У Магілёве затрымалі старшыню мясцовай суполкі Таварыства беларускай мовы Алега Дзьячкова падчас зачысткі цэнтру гораду. Ён праводзіў экскурсію па пешаходнай вуліцы Ленінскай, калі ягоную групу з трох дзясяткаў чалавек атачылі экіпаваныя супрацоўнікі міліцыі.
«Яны забралі ўсіх мужчын, якія былі ў нашай групе, без тлумачэньня прычын. Потым пасадзілі ў аўтобус і некуды павезьлі. Жанчын жа адпусьцілі», — кажа адна з удзельніц экскурсіі Ларыса Ўнучак. Сярод зьняволеных апынуўся яе 67-гадовы муж Мікалай.
Як кажа суразмоўніца, нічога супрацьпраўнага група не рабіла. Алег Дзьячкоў апавядаў пра гісторыю і архітэктуру дамоў, калі на пешаходную вуліцу выскачыў натоўп людзей, за якімі гналіся міліцыянты. Экскурсійная група, адышоўшы ўбок, заставалася на месцы і стала ахвярай пагоні.
«Алег Дзьячкоў быў сярод затрыманых мужчын, і яго павялі разам зь імі», — кажа Ларыса Ўнучак.
Цяпер тэлефон Дзьячкова працуе ў рэжыме галасавой пошты. Не адгукаецца на тэлефанаваньні і муж Ларысы Ўнучак Мікалай.
Блізу 19 гадзіны на плошчы каля гандлёвага цэнтру «Атрыюм», што за трыста мэтраў ад гарвыканкаму і непадалёк ад пешаходнай вуліцы, сабраліся некалькі дзясяткаў чалавек. Праз паўгадзіны іх пачалі выцясьняць экіпаваныя супрацоўнікі міліцыі. Яшчэ праз паўгадзіны аточаная міліцыянтамі плошча стала бязьлюднай. Потым аддалі загад зачысьціць і прылеглыя вуліцы. Экскурсія Алега Дзьячкова трапіла пад такую зачыстку.
ГЛЯДЗІЦЕ ТАКСАМА: Выбары-2020. Пратэсты, затрыманьні і салідарнасьць. Што адбываецца ў БеларусіПрэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.