Прэзыдэнт Лукашэнка заявіў, што ня выдасьць былога прэзыдэнта Бакіева, якога ў Кіргізстане абвінавачваюць у масавай гібелі людзей. Як вы да гэтага ставіцеся?
Спадар: "Трэба выдаць, трэба абавязкова, таму што нарабіў бяды там і ўцёк. Чаму мы павінны цяпер за яго адказваць, браць грэх на сябе?"
Спадар: "Я ня ведаю і не магу адказаць на гэта…"
Спадар: "Я лічу, што яго трэба было аддаць свайму народу і няхай ён зь ім разьбіраецца, бо што мы тут, як кажуць, за іх вырашым? Гэта Лукашэнка яго тут трымае, усяляк дапамагае. Я думаю, што разьбірацца павінны зь ім там, і без Лукашэнкі".
Спадар: "Трэба выдаць яго на расправу, бо там людзі цяжка жывуць, давёў. І ўсіх трэба так, хто зь ім разам пачынаў".
Хлопец: "Ну, а што? Прэзыдэнт наш разумны і правільна зрабіў. Я так думаю…"
Ягоны сябра: "Я ня ведаю нават, але думаю, як ён…"
Спадар: "Калі ён там натварыў спраў, то, безумоўна, трэба аддаваць яго. Але калі там проста неразьбярыха, бунт…"
Карэспандэнт: "А вось вы з таго, што бачыце ў тэлебачаньні, як лічыце — натварыў ён там нечага ці гэта папросту бунт?"
Спадар: "Цяжка вельмі зразумець, бо кожны падае сваю вэрсію. Відаць, што расейцам гэта на руку і яны падтрымліваюць тое, каб яго выдалі".
Спадар: "Трэба на месцы вырашаць, што было, а чаго не было. Калі чалавек жыў у сваёй краіне і народ патрабуе яго да адказнасьці, то ён павінен там і адказваць, прычым па заслугах".
Дзяўчына: "Паедзе ён туды, і што зь ім там зробяць? Нічога. Я думаю, што наш прэзыдэнт дастаткова адукаваны і разумны чалавек і ведае, што трэба рабіць у дадзенай сытуацыі. Калі ён яго не выдае, то няхай і жыве тут, абы было ціха і спакойна".
Ейная сяброўка: "Раз Лукашэнка яго трымае ў нас, значыцца, яму гэта выгадна, бо ня будзе ж ён яго проста так тут трымаць. І відавочна, што нешта яшчэ з Расеяй ён не падзяліў у гэтым пытаньні. Такое цалкам магчыма".
Міхал Карневіч, Горадня