Творцаў, якія актыўна выказваюць сваю грамадзянскую пазыцыю, звальняюць з працы, арыштоўваюць, зрываюць іх выступы, аказваюць на іх псыхалягічны ціск. Каб падтрымаць выдатных прадстаўнікоў супольнасьці, быў створаны Беларускі фонд культурнай салідарнасьці.
Амаль 1300 дзеячаў культуры і мастацтва падпісалі адкрыты ліст да ўладаў з патрабаваньнем прызнаць прэзыдэнцкія выбары несапраўднымі і спыніць гвалт сілавых структур.
ГЛЯДЗІЦЕ ТАКСАМА: 800 беларускіх дзеячоў культуры выказаліся супраць гвалту і фальсыфікацыйГалоўная мэта фонду — дапамагчы юрыдычна, матэрыяльна і псыхалягічна тым, каго звольнілі/звольняць, хто сышоў на знак пратэсту ці апынуўся ў складанай жыцьцёвай сытуацыі.
Сяргей Будкин
Другі кірунак дзейнасьці — спрыяньне вольнаму крэатыву праз падтрымку ідэяў. Перавага будзе аддавацца хуткім у пляне рэалізацыі праектам: вулічныя графіці, творчы пэрформанс, відэа-арт ды іншыя.
Фонд узначалілі культурны мэнэджар і прадусар Cяргей Будкін, а таксама сьпявачка ды актывістка Марына Шукюрава (Руся).
ГЛЯДЗІЦЕ ТАКСАМА: Сяргей Будкін зьехаў у Вільню і ўзначаліў Беларускі фонд культурнай салідарнасьці«Для мяне магчымасьць папрацаваць у фондзе — спроба „склеіць і сшыць“ дзьве Беларусі, у якіх мы жылі дагэтуль. Я веру, што дзеячы культуры здольныя аб’яднацца цяпер на галоўнай падставе. Нам патрэбны зьмены, і на гэта трэба накіраваць усе сілы. З астатнімі пытаньнямі разьбяромся ў працоўным рэжыме пасьля перамогі», — адзначыў Сяргей Будкін.
Кіраўніцтва разьлічвае, што дзейнасьць фонду прыцягне ўвагу беларускага грамадзтва, міжнароднай супольнасьці і мэдыя да вольнай культуры, паспрыяе адбудове эфэктыўных крэатыўных альянсаў ды супольных праектаў.
ГЛЯДЗІЦЕ ТАКСАМА: Сьпявачка Руся зьехала зь Беларусі, але працягвае з-за мяжы дапамагаць пацярпелымРуся
«Я прыняла прапанову працаваць у фондзе, бо не магу зьмірыцца з тым, што ўлада зрабіла з маімі сябрамі і краінай. У сучасным сьвеце публічнасьць і мэдыйны ціск — гэта моцная зброя. На гэты момант наша адзіная магчымасьць яднацца — трымацца і разам дасягнуць галоўнай мэты: жыць у новай Беларусі», — дадала Марына Шукюрава.
Беларускі фонд культурнай салідарнасьці зьяўляецца адгалінаваньнем фонду BY_SOL. Яго дзейнасьць таксама падтрымліваюць прадстаўнікі беларускай дыяспары і бізнэс-колаў.
ГЛЯДЗІЦЕ ТАКСАМА: Латушка пра вайну сыстэмы супраць культуры: «Мяне проста скідвалі з пасады»Мэдыйнай пляцоўкай фонду будзе адноўлены TuzinFM — інфармацыйны партал пра культурны супраціў і актуальную культуру.