Падчас праверкі на будоўлі менскага стадыёну «Дынама» Камітэт дзяржкантролю выявіў незаконнае выдаткаваньне больш як 600 тысяч рублёў зь бюджэтных сродкаў.
Пра гэта паведаміла агенцтва «Мінск-навіны» са спасылкай на КДК. Растрата такой сумы грошай стала магчымай праз памылку праектанта, якой, верагодна, скарыстаўся падрадчык. У якасьці падрадчыка выступае ААТ «Будтрэст № 1». Заказчык — КУП «УКБ Менгарвыканкаму» — замовіў і аплаціў выдаткі падрадчыка на перавозку на стадыён 39 тысяч пагонных мэтраў абсадных сталёвых трубаў.
Аднак па выніках праверкі КДК высьветлілася: трубы так і не былі дастаўленыя на будаўнічую пляцоўку «Дынама». Справа ў тым, што паводле тэхналёгіі адна і тая ж абсадная сталёвая труба ў працэсе ўсталёўваньня жалезабэтонных паляў мае выкарыстоўвацца шматразова. Пасьля бурэньня сьвідравіны, якое адбываецца ўнутры трубы, гэтую трубу ачышчаюць ад зямлі і паўторна ўключаюць у цыкль працы.
Як паведаміў галоўны спэцыяліст галоўнага ўпраўленьня кантролю па Менску КДК Рыгор Шаколін, «гэтую асаблівасьць праектанты не ўлічылі ў дакумэнтацыі, таму транспартныя выдаткі былі вызначаныя па сумарнай глыбіні мацаваньняў сьвідравін, і атрымалася 39 тысяч пагонных мэтраў».
З гэтага вынікае, што падрадчык, то бок Будтрэст № 1, скарыстаўся памылкай праектантаў і ўключыў у каштарыс выдаткі на перавозку трубаў, але насамрэч трубы ніхто на «Дынама» не прывёз. У выніку дзяржбюджэт панёс страты больш як на 300 тысяч даляраў. Афіцыйнае абвінавачаньне на момант публікацыі матэрыялу прадʼяўлена яшчэ не было, крымінальнай справы не распачыналі.
Свабода паспрабавала зьвязацца з кіраўніцтвам Будтрэсту № 1, каб запытаць, ці прызнаюць там факт незаконнага выдаткаваньня фінансаў.
У паведамленьні КДК не гаворыцца, якое канкрэтна ўпраўленьне Будтрэсту № 1 вінаватае ў растраце. Але Свабодзе стала вядома, што за тэрыторыю, дзе будуюць стадыён, адказвае ўпраўленьне № 16. Намесьнік кіраўніка ўпраўленьня Аляксей Локцеў сказаў, што ня мае ўяўленьня, пра што ідзе гаворка ў паведамленьні КДК, адмовіўся нешта тлумачыць і сказаў, што яго за гэта не пакаралі:
«Ну, калі я з вамі гавару — значыць, я не арыштаваны».
Тым часам у галоўным упраўленьні Будтрэсту № 1 Свабодзе паведамілі: генэральны дырэктар цяпер знаходзіцца на стадыёне «Дынама», дзе прабудзе да вечара.
Агульны кошт рэканструкцыі стадыёну «Дынама» ў Менску ацэньваецца ў 200 мільёнаў даляраў.
