Судзьдзя Яўген Брэган прысудзіў:
- Сяргею Маўшуку і Алянсандру Цярэшку — 6 з паловай гадоў калёніі ўзмоцненага рэжыму.
- Раману Багнаўцу, Даніілу Богнату, Рыгору Гунько, Сяргею Ляжэнку, Станіславу Міхайлаву, Вячаславу Рагашчуку, Ігару Салаўю, Артуру Халімончыку — 6 гадоў калёніі ўзмоцненага рэжыму.
- Шматдзетнай маці Алене Маўшук — 6 гадоў калёніі агульнага рэжыму.
- Дэвіду Масьціцкаму, Алегу Рубцу, Вячаславу Шэлямету — 5 з паловай гадоў калёніі ўзмоцненага рэжыму.
Раней такія ж самыя тэрміны для абвінавачаных запатрабаваў пракурор.
Судзьдзя таксама пастанавіў спагнаць з усіх асуджаных агулам 530 тысяч рублёў кампэнсацыі.
Сяргей Маўшук, які да выраку быў пад хатнім арыштам, з бацькам перад вынясеньнем прысуду
Суды над над 14 пінскімі палітвязьнямі працягваліся з 23 сакавіка. У ходзе судовых паседжаньняў віну прызналі Артур Халімончык і Сяргей Ляжэнка. Цалкам не прызналі — Ігар Салавей, Станіслаў Міхайлаў, Данііл Богнат, Аляксандар Цярэшка. Астатнія абвінавачаныя прызналі віну часткова.
ГЛЯДЗІЦЕ ТАКСАМА: «Адкрыць агонь!» і пагроза вялікіх тэрмінаў. Асноўныя пытаньні да рэзананснай «пінскай справы»У чым абвінавацілі фігурантаў
- Ва ўдзеле ў несанкцыянаванай масавай акцыі,
- закліках дэмантаваць тратуарную плітку,
- закліках «біць сілавікоў»,
- пашкоджаньні маёмасьці,
- кіданьні камянёў, фрагмэнтаў тратуарнай пліткі, палак, бутэлек,
- ударах па сілавіках рукамі і нагамі.
Паводле абвінавачаньня, падсудныя далучыліся да дзеяньняў іншых асобаў і адзін да аднаго «ў мэтах дасягненьня адзінага выніку, што выразілася ў непасрэдным гвалце над асобай, а таксама ў пагромах, пашкоджаньнях і зьнішчэньні маёмасьці».
Людзі каля дзьвярэй судовай залі перад вынясеньнем прысуду
«Яны ўсе героі, нашы дзеці»,— што сказалі сваякі падсудных пасьля выраку
Марыя Салавей, маці Ігара Салаўя: «Лічы, што ўсё надуманае, выдуманае. Атрымаў 6 гадоў, але ў мяне надзея, што 6 гадоў ён там сядзець ня будзе. Чакаю яго найхутчэйшага вяртаньня дахаты. Да канца траўня хаця б… Усё выдумана, усё робіцца пад дудку вусатага «красаўца».
Яўгенія Маціюш, маці Дэвіда Масьціцкага: «Мы чакалі тэрмін не такі вялікі, хаця б крыху менш. У шоку, канешне. Сын быццам трымаецца, малайчына. Я імкнулася таксама трымацца. Напілася супакаяльных, каб ня плакаць – найперш, каб яго не хваляваць. Адназначна мой сын – герой і я вельмі ганаруся ім».
Юлія Богнат, маці Данііла Богната: «Я не чакала такога, канешне, думала, што нашмат менш будзе. Але настройвала сябе, глядзела па іншых выніках суду: як пракуроры запытвалі – так і давалі. Ну, як ёсьць ужо. Спадзяемся, што ня доўга застанецца і столькі яны сядзець ня будуць. Усё памяняецца да лепшага. Яны ўсе героі, нашы дзеці. Ганарымся імі».
Віктар Рубец, бацька Алега Рубца: «Гэта ж ня суд, гэта спэктакль. Ну, сёньня ён скончыўся, гэты спэктакль. Адны акторы зьехалі ў камэры, а іншыя – траціць свае сярэбранікі. Што тут можна сказаць? Калі мы гадавалі дзяцей, я думаў, што турма – гэта страшна і сорамна. Аказваецца, гэта зусім ня сорамна. Ёсьць такія артыкулы, па якіх ня сорамна сядзець. Мой сын будзе сядзець, але я ганаруся сваім сынам, што ён у свае 18 год зрабіў тое, пра што многія толькі на кухнях размаўляюць і што хацелі б зрабіць, але баяцца. Усе мы перажываем і сын перажывае… Але ўсе людзі чакаюць перамен».
Тацяна Рубец, маці Алега Рубца: «Хлопцы нашы малайцы, яны паводзілі сябе вельмі годна і годна выслухалі свой прысуд, далі зразумець, што іх не зламалі, што яны трымаюцца. Несправядлівасьць канешне жудасная».
Станіслаў Цярэшка, бацька Аляксандра Цярэшкі: «Канешне ж, не чакалі. Гэта жах! Быццам і не даказана толкам нічога, а суд прызнаў вінаватым. 6 гадоў і 6 месяцаў – за галаву ўзяцца можна!»
Сьвятлана Багнавец, сястра Рамана Багнаўца: «Сын вельмі моцна перажывае, у іх такія адносіны пяшчотныя. Я нават ня ведаю, як усе гэтыя гады – страчаныя, скрадзеныя – як Арцём будзе бяз таты, я ўвогуле не ўяўляю.
Самае галоўнае: жадаю хлопцам, каб яны не зламаліся, бо зусім не салодка ім будзе».
Сяргей і Алена Маўшукі і іх дзеці
Сярод асуджаных па «пінскай справе» сужэнцы Сяргей (6.5 гадоў калёніі ўзмоцненага рэжыму) і Алена (6 гадоў калёніі агульнага рэжыму) Маўшукі.
Маці трох дачок (двое зь іх непаўналетнія) Алена Маўшук знаходзіцца за кратамі з 10 жніўня. Яе муж Сяргей знаходзіўся на волі.
Сяргей і Алена Маўшукі
У пары Маўшукоў адно агульнае дзіця — 5-гадовая Карына. 10-гадовую дачку Алены Ангеліну ў верасьні забралі ў прытулак. Аднак празь некаторы час пад апеку яе ўзяла хросная. Карына ж увесь час, да пачатку суду, знаходзілася разам з татам.
Перад першым судовым паседжаньнем Сяргей Маўшук прызнаўся, што калі яго пасадзяць, гэта будзе моцны ўдар па дачцэ.
14 сакавіка, пачуўшы запыт пракурора, Алена Маўшук напісала вялікімі літарамі ў сшытку: «Я павешуся».
Перад выракам Сяргей Маўшук сказаў, што на гэты момант 5-гадовая Карына знаходзіцца ў старэйшай дачкі Алены Юліі. Па словах бацькi Сяргея, некалькі «добрых сем’яў» хочуць яе ўдачарыць і зараз зьбіраюць для гэтага неабходныя дакумэнты.
ГЛЯДЗІЦЕ ТАКСАМА: Мужа і жонку зь Пінску адправілі ў калёнію за пратэсты пасьля выбараў. Што будзе зь іх малымі дзецьмі?Што расказваюць пінчукі пра падзеі 9–10 жніўня
Паводле жыхароў Пінску, зь якімі раней пагаварыла Свабода, 9 жніўня пасьля 20:00 людзі прыйшлі да выбарчых участкаў, каб паглядзець на выніковыя пратаколы. Аднак сябры выбарчых камісій паведамілі, што ўжо перадалі вынікі ў Пінскі гарадзкі выканаўчы камітэт.
Каля 21:00 некалькі тысяч чалавек наблізіліся да будынку гарвыканкаму, падыход да якога заблякавалі супрацоўнікі ГАУС і РАУС. Да людзей выйшлі начальнік ГАУС Дзьмітры Каравякоўскі. Ён прапанавалі вылучыць 5 дэлегатаў для перамоваў з кіраўніцтвам гораду.
Цягам дзьвюх з паловай гадзінаў пратэстоўцы чакалі вяртаньня сваіх дэлегатаў. У выніку да гарвыканкаму прыехала падмацаваньне сілавых структур. Яны ўзялі некалькі дзясяткаў людзей у кола, зь якога пратэстоўцы вырашылі прарывацца.
Пазьней людзі пачалі адціскаць сілавікоў, выкарыстоўваючы для абароны падручныя матэрыялы (выламаныя з лавак дошкі, сьметніцы). Прагнаўшы АМАП, пінчукі празь некаторы час разышліся па дамах. На наступны дзень, 10 жніўня, людзі зноў выйшлі на пратэст, аднак ён скончыўся масавымі жорсткімі затрыманьнямі.
ГЛЯДЗІЦЕ ТАКСАМА: «Вы ў бясьпецы з намі!» Міліцыя адмовілася ад пераатэстацыі пінскіх супрацоўнікаў, якія «страцілі сон і апэтыт»Начальнік міліцыі справакаваў сутычку з пратэстоўцамі?
Паводле словаў сваякоў абвінавачаных, у адным зь відэафайлаў, які пракуроры прадставілі ў ходзе перадапошняга судовага пасяджэньня 13 красавіка, высьветлілася, што сутыкненьні паміж грамадзянамі і сілавікамі пачаліся пасьля каманды начальніка пінскага ГАУС Дзьмітрыя Каравякоўскага «Да бою» і ягонага закліку на выцясьненьне.
На скрыжаваньні вуліц Заслонава і Леніна ў момант сутыкненьняў начальнік ГАУС прамаўляў таксама «Усім здацца» і «Атачаем і затрымліваем усіх». А крыху пазьней у мэгафон ён даў распараджэньне: «Адкрыць агонь!».
ГЛЯДЗІЦЕ ТАКСАМА: Сваякі фігурантаў «пінскай справы»: начальнік міліцыі даў загад «адкрыць агонь», справакаваў сутычку з пратэстоўцаміУсе гэтыя каманды 10 жніўня чулі і пратэстоўцы. Паводле прадстаўнікоў абароны абвінавачаных, людзі ўспрымалі іх літаральна. Думалі, што да іх прыменяць сілу, таму і пачалі абараняцца. Адвакаты падсудных таксама сьцьвярджаюць, што падзеі маглі б разьвівацца інакш, калі б начальнік міліцыі агучваў каманды ў завуаляванай форме, якую маглі б зразумець выключна сілавікі.
Пры гэтым сам Каравякоўскі раней у судзе заяўляў, што ніякіх загадаў асабіста не аддаваў. А самі міліцыянты, згодна з матэрыяламі справы, дзейнічалі ў межах паўнамоцтваў, не чынілі гвалту ў адносінах да пратэстоўцаў і ажыцьцяўлялі ахову грамадзкага парадку «з мэтай спыненьня несанкцыянаванай масавай акцыі каля будынку гарвыканкаму».
Родныя ж палітвязьняў кажуць, што на паседжаньні 13 красавіка паказалі таксама фота і відэа падсудных, зробленыя пасьля іх затрыманьня 10–11 жніўня. Сваякі фігурантаў прызналіся, што былі ў шоку. На прадстаўленых кадрах, кажуць яны, «хлопцы былі страшна зьбітыя».
ГЛЯДЗІЦЕ ТАКСАМА: Карычневая шыльда на дзьвярах камэры, нашыўка на робе. Як за кратамі пазначаюць «палітычных»