Лукашэнка ўпершыню выказаўся пра пажар касьцёла ў Будславе і збор грошай на рэстаўрацыю

«Ня варта сьпяшацца, нават адмыслоўцы кажуць. Спэцыялісты хай вызначацца, абсьледуюць. Без дзяржавы яны нічога не зробяць усё роўна. Але гэтыя „неверагодныя“ зноў кажуць: грошы зьбярэм. Ветэранам ужо „сабралі“. Ня ведаю толькі, дзе грошы. І тут кажуць: зьбярэм. Нічога яны не зьбяруць, проста людзям абвесьцяць, забяруць і падзеляць у Польшчы. Таму калі нехта хоча аднавіць гэты храм, няхай яны адкрыюць рахунак, і хай ім перадаюць, а не ў Польшчу. Кожны чалавек, колькі зможа, калі захоча».

Лукашэнка мяркуе, што пры аднаўленьні Будслаўскага храму не спатрэбіцца «шалёных аб’ёмаў» работ, перадае БелТА.

«Дах адновім, ўнутры прывядзем у парадак. Калі спэцыялісты зробяць выснову, што і як, потым даложыш», — зьвярнуўся ён да старшыні Менскага аблвыканкаму Аляксандра Турчынава.

Інфармацыя аб пажары ў Нацыянальным санктуарыі Маці Божай Будслаўскай паступіла ратавальнікам 11 траўня а 7.47. На момант узгараньня парафіян у храме не было. Лякалізацыя ўскладнялася тым, што гарэлі драўляныя канструкцыі ў схаваных пустэчах паміж элемэнтамі перакрыцьця. Па факце ўзгараньня пачатая крымінальная справа.

На наступны дзень у Менску адбылася экстранная нарада, на якой абмяркоўваліся наступствы надзавычайнага здарэньня. Пры курыі Менска-Магілёўскай архідыяцэзіі была створана камісія ў справе аднаўленьня касьцёлу.

За першыя двое сутак пасьля пажару беларусысабралі на аднаўленьне сьвятыні 170 тысяч рублёў.

Раней Лукашэнка адрэагаваў на заклік ініцыятывы BYSOL сабраць грошы вэтэранам. Лукашэнка ў адказ на гэта 7 траўня заявіў:

«Ня трэба зьбіраць грошы нашым вэтэранам. Ад іх яны грошы ня возьмуць: гэта крывавыя грошы».

Да выступленьня Лукашэнкі пра аднаразовыя выплаты вэтэранам да Дня Перамогі не было вядома. 6 траўня прадстаўнік Міністэрства працы і сацыяльнай абароны заявіў, што вэтэраны Вялікай Айчыннай вайны сёлета аднаразовых выплат не атрымаюць.