Беларускія каталікі на Вялікдзень аддалі перавагу відэаатрансьляцыям з касьцёлаў

Прадстаўнік Каталіцкай царквы ў Беларусі Юры Санько паведаміў Свабодзе, што з прычыны пандэміі каранавірусу колькасьць вернікаў падчас службаў у храмах скарацілася ў разы. Гэта сьведчыць і пра дысцыплінаванасьць і грамадзкую адказнасьць людзей адзін перад адным.

Сам айцец Юры — пробашч менскага касьцёла Сьвятога Роха. Паводле яго, калі ў папярэднія гады на Велікодную імшу тут зьбіраліся 300 і больш чалавек, то гэтым разам сьвяточную службу наведалі 60 парафіян. Аналягічная карціна і ў іншых храмах: у лепшым выпадку палова ад ранейшай колькасьці, а звычайна яшчэ меней.

ГЛЯДЗІЦЕ ТАКСАМА: «Цемра эпідэміі ахапіла зямлю». Мітрапаліт Кандрусевіч згадаў пра каранавірус у велікодным пасланьні

Так, у менскім катэдральным саборы на імшы, якую ўзначаліў мітрапаліт Тадэвуш Кандрусевіч, разам зь ім маліліся ўсяго некалькі дзясяткаў вернікаў, якія вырашылі асабіста ўдзельнічаць у галоўнай літургіі году.

Бальшыня скарысталася з дадзенай біскупам парады і засталася дома, далучыўшыся да імшы праз тэлетрансьляцыі на канале «Беларусь-1», спадарожнікавым канале «Беларусь 24», на канале міждзяржаўнай тэлерадыёкампаніі «Мир» і інтэрнэт-каналах у сацыяльных сетках.

ГЛЯДЗІЦЕ ТАКСАМА: «Чаму вы нічога ня кажаце?» Касьцёл патрабуе ад Мінздароўя адказаць, як арганізаваць бясьпеку вернікаў падчас каранавірусу

Паводле Юрыя Санько, на фоне эпідэміі каранавірусу абачлівасьць вернікаў цалкам ухвальная, бо сьведчыць пра разуменьне сур’ёзнасьці сытуацыі. Галоўнае, што ў думках і сэрцах гэтыя людзі застаюцца з Богам — толькі ў «Інстаграме» служба з касьцёла Сьвятога Роха набрала амаль паўтысячы праглядаў.

Паколькі няма пэўнасьці, калі будуць адазваныя распараджэньні касьцёльнага кіраўніцтва наконт захадаў засьцярогі, віртуальныя каналы сувязі будуць пашырацца.

ГЛЯДЗІЦЕ ТАКСАМА: Вялікдзень — дома. Мітрапаліт Кандрусевіч зьвярнуўся да вернікаў

Нягледзячы на складаныя ўмовы, выкліканыя пандэміяй, хрысьціянскі сьвет годна адзначыў сьвята, значэньне якога ня могуць адабраць ніякія перашкоды, гавораць прадстаўнікі Каталіцкай царквы.

«Эпідэмія перавярнула сьвет з ног на галаву і агаліла яго сутнасныя праблемы, у тым ліку маральныя. Складанасьць сытуацыі паказвае, што сучасная бездухоўная мадэль — беспэрспэктыўная. Неабходна зьмена арыентыраў. Недастакова давяраць толькі эканамічнаму і навуковаму прагрэсу, трэба вярнуцца да каранёў нашай веры і будаваць жыцьцё на духоўным падмурку», — цытуе Тадэвуша Кандрусевіча сайт Каталіцкай царквы.

ГЛЯДЗІЦЕ ТАКСАМА: «Баімся, але ідзём». Горадня адзначае Вербніцу падчас пандэміі. ФОТА

Арцыбіскуп Тадэвуш Кандрусевіч нагадаў словы папы Францішка, прамоўленыя ім у канцы сакавіка падчас малітвы аб спыненьні каранавірусу. Пантыфік тады сказаў, што неабходна выкарыстаць гэтыя выпрабаваньні як час выбару паміж тым, што застаецца назаўсёды, і тым, што прамінае; аддзяліць неабходнае, ад таго, што такім не зьяўляецца.

«Ахоплены пандэміяй каранавірусу сьвет знаходзіцца ў вельмі цяжкім становішчы. Самадастатковы чалавек, які адкінуў Бога і спадзяваўся толькі на свае сілы, нечакана зразумеў, што ён ня „Бог“, а толькі Яго слабое і ўразьлівае стварэньне», — зазначыў першаярарх. З гэтага ён зрабіў выснову, што цяпер людзям варта задумацца над сваім жыцьцём і кардынальна яго зьмяніць.