Суд

Супрацоўніца БелТА: Паролі да платнага доступу выдаваліся і без дамовы, на просьбу кіраўніцтва

Марына Золатава на судзе, 12 лютага 2019 году

У судзе ў справе Марыны Золатавай дапыталі Алену Кузьняцову, кіраўніцу сэктара адміністраваньня сетак агенцтва БелТА.

На другі дзень працэсу ў справе Марыны Золатавай працягваецца допыт сьведак — супрацоўнікаў агенцтва БелТА і выданьня «Беларусь сегодня».

ГЛЯДЗІЦЕ ТАКСАМА: У Менску пачаўся суд над Марынай Золатавай у «cправе БелТА». ВІДЭА

Каля 12-й гадзіны адбыўся допыт Алены Кузьняцовай, якая кіруе сэктарам адміністраваньня сетак інфармацыйнага агенцтва. Кузьняцова расказала суду, што ў яе абавязкі ўваходзіць стварэньне пароляў і лагінаў да стужкі платнай падпіскі.

За гады працы ў агенцтве яна некалькі разоў мяняла пасады, аднак працягвала займацца стварэньнем пароляў на працягу апошніх пяці гадоў. Кузьняцова паведаміла, што агенцтва не правярала, якім чынам выкарыстоўваюцца выдадзеныя ім паролі.

ГЛЯДЗІЦЕ ТАКСАМА: «Лічу, што ў маіх дзеяньнях няма складу злачынства». Марына Золатава не прызнала віны

«Мы прывыклі давяраць сваім кліентам, — заявіла супрацоўніца БелТА. — Праверка праводзілася толькі ў другой палове красавіка, калі прыйшоў ліст з газэты «Рэспубліка».

Алена Кузьняцова падчас допыту таксама прызналася, што ў агенцтве здагадваліся аб выкарыстаньні пароляў да платнага доступу непадпісчыкамі. «Хадзілі такія чуткі», — сказала яна. Таксама, па словах супрацоўніцы агенцтва БелТА, былі выпадкі, калі паролі да платнага доступу выдаваліся без заключэньня дамовы.

ГЛЯДЗІЦЕ ТАКСАМА: БелТА рассылала паролі да платнага доступу факсам

«Я выдавала паролі да падпіскі БелТА і без дамовы, — паведаміла суду Кузьняцова. — на просьбу кіраўніцтва».

Допыт сьведак працягнецца пасьля перапынку, у другой палове дня.

ГЛЯДЗІЦЕ ТАКСАМА: Рэдактар «Беларусь сегодня» на судзе Золатавай расказаў, што пароль да БелТА выдаваўся адзін на ўсю рэдакцыю

Суд над Марынай Золатавай у «cправе БелТА». Што важна ведаць

Поўная заля ў судзе над галоўнай рэдактаркай Tut.by Золатавай. ФОТА

  • Крымінальны працэс супраць галоўнай рэдактаркі парталу Tut.by Марыны Золатавай пачаўся 12 лютага. Золатаву абвінавачвалі ў бязьдзеяньні службовай асобы. Крымінальны кодэкс Беларусі прадугледжвае ў гэтым артыкуле пакараньне ў выглядзе штрафу альбо пазбаўленьня волі тэрмінам да 5 гадоў.
  • Пракурор Юлія Харчэйкіна патрабавала аштрафаваць галоўную рэдактарку Tut.by на 25 500 рублёў.
  • 4 сакавіка судзьдзя Аляксандар Петраш вынес Золатавай прысуд у выглядзе штрафу ў памеры 7 650 рублёў. Таксама яна мусіць сплаціць судовыя выдаткі (на аплату адвакатаў БелТА) ў памеры 6 000 рублёў. Выракам не прадугледжана пазбаўленьне права займаць кіроўныя пасады.
  • Марына Золатава заставалася адзінай абвінавачанай у «справе БелТА».
  • «Справа БЕЛТА»: што адбылося. Раніцай 7 жніўня супрацоўнікі Сьледчага камітэту прыйшлі зь ператрусамі ў офісы інтэрнэт-парталу Tut.by і інфармацыйнага агенцтва БелаПАН, а таксама ў кватэры журналістаў гэтых кампаній. Сьледчы камітэт завёў крымінальную справу за несанкцыянаваны доступ да кампутарнай інфармацыі — платнай падпіскі БелТА (ч. 2 арт. 349 КК).
  • 7–9 жніўня затрымалі 18 журналістаў. Іх вызвалялі пасьля допыту. Пазьней сьледчы камітэт паведаміў, што ў справе 15 фігурантаў.
  • Да канца лістапада крымінальныя справы супраць 14 абвінавачаных спынілі, бо яны сплацілі шкоду і штраф. Акрамя штрафаў, журналісты былі абавязаныя кампэнсаваць прычыненую дзяржаве шкоду. Сумы, выплачаныя былымі фігурантамі «справы БелТА», вагаліся ад 3 да 17 тысяч рублёў.
  • Галоўную рэдактарку TUT.BY абвінавачваюць паводле часткі 2 артыкулу 425 Крымінальнага кодэксу Рэспублікі Беларусі («Бязьдзейнасьць службовай асобы»). Санкцыя артыкулу — ад штрафу да 5 гадоў пазбаўленьня волі.
  • Справу Золатавай вядзе судзьдзя Аляксандар Петраш, які, паводле праваабарончага цэнтру «Вясна», неаднаразова выносіў палітычна матываваныя прысуды вядомым палітыкам, грамадзкім дзеячам і актывістам.
  • Першапачаткова Марына Золатава таксама падазравалася паводле часткі 2 артыкулу 349 («Несанкцыянаваны доступ да кампутарнай інфармацыі») КК Беларусі. Менавіта па гэтым артыкуле былі абвінавачаныя астатнія фігуранты справы. Але такое абвінавачаньне з Золатавай зьнялі.
  • Сьледчы камітэт Беларусі двойчы адмовіў на хадайніцтвы Золатавай аб спыненьні крымінальнага перасьледу.