Палітыка

«Негуманна і неэфэктыўна». Эўразьвяз асудзіў чарговы сьмяротны прысуд у Беларусі

Плякат супраць сьмяротнага пакараньня, архіўнае фота

Прэс-сакратарка ў замежных справах і палітыцы бясьпекі Эўразьвязу Мая Качыянчыч апублікавала заяву адносна чарговага сьмяротнага прысуду ў Беларусі.

Берасьцейскі абласны суд 25 кастрычніа агучыў вырак у справе аб забойстве 8-месячнай дзяўчынкі ў Лунінцы. Абаім абвінавачаным прысудзілі максымальнае пакараньне. Маці дзяўчынкі Натальлі Колб — 25 гадоў калёніі агульнага рэжыму (сьмяротнае пакараньне і пажыцьцёвае зьняволеньне жанчынам у Беларусі не прысуджаюць). А ейнаму сужыцелю Віктару Сяргелю, якога прызналі ўдзельнікам забойства, прысудзілі сьмяротнае пакараньне.

ГЛЯДЗІЦЕ ТАКСАМА: Забойцам 8-месячнай дзяўчынкі прысудзілі расстрэл і 25 гадоў калёніі

Эўразьвяз, піша Мая Качыянчыч, выказвае шчырыя спачуваньні ўсім, хто пацярпеў ад злачынства, але выступае супраць вышэйшай меры пакараньня пры любых абставінах.

«Вышэйшая мера пакараньня — гэта негуманнае і неэфэктыўнае пакараньне, якое ня дзейнічае як стрымліваючы фактар, — тлумачыць яна. — Мараторый на расстрэлы ў Беларусі стане станоўчым першым крокам да скасаваньня сьмяротнага пакараньня ў краіне.

Такім чынам Беларусь далучыцца да ўсё большай колькасьці краінаў, якія выкаранілі сьмяротнае пакараньне альбо ў законе, альбо фактычна, а за апошнія 10 гадоў у 160 краінах сьвету не было расстрэлаў».

Сьмяротнае пакараньне ў Беларусі

  • Беларусь застаецца апошняй краінай Эўропы, дзе караюць сьмерцю.
  • Усяго за гады незалежнасьці ў Беларусі вынесьлі каля 350 сьмяротных прысудаў (дакладная лічба невядомая).
  • Улады Беларусі не паведамляюць пра выкананьне сьмяротных прысудаў. Пра гэта ўдаецца даведацца з паказаньняў іншых сьмяротнікаў або ад праваабаронцаў, якія кантактуюць з роднымі асуджаных.
  • Эўразьвяз пэрыядычна заклікае Беларусь адмовіцца ад сьмяротнага пакараньня.
  • Нягледзячы на ўсе просьбы міжнароднай супольнасьці, рэжым Лукашэнкі працягвае выносіць сьмяротныя прысуды. 19 кастрычніка 2023 вынесены чарговы зь іх — Аляксандру Таратуту са Слуцку, які забіў 3-гадовае дзіця.
  • Дакладная колькасьць памілаваных таксама не вядомая. Раней беларускім праваабаронцам было вядома толькі пра два выпадкі памілаваньня асуджаных на сьмяротнае пакараньне за ўсю гісторыю незалежнай Беларусі. У канцы ліпеня 2024 году Лукашэнка памілаваў асуджанага на сьмяротнае пакараньне грамадзяніна Нямеччыны Рыка Крыгера, пасьля гэтага яго вызвалілі ў рамках вялікага абмену вязьнямі паміж Расеяй і краінамі Захаду.
  • Лукашэнка ў 2012 годзе казаў, што за ўсю гісторыю свайго прэзыдэнцтва памілаваў толькі аднаго чалавека (пасьля гэтага, у 2021 годзе, ён памілаваў асуджаных да сьмяротнага пакараньня братоў Косьцевых). Разам з тым МУС Беларусі яшчэ ў 2012-м сьцьвярджала, што за 13 гадоў было памілавана 156 сьмяротнікаў (замена сьмяротнага прысуду на пажыцьцёвае зьняволеньне).