Суд

Справу лекара і журналісткі за распаўсюд зьвестак аб тым, што забіты Раман Бандарэнка быў цьвярозы, перадалі ў суд

Лекар Арцём Сарокін і журналістка Кацярына Барысевіч

Справу за «разгалошваньне мэдычнай таямніцы» разгледзіць суд Маскоўскага раёну Менску. Але калі будзе суд, пакуль невядома.

Партал Tut.by паведаміў, што справу супраць ягонай журналісткі Кацярыны Барысевіч і лекара лякарні хуткай мэдычнай дапамогі Арцёма Сарокіна будзе разглядаць суд Маскоўскага раёну Менску. Дата паседжаньня пакуль не прызначаная.

Іх будуць судзіць за раскрыцьцё зьвестак аб адсутнасьці алькаголю ў крыві забітага Рамана Бандарэнкі. Лукашэнка заяўляў адваротнае — што Бандарэнка быў нібыта п'яны.

Справу аб сьмерці Рамана Бандарэнкі дагэтуль не завялі.

ГЛЯДЗІЦЕ ТАКСАМА: Адвакаты Барысевіч спадзяюцца, што яе справу будуць разглядаць у адкрытым рэжыме

І Барысевіч, і Сарокіна беларускія праваабарончыя арганізацыі прызналі палітычнымі зьняволенымі. Tut.by адзначае, што ў тым жа судзе Маскоўскага раёну будзе разглядацца «справа Белгазпрамбанку» з удзелам іншых палітычных зьняволеных, у тым ліку Віктара Бабарыкі. Папярэдняе паседжаньне ў «справе Белгазпрамбанку» прызначылі на 4 лютага. Будынак суду ўжо абгарадзілі.

Згодна з матэрыяламі справы, Кацярына Барысевіч «бяз згоды пацыента або іншых упаўнаважаных асобаў» угаварыла лекара Арцёма Сарокіна даць вусную інфармацыю пра пацыента бальніцы Рамана Бандарэнку і перадаць праз мэсэнджар Telegram фатакопіі мэдычнай дакумэнтацыі, усьведамляючы, што запытаная ёй інфармацыя складае мэдычную таямніцу і яна ня мае права на яе атрыманьне і распаўсюджваньне.

Дзеяньні Кацярыны Барысевіч кваліфікавалі паводле ч.5 арт.16 і ч.3 арт.178 Крымінальнага кодэксу Рэспублікі Беларусь, Арцёма Сарокіна — па ч.3 ст.178 КК РБ. Меру стрыманьня ў выглядзе заключэньня пад варту пакінулі бязь зьмены. Справу аб забойстве Рамана Бандарэнкі дагэтуль не завялі. Ягоная маці ня мае доступу да матэрыялаў праверкі.

Што вядома пра сьмерць Рамана Бандарэнкі

Раман Бандарэнка

  • Невядомыя ў масках пачалі зразаць бел-чырвона-белыя стужкі ў двары на вуліцы Чарвякова ўвечары 11 лістапада.
  • Пасьля вэрбальнага канфлікту зь мясцовымі жыхарамі невядомыя пачалі нападаць і біць жыхароў. Каля 22:16 некалькі чалавек забралі і зьвезьлі на бусах, падобных да тых, якімі карыстаюцца сілавікі.
  • Паводле непацьверджанай інфармацыі, каля 1,5 гадзіны Бандарэнка знаходзіўся ў Цэнтральным РУУС Менску.
  • У 0:05 Раман Бандарэнка паступіў у лякарню хуткай мэдычнай дапамогі зь вялікім ацёкам мозгу, закрытай чэрапна-мазгавой траўмай, субдуральнымі гематомамі, ударамі, абдзірынамі.
  • Паводле лекараў, ён быў у затарможаным стане, але ў апэрацыйную яго ўжо прывезьлі ў коме. Апэрацыя цягнулася некалькі гадзін.
  • Раман быў у крытычным стане.
  • ​ГУУС Менгарвыканкаму сьцьвярджае, што міліцыя прыбыла на месца толькі пасьля здарэньня. Рамана знайшлі непрытомнага і выклікалі хуткую. Адзін са сьведак здарэньня расказаў Свабодзе, што міліцыя прыяжджала яшчэ тады, калі невядомыя зразалі стужкі, «аднак хутка зьехала, нічога не зрабіўшы».
  • Сьледчы камітэт заявіў, што мужчына быў пʼяны. Аднак мэдыкі гэтую заяву абверглі — у крыві Бандарэнкі алькаголю не было.
  • 19 лістапада затрымалі журналістку Tut.by Кацярыну Барысевіч і лекара Арцёма Сарокіна. Кацярына Барысевіч была аўтаркай артыкула, дзе гаварылася, што ў крыві загінулага Рамана Бандарэнкі не было алькаголю. Інфармацыю пра гэта ёй перадаў лекар Арцём Сарокін. Пачатак суду над імі прызначаны на 19 лютага.
  • 18 лютага 2021 году, на соты дзень пасьля сьмерці Рамана, Генпракуратура паведаміла яго маці Алене Бандарэнцы, што па факце сьмерці яе сына пачалі крымінальную справу.
  • 17 верасьня 2021 справу прыпынілі«з прычыны неўстанаўленьня асобы, якая падлягае прыцягненьню ў якасьці абвінавачанага».