодзе, што з маці жорстка абыходзіліся, стукнулі яе, забралі і завезьлі на ІЧУ. Ён канфліктаваў з міліцыяй, калі маці затрымлівалі, і пазьней сам трапіў у СІЗА. Сяргея абвінавацілі ў гвалце над міліцыяй (артыкул 364 Крымінальнага кодэксу). 30 чэрвеня суд пакараў яго пазбаўленьнем волі на 3 гады.

Сергею Дзецуку — 35 гадоў.

Прысуд за абразу міліцыянтаў: 2 гады 6 месяцаў «хіміі» за абразу трох сілавікоў

У Магілёве 30-гадовага жыхара Бялынічаў Расьціслава Кушнярова асудзілі на 2 з паловай гады «хіміі» за абразьлівыя камэнтары пра трох міліцыянтаў. Апрача таго, ён мае выплаціць сілавікам па 1 тысячы рублёў кампэнсацыі маральнай шкоды.

Падсуднаму інкрымінавалі «публічную зьнявагу прадстаўніка ўлады ў сувязі з выкананьнем ім службовых абавязкаў» (369 артыкул КК). Сваю віну ён прызнаў цалкам, на працэсе заявіў, што раскаяўся ва ўчыненым і ў судовай залі папрасіў прабачэньня перад пацярпелымі міліцыянтамі.

Крымінальную справу супраць Кушнярова разглядалі ў судзе Ленінскага раёну пад старшынствам судзьдзі Алены Літвіной. Дзяржаўнае абвінавачваньне прадстаўляла Алена Ісакава з магілёўскай пракуратуры. Падсудны бараніў сябе сам.

Што зрабіў падсудны

Паводле абвінавачаньня, падсудны летась у лістападзе ды сьнежні, быўшы ў Маскве, пакінуў у тэлеграм-канале, які ад 21 сакавіка 2021 году лічыцца экстрэмісцкім, абразьлівыя камэнтары пад фатаздымкамі з асабістымі зьвесткамі міліцыянтаў. У допісе да публікацыяў гаварылася, што гэтыя супрацоўнікі «ўдзельнічалі ў разгонах мірных дэманстрантаў ды давалі лжывыя сьведчаньні ў судах».

Абвінавачаньне настойвала, што ў камэнтарах Кушнярова была дапушчана ў «непрыстойнай форме нэгатыўная ацэнка супрацоўнікаў унутраных справаў». Сваімі выказваньнямі ён «меў намер публічна зьняважыць прадстаўніка ўлады» дзеля «падрыву аўтарытэта дзяржаўнай улады», а таксама прыніжэньня гонару і годнасьці супрацоўнікаў міліцыі ў сувязі з выкананьнем імі службовых абавязкаў.

Камэнтары Кушнярова прызнала зьняважлівымі лінгвістычная камісія.

Прадстаўніца дзяржаўнага абвінавачаньня прасіла суд пакараць Кушнярова трыма гадамі абмежаваньня волі ў папраўчай установе адкрытага тыпу, а таксама ў поўным аб’ёме задаволіць пазоўныя патрабаваньні пацярпелых. Кожны зь іх ацаніў маральныя пакуты ад камэнтароў абвінавачанага ў 1 тысячу рублёў. Гэтыя сродкі яны зьбіраюцца аддаць на дабрачыннасьць.

Пазыцыя абвінавачанага

Пра тое, што жыхар райцэнтру трапіў пад крымінальны перасьлед за зьняважлівае выказваньне пра супрацоўніка магілёўскага АМАП, стала вядома ў сакавіку з паведамленьня прэсавага сакратара МУС Вольгі Чамаданавай. На відэа затрыманы мужчына, імя якога не называецца, кажа, што «лепей бы гэтага не пісаў і нікому не рэкамэндую пісаць».

У судзе Кушняроў прызнаў, што ня ведаў ніводнага з пацярпелых і не валодаў дакладнымі зьвесткамі пра іхную супрацьпраўную дзейнасьць, а ў сваіх меркаваньнях аб сілавіках абапіраўся на матэрыялы, прагледжаныя ў сацыяльных сетках. Мужчына пагадзіўся з пазыцыяй пракурора, што сваімі камэнтарамі «беспадстаўна даваў нэгатыўную ацэнку міліцыянтам», аднак, выказаў сумнеў, што «ананімны тэлеграм-канал можа падарваць бясьпеку краіны».

На ягоную думку, міліцыянты мусяць быць псыхалягічна ўстойлівымі да зьняваг, бо іх да гэтага рыхтуюць і «яны праходзяць тысячы тэстаў». Разам з тым свае камэнтары Кушняроў назваў дурнотаю, паабяцаў далей сачыць за сабою і не зьневажаць людзей.

Што казалі пацярпелыя

Як вынікала з паказаньняў пацярпелых, яны даведаліся пра зьняважлівыя камэнтары ў тэлеграм-канале, у тым ліку выказваньні Кушнярова, ад калег па службе. Міліцыянты настойвалі, што ня ўдзельнічалі ў супрацьпраўных дзеяньнях, а выконвалі свае службовыя абавязкі.

Па словах міліцыянтаў, зьяўленьне зьняважлівых камэнтароў было ўспрынята імі «балюча» і стварала псыхалягічны дыскамфорт. Яны, казаў адзін з пацярпелых, абмяркоўваліся роднымі.

1,5 года «хатняй хіміі» за камэнтар у «Аднаклясьніках»

29 чэрвеня ў судзе Бярозаўскага раёну асудзілі Тацяну Дзямідчык, якую вінавацілі ў абразе прадстаўніка ўлады паводле арт. 369 Крымінальнага кодэксу. Справу вяла судзьдзя Алена Нямкова, дзяржаўнае абвінавачаньне прадстаўляў пракурор Дзьмітры Яфімаў.

Пацярпелым у справе праходзіў маёр міліцыі з Драгічынскага РАУС Юры Чарнышкоў, які плянуе прасіць суд прыцягнуць да адказнасьці 97 аўтараў камэнтароў пад допісам у «Аднаклясьніках», з-за якога пачалася і гэтая справа.

Пад фота Чарнышкова ў сацыяльнай сетцы Дзямідчык напісала «Маму шкада, вырадка нарадзіла». Згодна з ацэнкай экспэрта, камэнтар утрымліваў нэгатыўную ацэнку супрацоўніка міліцыі. Абвінавачаная віну прызнала. Суду патлумачыла, што знаходзілася дома, дзе даглядае за хворым сьвёкрам, пабачыла ў аднаклясьніках інфармацыю, што Юры Чарнышкоў зьбіваў дзяўчыну, а пасьля здаў яе АМАПу, пад эмоцыямі пакінула камэнтар.

На пытаньне пракурора, чаму жанчына разьмясьціла камэнтар, калі ўсьведамляла, што ён абразьлівы, Тацяна Дзямідчык адказала:

«Эмоцыі сыгралі, быў такі час! Паказвалі ўсё і паўсюль — бязладзьдзе, паводзіны міліцыянтаў».

Міліцыянт Чарнышкоў запярэчыў інфармацыю, апублікаваную пра яго ў інтэрнэце, заявіўшы, што ніякай дзяўчыны не зьбіваў, а затрымліваў 10 жніўня ў Драгічыне толькі дваіх хлопцаў.

Пад фота з выявай Чарнышкова беларусы пакінулі 97 камэнтароў, усіх вінаватых ён зьбіраецца знайсьці і прыцягнуць да адказнасьці. Суд над Тацянай Дзямідчык — ужо пяты працэс, дзе міліцыянт Чарнышкоў праходзіць пацярпелым. Пры гэтым суды ён называе «болем», які ён, аднак, «вымушаны працягваць».

Прысуд Дзямідчык — 1,5 года «хатняй хіміі». Акрамя таго, жанчына павінна выплаціць кампэнсацыю міліцыянту ў памеры 1500 рублёў. Заробак жанчыны пры гэтым складае толькі 250 рублёў штомесяц.