Раней кіраўнік Народнага антыкрызіснага ўпраўленьня Павал Латушка паведаміў BBC, што Анжаліка Мельнікава з Польшчы выехала ў Вялікую Брытанію, пра што сама яму паведаміла.
29 сакавіка ў польскай паліцыі паведамілі, што Мельнікава ўжо некалькі тыдняў па-за межамі краіны.
Паведамлялася таксама, што разам зь ёю зьніклі дзьве непаўналетнія дачкі, аднак пазьней выданьню «Люстэрка» ўдалося зьвязацца з былым мужам актывісткі Андрэем Мельнікавым, які пацьвердзіў, што дзеці знаходзяцца зь ім у Беларусі. Сам ён заявіў, што ня ведае, дзе ягоная былая жонка.
Анжаліка Мельнікава — сьпікерка Каардынацыйнай рады (КР) беларускіх дэмакратычных сілаў, а раней каардынатарка праектаў Народнага антыкрызіснага ўпраўленьня (НАУ) на чале з Паўлам Латушкам.
Пасьля пратэстаў 2020 году Мельнікава зь сям’ёй пакінула Беларусь і выехала спачатку ва Ўкраіну, а пасьля ў Польшчу. Там яна заснавала фонд Białoruś Liberty, празь які праходзіла фінансаваньне для Каардынацыйнай рады і ананімнай хакерскай групы «Кібэрпартызаны».
Зьнікненьне Мельнікавай
З 24 сакавіка ў сяброў НАУ зьявіліся падазрэньні наконт таго, што адбываецца з Анжалікай Мельнікавай. З словаў Паўла Латушкі, апошняя камунікацыя зь ёй адбылася 25 сакавіка раніцай. Візуальна падчас сазвону ў зуме яе бачылі 21 сакавіка — пры гэтым невядома, адкуль яна ўключалася.
27 сакавіка Павал Латушка падаў афіцыйны зварот у камэндатуру паліцыі Варшавы ў сувязі са зьнікненьнем Анжалікі і яе дачок. Ён адзначаў, што нефармальным чынам інфармаваў паліцыю за «дзень-два» да 27 сакавіка. Асабіста ён бачыў Анжаліку ў канцы лютага ў офісе.
Паводле польскай паліцыі, Мельнікава ў канцы лютага вылецела за межы Эўразьвязу — у Лёндан — зь дзьвюма дочкамі. Былы муж Анжалікі выехаў з Польшчы ў Беларусь аўтобусам 23 сакавіка.
НАУ самастойна вызначыў, што мабільная прылада Мельнікавай была лякалізаваная на тэрыторыі Беларусі 19 і 25 сакавіка. Пры гэтым адзін зь яе гаджэтаў яшчэ 18 сакавіка знаходзіўся ў Варшаве.
Журналістам «Люстэрка» 7 красавіка ўдалося датэлефанавацца да былога мужа Мельнікавай, які пацьвердзіў, што ён разам зь іхнымі дзецьмі знаходзіцца ў Беларусі. Дзе Анжаліка — ён ня ведае.
Форум