Пра гэта асуджаны добраахвотнік украінскага войска паведаміў сваёй маці Людміле Посьпіх.
Тарас Аватараў, асуджаны ў Беларусі добраахвотнік украінскага войска, ужо месяц ня можа спаць у віцебскай калёніі, дзе адбывае пакараньне за незаконнае абарачэньне і кантрабанду выбуховай прылады.
Хто такі Аватараў
Добраахвотніка ўкраінскага войска асудзілі ў верасьні 2016 году на 5 гадоў зьняволеньня ў калёніі ўзмоцненага рэжыму. Пры затрыманьні ў Аватарава міліцыянты забралі самаробную гранату, сыгнальны пісталет Макарава, бронекамізэльку, пасьведчаньне добраахвотніка «Правага сэктару» з Украіны. Аватараў на судзе казаў, што выбуховае прыстасаваньне здаў міліцыі добраахвотна, а гранату знайшоў у сваіх рэчах у аўтамабілі, якім прыехаў у Гомель з Украіны. На працэсе Тарас Аватараў неаднаразова называў сябе ваеннапалонным, а віну прызнаваў часткова — толькі за незаконныя дзеяньні з выбуховым прыстасаваньнем.
ГЛЯДЗІЦЕ ТАКСАМА: Беларуса-добраахвотніка «Правага сэктару» асудзілі на 5 гадоў узмоцненага рэжымуШто піша Тарас з турмы
Пра праблемы ў калёніі ён паведаміў сваёй маці Людміле Посьпіх. У паштоўцы, якую маці апублікавала, Тарас піша пра «бяссонны лістапад» і пагаршэньне ўмоваў у калёніі.
Свабода распытала маці Аватарава, што адбываецца з Тарасам і з чым зьвязаныя яго праблемы ў калёніі «Віцьба-3».
«Ёсьць адзіны доказ — паштоўка, дзе ён напісаў, што прайшоў лістапад бяссонных начэй і што сытуацыя ўскладняецца. 7 лістапада ён патэлефанаваў і сказаў, што ня сьпіць ужо тыдзень, што ёсьць пагрозы з боку адміністрацыі, што яго пазбавяць жыцьця ці здароўя», — кажа Людміла Посьпіх.
Маці Тараса Аватарава дакладна ня ведае, за што адміністрацыя калёніі можа цкаваць яе сына. Разам з Тарасам адбываў пакараньне арыштаваны ў Менску грамадзянін Брытаніі Алан Сьміт. Пасьля вызваленьня той выказваўся пра карупцыю ў калёніі.
«Алан Сьміт выклаў інфармацыю аб карупцыі, магчыма, гэта зьвязана. Але пакуль ён ня выйдзе, мы не даведаемся ўсяе праўды. 7 лістапада ён ужо казаў праз тэлефон, што жывым ня выйдзе з гэтай калёніі, і каб мы дапамаглі яму перавесьціся ў іншую калёнію», — кажа Людміла Посьпіх.
Алан Сьміт у фэйсбуку пісаў, што адміністрацыя калёніі, дзе ён правеў з Аватаравым 10 месяцаў, была «не абыякавая» да добраахвотніка.
«Тарас Аватараў, чалавек, які змагаўся супраць уварваньня Расеі ва Ўкраіну, цяпер адбывае 5 гадоў пазбаўленьня волі. Я правёў 10 месяцаў зь ім у калёніі. Ён добры, шчодры і інтэлектуальны хлопец. Адміністрацыя калёніі штодня яго правакавала, ён шмат разоў пабываў у ізалятары безь ніякага абгрунтаваньня», — пісаў Алан Сьміт.
Цяпер адвакат Аватарава спрабуе дамагчыся сустрэчы зь ім у калёніі. Спатканьне Тараса з маці заплянаванае на 7 студзеня.
Тры разы ў карцэры
За час зьняволеньня Тараса Аватарава некалькі разоў з розных прычын накіроўвалі ў карцэр. У штрафным ізалятары ён быў як мінімум тройчы. У тым ліку адзін раз — за спробу сарваць рамонак.
«Першы раз — за непадпарадкаваньне, другі раз — за спробу сарваць рамонак з клюмбы: у яго адкрываюцца язвавыя крывацёкі, і ён хацеў сарваць рамонак, каб заварыць сабе гарбату і неяк зьменшыць боль, а апынуўся ў ШЫЗА (турэмны карцэр). А трэці раз — адзін Бог ведае за што. І цяпер яму сказалі, што ёсьць устаноўка пасадзіць у ШЫЗА», — расказвала ў верасьні Свабодзе ягоная маці Людміла Посьпіх.
Год таму Людміла Посьпіх публічна зьвярталася да прэзыдэнта Ўкраіны Пятра Парашэнкі, каб той заступіўся за яе сына перад Лукашэнкам і дапамог яму.
ГЛЯДЗІЦЕ ТАКСАМА: Маці асуджанага беларуса-добраахвотніка просіць Парашэнку заступіцца за яе сына перад Лукашэнкам