Саюз беларускіх пісьменьнікаў і «Бацькаўшчына» заклікалі скасаваць парад 9 траўня

Згуртаваньне беларусаў сьвету «Бацькаўшчына» і Саюз беларускіх пісьменьнікаў выступілі з супольнай заявай адносна эпідэміялягічнай сытуацыі ў Беларусі.

Каранавірус у Беларусі і ў сьвеце. Як разьвіваюцца падзеі >>

«Выказваем сваю глыбокую занепакоенасьць працэсамі, што зараз адбываюцца ў краіне — высокай хуткасьцю распаўсюду вірусу COVID-19 і адсутнасьцю эфэктыўных захадаў дзеля супрацьстаяньня пандэміі з боку беларускіх уладаў», — гаворыцца ў звароце да кіраўніцтва Беларусі.

ГЛЯДЗІЦЕ ТАКСАМА: Прадстаўнік Сусьветнай арганізацыі здароўя ў Беларусі пракамэнтаваў рост колькасьці інфікаваных COVID-19

Імклівы распаўсюд небясьпечнага захворваньня ў краіне выявіў востры недахоп сродкаў і матэрыялаў, неабходных мэдыкам для якаснага і бясьпечнага выкананьня сваёй працы, адзначаюць падпісанты.

«Невыразная пазыцыя уладаў, якія дапускаюць сумяшчэньне супрацьэпідэмічных захадаў зь лёгкадумнай рыторыкай пра „поўны кантроль“, змусіла зьвярнуцца па дапамогу да сусьветнай беларускай грамады, якая адгукнулася, нягледзячы на тое, што таксама ў сваёй большасьці знаходзіцца ў складаных варунках».

ГЛЯДЗІЦЕ ТАКСАМА: Першы лек ад COVID-19 пасьпяхова прайшоў выпрабаваньні

Досьвед краінаў, у якіх атрымалася пераламаць дынаміку распаўсюду каранавірусу, дазваляюць меркаваць, што адным з галоўных чыньнікаў мусіць б быць адмена ўсіх масавых мерапрыемстваў, інфармаваньне грамадзкасьці аб небясьпецы, якую нясе COVID-19, а таксама выкананьне санітарных патрабаваньняў і сацыяльнага дыстанцыяваньня.

З гэтай прычыны чальцы «Бацькаўшчыны» і пісьменьніцкай арганізацыі звяртаюцца да беларускіх уладаў з патрабаваньнем адмяніць вайсковы парад 9 траўня ў Менску. 75-годзьдзе Перамогі — важная падзея, але сьвяткаваньне не павінна прывесьці да новых ахвяраў у мірны час.

ГЛЯДЗІЦЕ ТАКСАМА: «Нават не цікавяцца, ці на гэтым яшчэ сьвеце». Мастак-франтавік Леанід Шчамялёў пра парад, каранавірус і сучасьнікаў

Паводле аўтараў звароту, грошы неабходна накіраваць на нарошчваньне рэсурсу мэдычных устаноў, набыцьцё сродкаў для барацьбы з пандэміяй і падтрымку уразьлівых групаў насельніцтва.