Паліцыя Вялікай Брытаніі пачала зьвязвацца з расейскімі мігрантамі ў краіне, каб абмеркаваць іхную бясьпеку, піша BBC. Паліцыянты ўжо ня лічаць, што ўзровень пагрозаў для расейцаў у Брытаніі «нізкі».
Якія меры будуць прымацца ў сувязі з ростам рызыкаў для расейскіх мігрантаў, не ўдакладняецца.
Рызыкі зьвязаныя з расьсьледаваньнем нядаўняга забойства расейскага бізнэсоўца Юрыя Глушкова, знойдзенага павешаным у сябе дома 13 сакавіка.
Паліцыя пакуль ня зьвязвае забойства з атручваньнем 4 сакавіка былога расейскага выведніка Сяргея Скрыпаля і ягонай дачкі. Глушкоў быў блізкім бізнэс-партнэрам расейскага алігарха Барыса Беразоўскага, які, паводле афіцыйнай вэрсіі, учыніў самагубства ў 2013 годзе.
Тым часам Buzzfeed сьцьвярджае, што мае зьвесткі аб тым, што 14 сьмерцяў (у тым ліку сьмерць Беразоўскага) у Вялікай Брытаніі былі насамрэч забойствамі з удзелам расейскіх спэцслужбаў ці мафіі. Паліцыя ня выявіла расейскага сьледу ў тых сьмерцях.
Расейскія сьледчыя пачалі справу аб забойстве Глушкова і замаху на забойства Скрыпаля. Але брытанскія праваахоўнікі і дыпляматы шэрагу заходніх краінаў мяркуюць, што замах на Скрыпаля быў учынены расейцамі – магчыма нават, з асабістага загаду Ўладзіміра Пуціна. Вялікая Брытанія вырашыла выслаць расейскіх дыпляматаў з краіны і замарозіць актывы расейскіх алігархаў, Крэмль у адказ паабяцаў выслаць брытанскіх дыпляматаў з Расеі.
