Афіцыйна зарэгістраванае беспрацоўе ў Беларусі зьнізілася ўдвая за апошні год, паведамляе Міністэрства працы: цяпер узровень яго — толькі 0,5% эканамічна актыўнага насельніцтва, або 22,9 тысячы чалавек.
Савет Міністраў Беларусі, калі вызначыў прагнозныя паказьнікі ў галіне «судзеяньня занятасьці» насельніцтва на 2018 год, пастанавіў, што зарэгістраванае беспрацоўе не павінна быць большым за 1%.
Аднак гэтыя лічбы не адлюстроўваюць рэальны ўзровень беспрацоўя. Статыстыку фактычнага беспрацоўя ўлады публікавалі толькі чатыры разы за гісторыю незалежнай Беларусі, апошні раз — больш як год таму, у лютым 2017-га. Тады фактычны ўзровень беспрацоўя зафіксавалі роўным 5,8%. Гэта было ў сем разоў больш за «афіцыйнае».
Пры тым, што фактычна беспрацоўных беларусаў было каля 260 тысяч, у краіне ў той жа год налічылі 470 тысяч «дармаедаў».
Тым часам у Беларусі працяглы час зьмяншалася колькасьць працоўных месцаў: больш людзей звальнялі, чым прымалі на працу. За 5 гадоў Беларусь страціла 300 тысяч працоўных. У студзені 2018 году звольнілі на 2099 чалавек больш, чым прынялі на працу, але ў лютым ужо прынялі на працу на 1221 чалавека больш, чым звольнілі.
