На 15-ы дзень галадоўкі Мікола Аксаміт быў шпіталізаваны і спыняе галадоўку, але іншыя галадаюць далей

У сераду Мікола Аксаміт, які галадаваў два тыдні, з прычыны праблемаў зь ціскам і сэрцам выклікаў хуткую дапамогу. Яго шпіталізавалі, увялі глюкозу і параілі спыніць галадоўку, бо яе працяг быў бы небясьпечны для жыцьця. Спадар Аксаміт сёньня пачаў выхад з галадоўкі. Ён лічыць сваю акцыю патрэбнай. Іншай магчымасьці для выказваньня пратэсту няма, кажа спадар Аксаміт.

(Аксаміт: ) “Дзякуючы гэтай галадоўцы пра ўсе гэтыя парушэньні, а парушэньні — гэта так мякка сказана, я лічу, што гэта злачынства, цяпер гэта ведае ўвесь горад, і ўвесь горад гэтым абураецца. Так што хоць гэтая мэта дасягнутая. Я ня меў ніякіх ілюзіяў, ідучы на галадоўку, што ўлады прыцягнуць да крымінальнай адказнасьці тых людзей, якія гэта рабілі. Самі ж сябе яны судзіць ня будуць”.

Мікола Аксаміт адмовіўся ад шпіталізацыі. Тым часам да галадоўкі ў Ваўкавыску далучылася Сьвятлана Хасанава, якая працуе дыспэчарам у прыватнай службе таксі Мікалая Аўтуховіча. Падставай для яе галадоўкі стала абурэньне рэпартажамі Беларускага тэлебачаньня, у якіх дыскрэдытавалася фірма Мікалая Аўтуховіча.

Сам Мікалай Аўтуховіч кажа, што жанчына прыняла гэтае рашэньне, не параіўшыся зь ім. Ён зьбіраецца дабівацца справядлівасьці іншымі мэтадамі, але не выключае, што і сам пачне галадоўку.