Першыя слуханьні ў сэнацкім камітэце па замежных справах пройдуць 1 лістапада. Заканадаўцы хочуць атрымаць ад фірмаў інфармацыю пра тое, што ім вядома пра рэклямную кампанію, якая фінансавалася Масквой, падчас якой на іх сайтах і ў сацыяльных сетках ад імя амэрыканскіх карыстальнікаў зьмяшчалася рэкляма з фальшывымі зьвесткамі і мэтай якой быў раскол амэрыканскага электарату.
Асаблівая ўвага да гэтага аспэкту расейскіх прапагандысцкіх намаганьняў у ЗША была прыцягнутая пасьля публічнага прызнаньня кіраўніцтва Facebook. Яно заявіла, што ў сацыяльнай сетцы падчас амэрыканскай прэзыдэнцкай кампаніі было разьмешчана каля 3 тысяч палітычных рэклямных аб’яваў, разьлічаных на амэрыканскую аўдыторыю, карыстальнікамі з Расеі, якія хаваліся пад выдуманымі імёнамі. У Крамлі адпрэчваюць падазрэньні наконт датычнасьці Масквы да рэклямных абвестак на старонках Facebook у пэрыяд прэзыдэнцкай кампаніі ў ЗША.
У амэрыканскай прэсе таксама зьявіліся паведамленьні аб тым, што Twitter зьяўляецца інструмэнтам, з дапамогай якога Крэмль актыўна распаўсюджвае фальшывую інфармацыю ў інтэрнэт-прасторы.
Facebook супрацоўнічаў са спэцслужбамі ў Нямеччыне
27 верасьня кампанія Facebook паведаміла, што за месяц да выбараў у Бундэстаг, якія адбыліся 24 верасьня, выдаліла дзесяткі тысяч фэйкавых акаўнтаў у Нямеччыне.
Паведамляецца, што для барацьбы з распаўсюджваньнем недакладнай інфармацыі напярэдадні выбараў Facebook супрацоўнічаў з Федэральнай службай па інфармацыйнай бясьпецы Нямеччыны.