«У Беларусі адбываецца візыт экспэртаў МАГАТЭ з мэтай супольнай ацэнкі працэсу падрыхтоўкі плянаванай місіі МАГАТЭ па разглядзе праектаваньня пляцоўкі з улікам вонкавых фактараў (місія SEED), якая раней была запытаная нашай краінай. Па выніках гэтага візыту бакі ўзгодняць тэхнічнае заданьне на правядзеньне місіі SEED для Беларускай АЭС», — гаворыцца ў заяве, апублікаванай на сайце Міністэрства энэргетыкі Беларусі.
Спэцыяльныя місіі SEED ацэньваюць выбар будаўнічай пляцоўкі для ўзьвядзеньня атамных абʼектаў.
Візыт экспэртаў МАГАТЭ адбываецца на фоне рэзанансных падзей, зьвязаных з будаўніцтвам БелАЭС: 25 ліпеня ў СМІ зьявіліся паведамленьні, што падчас выпрабавальнага трэніровачнага ўсталяваньня корпусу рэактара 330-тонны агрэгат сарваўся і ўпаў з вышыні ад 2 да 4 мэтраў.
Пасьля працяглага маўчаньня Міністэрства энэргетыкі прызнала, што была няштатная сытуацыі. Між тым генэральны падрадчык будаўніцтва БелАЭС «Атамбудэкспарт» запэўнівае, што ніякага інцыдэнту не было і яны нічога ня ўтойваюць ад грамадзкасьці:
«Мы нічога не баімся. Аб выніках працы місіі МАГАТЭ мы натуральна праінфармуем СМІ, грамадзкасьць, сумежныя дзяржавы. Мы, генэральны падрадчык, на якім ляжыць адказнасьць за бясьпеку ўсіх працаў, і мы зацікаўлены больш чым хто-небудзь у адсутнасьці любых сумненьняў у надзейнасьці абсталяваньня і ўсіх працаў», — заявіла Свабодзе кіраўніца ўпраўленьня камунікацый Ніна Дземянцова.