Выбары-2020

На лецішчы Сяргея Ціханоўскага сьледчыя выявілі 900 тысяч даляраў, — каардынатар кампаніі Ціханоўскай

Сяргей Ціханоўскі, архіўнае фота

Пра гэта Свабодзе расказаў паплечнік Ціханоўскіх Аляксандар Кабанаў. Паводле яго інфармацыі, пералічваньне купюраў працягваецца дагэтуль.

ГЛЯДЗІЦЕ ТАКСАМА: «Думаю, іх маглі падкінуць». Сьвятлана Ціханоўская пракамэнтавала знойдзеныя сьледчымі 900 тысяч даляраў 

«Я магу паведаміць толькі тое, што мне вядома на гэты момант, — кажа Аляксандар Кабанаў. — Інфармацыю маю ад людзей, якія знаходзяцца на месцы вобшуку. Перапіс купюр яшчэ працягваецца. Іх знайшлі ўначы, прыкладна паміж 1-й і 4-й гадзінамі.

Грошы знайшла ўжо трэцяя сьледчая брыгада, якая прыехала на месца (лецішча месьціцца ў 25 км ад Гомля. — РС). Яны зьмяняліся на працягу ўсяго пэрыяду вобшуку. Панятыя таксама зьмяняліся, у дом нікога не пускалі. Разам з маці Сяргея Ціханоўскага ў якасьці панятых на месцы вобшуку хацелі прысутнічаць яго знаёмыя і сябры, але ім адмовілі.

Трэцяя брыгада сьледчых знайшла частку грошай у адным месцы, яшчэ частку — у другім. Гэта не былі нейкія таемныя месцы. Там ужо праводзілі вобшук і раней нічога не знайшлі».

ГЛЯДЗІЦЕ ТАКСАМА: «Знайшлі забароненыя рэчывы? Не — шукайце далей!» Як праходзіць вобшук на лецішчы маці Сяргея Ціханоўскага

Як удакладняе Кабанаў, акрамя грашовых сродкаў, сьледчыя выявілі пнэўматычнае ружжо, а таксама вялікую колькасьць дакумэнтаў, датычных дзейнасьці фірмы Сяргея Ціханоўскага і асабіста яго як індывідуальнага прадпрымальніка. Па словах Аляксандра Кабанава, перапіс забраных дакумэнтаў праведзены ня быў, іх проста склалі ў скрынкі.

Вобшук на лецішчы, якое належыць маці Сяргея Ціханоўскага і месьціцца ў 25 км ад Гомля, пачаўся прыкладна а 17-й гадзіне 3 чэрвеня. Ён цягнецца дагэтуль.

ГЛЯДЗІЦЕ ТАКСАМА: МУС заявіла, што ў Ціханоўскага знайшлі 900 тысяч даляраў і радыёстанцыі. ФОТА і ВІДЭА

Затрыманьні Ціханоўскага і яго прыхільнікаў у Горадні. Што трэба ведаць

  • Сяргей Ціханоўскі — відэаблогер, аўтар Youtube-каналу «Страна для жизни». Зьбіраўся балятавацца ў прэзыдэнты на выбарах 2020 году, але ягонай ініцыятыўнай групе адмовілі ў рэгістрацыі, калі ён быў у зьняволеньні. Але зарэгістравалі групу ягонай жонкі Сьвятланы Ціханоўскай, блогер стаў кіраўніком гэтай групы.
  • У Горадні а 20-й гадзіне 29 траўня Сяргея Ціханоўскага затрымалі супрацоўнікі АМАПУ падчас перадвыбарчага пікету за вылучэньне ў прэзыдэнты ягонай жонкі. Абставіны затрыманьня нагадвалі тыя, пра якія раней казаў Лукашэнка.
  • Гэта адбылося пасьля таго, як невядомая жанчына, якую сьведкі называлі правакатаркай, кідалася на блогера і спрабавала трымаць яго за вопратку. Яна патрабавала, каб Ціханоўскі адказаў, чаму ў Горадні няма яго жонкі. Ціханоўскі намагаўся сысьці ад жанчыны — зьявілася міліцыя.
  • Літаральна праз паўхвіліны прыбеглі супрацоўнікі АМАП і затрымалі Сяргея Ціханоўскага, які знаходзіўся за некалькіх мэтраў ад эпіцэнтру. Пазьней затрымалі таксама шэраг паплечнікаў Ціханоўскага. МУС паведаміла пра крымінальную справу за «гвалт супраць міліцыянтаў».

  • На лецішчы Ціханоўскага нібыта знайшлі 900 тысяч даляраў. Жонка мяркуе, грошы маглі падкінуць.
  • Ціханоўскага трымаюць за кратамі з 29 траўня 2020 году. Яго абвінавачваюць паводле чатырох артыкулаў Крымінальнага кодэксу:

ч. 1 арт. 293 (арганізацыя масавых беспарадкаў, да 15 гадоў зьняволеньня).

ч. 3 арт. 130 (распальваньне сацыяльнай варожасьці);

ч. 2 арт. 191 (перашкода працы ЦВК). Заяву на яго падала старшыня ЦВК Лідзія Ярмошына;

ч. 1 арт. 342 (арганізацыя дзеяньняў, што груба парушаюць грамадзкі парадак).