Яны ўтрымліваюцца ў СІЗА КДБ, Кастусёў быў затрыманы ў Беларусі, Фядута і Зянковіч — у Маскве. У чым іх абвінавачваюць — пакуль не паведамілі ні афіцыйна, ні іх адвакатам.
Марына Шыбко, жонка Аляксандра Фядуты:
— Я прыехала ў чацьвер з Масквы, у пятніцу перадала перадачу, заключыла дамову з адвакатам. Дзяжурная адвакатка, якая прысутнічала пра першым допыце, сказала, што Саша трымаецца, узяў сябе ў рукі. Сказаў, што кожны дзень у 9 вечара будзе па памяці чытаць вершы Бродскага. А я — дома, па двухтомніку.
Я абсалютна не ўяўляю, за што яго арыштавалі.
У аўторак адвакатка, зь якой я заключыла дамову, пойдзе ў КДБ рабіць сьледчыя дзеяньні. Абвінавачваньня пакуль няма.
У Маскве я падала заяву ў паліцыю, а ў СІЗА Масквы тэлефанавала, на што быў адказ — «такога няма». Зьбіралася зьвярнуцца ў амбасаду, але Саша ўжо «знайшоўся». Ператрус у кватэры быў доўгім. Але паводзілі сябе карэктна, усё паставілі на месца. Усё паглядзелі, у нас жа так шмат кніг. І забралі «мазгі» з кампутара, флэшкі і ўсе візытоўкі.
Аляксандар Фядута
Алена Дзянісавец, жонка Юрася Зянковіча:
Пакуль па справе нічога новага. Спадзяюся, што на пачатку наступнага тыдня адвакат сустрэнецца зь Юрасём. Пакуль ніякія перадачы яму не перадавалі.
Юрась Зянковіч і яго жонка Алена Дзянісавец
Наўпрост зьвязацца са сваякамі Рыгора Кастусёва не атрымалася. Аднак інфармацыю ад родных кіраўніка Партыі БНФ атрымаў Аляксей Янукевіч, намесьнік старшыні партыі.
Паводле Янукевіча, сваякі заключылі дамову з адвакаткай, яна пакуль з Кастусёвым не сустракалася. Пойдзе на сьледчыя дзеяньні ў аўторак. Абвінавачваньне пакуль не прад’яўленае. Сваякі ў суботу перадалі перадачу Кастусёву. Ператрусу ў кватэры ў Менску, дзе ён жыве, не было.
Рыгор Кастусёў