Ідэолягі з бабруйскага гарвыканкаму даслалі ліст з патрабаваньнем выдаліць відэаапытаньні з сайта выданьня «Бобруйский курьер».
У рэдакцыю «Бобруйского курьера» прыйшоў ліст з аддзелу ідэалёгіі і спраў моладзі Бабруйскага гарвыканкаму. Ад выданьня патрабуюць выдаліць з сайта відэасюжэты пра выбары.
Гэта пяць відэаролікаў-апытаньняў, дзе людзі выказваюцца пра сваё стаўленьне да выбараў і прэтэндэнтаў на пасаду прэзыдэнта. Улады гораду палічылі, што гэтыя ролікі — сацыялягічнае дасьледаваньне, а правядзеньне такіх дасьледаваньняў і іх публікацыя падпадае пад адміністрацыйную адказнасьць.
ГЛЯДЗІЦЕ ТАКСАМА: У Гомлі пачаўся суд над сынам журналістаў, якога АМАП затрымаў па дарозе на пляжМаксымальны штраф за гэтае правапарушэньне — 5400 рублёў.
У выпадку, калі рэдакцыя ня выдаліць ролікі, ідэолягі пагражаюць пачаць адміністрацыйны працэс.
Галоўны рэдактар выданьня Анатоль Санаценка лічыць прэтэнзіі гарадзкіх уладаў беспадстаўнымі. Бо права на атрыманьне, распаўсюд і захоўваньне інфармацыі гарантаванае Канстытуцыяй.
Таксама Канстытуцыяй гарантаваная свабода меркаваньняў і іх выказваньня.
Анатоль Санаценка падрыхтаваў зварот у пракуратуру, у якім просіць прыняць меры пракурорскага рэагаваньня для абароны гарантаваных Канстытуцыяй правоў.
ГЛЯДЗІЦЕ ТАКСАМА: Адкуль узяліся сацыёлягі, якія налічылі 76 працэнтаў падтрымкі ЛукашэнкіУ Беларусі праводзіць сацыяльна-палітычныя дасьледаваньні і дасьледаваньні грамадзкай думкі можна толькі з акрэдытацыяй Акадэміі навук. Але апытаньне грамадзкай думкі праводзіцца паводле навуковай мэтадалёгіі, у адрозьненьне ад журналісцкага відэаапытаньня выпадковых мінакоў. Да таго ж вулічнае апытаньне — адзін з распаўсюджаных жанраў журналісцкіх матэрыялаў.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.