Аляксандар Лукашэнка 24 ліпеня наведаў 5-ю асобную брыгаду спэцыяльнага прызначэньня ў Мар’інай Горцы.
Лукашэнку пазнаёмілі з ўзорамі ўзбраеньня і рыштунку. Таксама ён пацікавіўся ў вайскоўцаў, ці зручная форма і наколькі зносаўстойлівая.
«Галоўнае, каб зручна было. Я памятаю тую старую форму, асабліва летам — гэта мукі грэшныя», — спасылаецца на яго БелТА.
ГЛЯДЗІЦЕ ТАКСАМА: «У Беларусі такое ўпершыню». Што вядома пра кампанію, якой Лукашэнка дазволіў ужываць зброюСалдаты і афіцэры адзначылі, што новая форма пашытая з тканіны, якая «дыхае», яна добра носіцца. Акрамя таго, ёсьць узоры на любое надвор’е.
Лукашэнка агледзеў стралковае ўзбраеньне, якое выкарыстоўваюць атрады спэцыяльнага прызначэньня: кулямёты, снайпэрскія вінтоўкі, аўтаматы, гранатамёты і ракетную ўстаноўку.
ГЛЯДЗІЦЕ ТАКСАМА: Ярмошына раскрытыкавала ідэю Лукашэнкі, што прэзыдэнтам могуць быць толькія тыя, хто служыў у войскуТыдзень таму Аляксандар Лукашэнка наведваў 103-ю асобную паветрана-дэсантную брыгаду ў Віцебску. Там ён выступіў з прапановай дадаць у Канстытуцыю «важны пункт»: прэзыдэнтам можа быць толькі той, хто адслужыў у войску.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.