Палітыка

Амбасадар Расеі прапанаваў Беларусі «інвэнтарызацыю» дарожных мапаў інтэграцыі, каб «прыбраць палітызацыю»

Дзьмітры Мезенцаў, архіўнае фота

Расейскі амбасадар у Беларусі Дзьмітрый Мезенцаў 27 ліпеня заявіў, што Расеі і Беларусі трэба правесьці «інвэнтарызацыю» дарожных мапаў «паглыбленьня інтэграцыі», каб зьвярнуць увагу на эканамічную інтэграцыю і «прыбраць непатрэбную палітызацыю», перадае ТАСС.

Паводле яго, перамовы прэм’ераў Беларусі і Расеі 14 ліпеня ў Маскве і 17 ліпеня ў Менску «пацьвярджаюць узаемную высокую зацікаўленасьць» бакоў.

«Пытаньне ў тым, што трэба сядаць за стол перамоваў і гутарыць, весьці інвэнтарызацыю інтэграцыйных дарожных мапаў і бачыць рэальную пэрспэктыву», — мяркуе Мезенцаў.

ГЛЯДЗІЦЕ ТАКСАМА: У Крамлі гатовыя абмяркоўваць цэны на газ і нафту для Беларусі толькі пасьля падпісаньня інтэграцыйных дакумэнтаў

На гэтых перамовах, дадаў ён, трэба «праявіць волю, напорыстасьць», дзейнічаць «бяз боязі, залішняй і непатрэбнай палітызацыі інтэграцыйнай працы». Па-за палітычнай кампанэнтай могуць быць, кажа ён, пытаньні адзінай палітыкі ў прамысловасьці, сельскай гаспадарцы, падатках, навуцы. Гэта ўсё не нясе пагрозаў сувэрэнітэту і незалежнасьці Беларусі і Расеі, запэўнівае Мезенцаў, а можа быць «найважнейшай канкурэнтнай перавагай для абедзьвюх краінаў».

Мезенцаў адзначае, што стратэгія «паглыбленьня інтэграцыі» была прадстаўленая Аляксандру Лукашэнку і Ўладзіміру Пуціну, «практычна ўсё было ўзгоднена», таму «трэба да гэтага вяртацца», «яшчэ раз перадамовіцца і пайсьці наперад».

Пра тое, ці ёсьць у абноўленых «дарожных мапах» нейкія наднацыянальныя органы дзьвюх дзяржаваў, Мезенцаў «ня чуў».

ГЛЯДЗІЦЕ ТАКСАМА: Лукашэнка — Мішусьціну: «Сёньня немагчыма, як у сярэднія вякі, захапіць якуюсьці краіну»

«Паглыбленьне інтэграцыі» Беларусі і Расеі. Што важна ведаць

Аляксандар Лукашэнка і Ўладзімір Пуцін, ліпень 2019

  • Урады Беларусі і Расеі зьбіраліся ўзгадніць 31 стратэгічны плян інтэграцыі. Паволе расейскага прэм’ер-міністра Дзьмітрыя Мядзьзведзева, няўзгодненым застаўся 1 плян — пра наднацыянальныя органы.
  • Што менавіта зьбіраюцца падпісаць Лукашэнка і Пуцін, а таксама на што пагадзіліся ўрады ў стратэгічных плянах, публічна не агучваецца.
  • Тэма «паглыбленьня інтэграцыі» пачалася зь перамоваў пра кампэнсацыю «падатковага манэўру». Але ў «праграме інтэграцыі» няма кампэнсацыі «падатковага манэўру», бюджэт разьлічылі безь яе.
  • У канцы 2018 году Мядзьведзеў заявіў, што Расея гатовая «праводзіць адзіную палітыку ў галіне падаткаў, цэна- і тарыфаўтварэньня» толькі тады, калі будуць выкананыя ўмовы пагадненьня аб «саюзнай дзяржаве» 1999 году — а гэта агульныя валюта, суд і мытня.
  • Гэтыя ўмовы празвалі «ўльтыматумам Мядзьведзева». Аляксандар Лукашэнка тады адказаў жорстка: маўляў, «шантажаваць марна. Разумею намёкі — уступайце ў склад Расеі. Гэтага ня будзе ніколі».
  • 19 сьнежня 2019 году Ўладзімір Пуцін заявіў, што зь Беларусьсю абмяркоўваюць стварэньне наднацыянальных органаў — кантрольнага і эмісійнага. 23 сьнежня Мядзьведзеў паўтарыў, што без наднацыянальных органаў ня будзе кампэнсацыі «падатковага манэўру» і іншай дапамогі Беларусі.
  • 17 лістапада Лукашэнка абурыўся тым, што расейцы «кожны раз падсоўваюць новыя ўмовы, у выніку мы ў эканоміцы нешта страчваем», і рытарычна спытаў: «На храна патрэбен такі саюз?».
  • Шэраг беларусаў лічаць, што «паглыбленьне інтэграцыі» ўсё ж можа прывесьці да страты незалежнасьці Беларусі. Палітыкі і культурныя дзеячы прынялі 1 сьнежня сумесную заяву «Аб пагрозе Незалежнасьці Беларусі», а 4 сьнежня супраць інтэграцыі выступілі беларускія Telegram-каналы і суполкі «Ўкантакце».
  • Акцыі супраць паглыбленьня інтэграцыі Беларусі і Расеі прайшлі ў Менску ​7, 8, 20 і 21 сьнежня. А таксама ў Горадні, Пінску, Лідзе. За мяжой — у Польшчы, Украіне, Літве, Чэхіі, Вугоршчыне, Бэльгіі, Ізраілі, ЗША, Канадзе.

  • Агульная сума штрафаў пратэстоўцам — каля 65 тысяч даляраў. Таксама ўдзельнікам акцый прысудзілі агулам 375 сутак арышту.

  • 24 сьнежня ў інтэрвію «Эхо Москвы» Лукашэнка заявіў, што акцыі супраць «паглыбленьня інтэграцыі» не былі масавымі («400 чалаек — гэта наша ядро апазыцыі»), і «нехта падказаў, аплаціў, фонды ім даюць прыстойныя грошы». Лукашэнка дадаў, што сам ня пойдзе на тое, «ад чаго яны спрабуюць усьцерагчы беларускі народ», і назваў сябе «галоўны абаронца сувэрэнітэту і незалежнасьці».

Спэцпрапект «Чаму Беларусь не Расея»