Гістарычна зварот „Добрай раніцы!” у нас ня мае грунту. Гэта калька зь іншых моваў (хутчэй за ўсё з расейскай літаратурнай). Традыцыйным культурам менавіта ранішні зварот не ўласцівы: раніца як асобная пара не вылучаецца, адразу пачынаецца працоўны дзень, дабра на які і зычаць.

Змагацца з „Добрай раніцы!” непатрэбна. Але тым, хто хоча гаварыць па-беларуску дасканала, варта ведаць, што формула новая і штучная.

Хаця ёсьць яшчэ штучнейшыя. „Дабранак“, напрыклад. Або „прывіт“. Па-першае, ёсьць украінскі “привіт” адпаведна законам украінскай фанэтыкі. Па-другое, словам „прывітаньне” не зусім дарэчна вітацца. Гэта назва ўсёй групы словаў этыкету накшталт вітаю, здароў, добры дзень, як маецеся і г.д.