Упершыню нядзельную акцыю не анансавалі ў тэлеграм-каналах.
ГЛЯДЗІЦЕ ТАКСАМА: Нядзельныя маршы пачаліся яшчэ дасьвецьцем. Што адбываецца ў Беларусі на 141-ы дзень пратэстаўУдзельнікі сёньняшніх акцый пачалі іх правядзеньне раніцай, яшчэ зацемна. Фота і відэа зь іх апублікавалі тэлеграм-каналы і сацсеткі.
Так, у раёне сталічных падшыпнікавага і трактарнага заводаў прайшла калёна зь бел-чырвона-белымі сьцягамі, скандуючы «Жыве Беларусь!». На вуліцы Маякоўскага група мясцовых жыхароў таксама зь бел-чырвона-белымі сьцягамі правяла «сумесную зарадку». Затым яшчэ адна група мясцовых жыхароў прайшла маршам па раёне. Ранішні лякальны марш правялі жыхары сталічнага мікрараёну Малінаўка. Жыхары Першамайскага раёну выстраіліся ўздоўж праспэкту Незалежнасьці ў ланцуг салідарнасьці зь бел-чырвона-белай сымболікай.
ГЛЯДЗІЦЕ ТАКСАМА: Балёнікі, віншаваньні, вершнік на кані. Сьвяточная атрыбутыка на маршах 27 сьнежня. ФОТА і ВІДЭАПрыхільнікі перамен правялі сёньня акцыі ў менскіх мікрараёнах Захад, Сухарава, Кунцаўшчына, Чырвоны Бор, Чыжоўка, Мядзьведжына, Цівалі, Грушаўка, Малінаўка, Уручча, Зялёны Луг, Сокал, Лебядзіны, Дразды, Дамброўка, Курасоўшчына, Масюкоўшчына, Ждановічы, Лошыца.
Жыхары сталічнай Асмалоўкі правялі акцыю ў падтрымку затрыманых супрацоўнікаў беларускага «Прэс-клюбу».
Таксама лякальныя акцыі прайшлі ў раёне станцый мэтро «Пушкінская» (тут сустрэліся дзьве калёны пратэстоўцаў) і «Спартыўная», Менскага велазаводу, на вуліцах Максіма Багдановіча, Янкі Маўра, Розы Люксэмбург, Матусевіча, Сурганава, Арлоўскай, Лагойскім тракце.
Акцыі прайшлі і ў іншых паселішчах Беларусі: у Баранавічах, Гомлі, Горадні, Жодзіне, Заслаўі, Кобрыні, Лідзе, Магілёве; у пасёлках Сёмкава, Сонечны, Тарасава і аграгарадку Крупіца Менскага раёну.
Сілавікоў на вуліцах сталіцы сёньня было няшмат.
ГЛЯДЗІЦЕ ТАКСАМА: Праваабаронцам вядомыя прозьвішчы больш як 20 затрыманых на акцыях пратэсту 27 сьнежняВалянтэры, якія складаюць сьпісы затрыманых па адміністрацыйных справах, па стане на 20.00 паведамілі ў тэлеграм-канале @spiski_okrestina прозьвішчы 23 затрыманых падчас сёньняшніх маршаў пратэсту. Гэта ў 10–15 разоў меней, чым у папярэднія нядзелі.
20-ю нядзелю з моманту прэзыдэнцкіх выбараў 9 жніўня прыхільнікі перамен працягваюць патрабаваць адстаўкі Лукашэнкі і правядзеньня новых сумленных выбараў, вызваленьня палітвязьняў, а таксама адказнасьці за зьбіваньне мірных дэманстрантаў і катаваньні над імі. Амаль два месяцы нядзельныя акцыі праходзяць у новым фармаце — удзельнікі зьбіраюцца на лякальныя маршы ў дварах і раёнах.