Дата дня
25 сакавіка 1918 году Рада Беларускай Народнай Рэспублікі (БНР) прыняла Трэцюю Ўстаўную грамату, у якой абвясьціла незалежнасьць БНР і аддзяленьне Беларусі ад Расеі.
Ад 1989 году ў Менску і іншых гарадах Беларусі ладзіліся сьвяточныя ўрачыстасьці, палітычныя акцыі, мітынгі, шэсьці, пэрформансы, прысьвечаныя ўгодкам абвяшчэньня незалежнасьці Беларускай Народнай Рэспублікі. Падчас кіраваньня Аляксандра Лукашэнкі ўлады ставіліся да гэтай даты ў розны час з рознай ступеньню варожасьці. Гэтая варожасьць асабліва ўзмацнілася ў апошнія гады, пасьля масавых пратэстаў 2020 году.
Таксама ў гэты дзень
1820 — расейскі цар Аляксандар І падпісаў указ пра забарону дзейнасьці езуітаў у Расейскай імпэрыі. Для Беларусі гэта быў удар па ўсёй сыстэме асьветы, бо менавіта сябры «Таварыства Ісуса» засяродзілі ў сваіх руках усю сярэднюю і вышэйшую адукацыю на тэрыторыі краіны. Езуіцкія акадэміі і калегіюмы дзейнічалі ў нас больш за 200 гадоў, давалі якасную эўрапейскую адукацыю і выпусьцілі мноства вучоных, грамадзкіх дзеячоў і пісьменьнікаў.
1917 — на канфэрэнцыі Беларускай сацыялістычнай грамады ў Менску ўтвораны Беларускі нацыянальны камітэт.
1946 — навучэнцы Глыбоцкай пэдагагічнай вучэльні Антось Фурс, Васіль Мядзелец і Алесь Юршэвіч стварылі Саюз беларускіх патрыётаў і прынялі ўрачыстую прысягу.
1949 — некалькі тысяч жыхароў Літвы дэпартавалі ў Сібір.
1952 — выходзіць у этэр першая беларуская перадача Гішпанскага радыё. Вядоўцы — Янка і Івонка Сурвілы.
1968 — заснаваны Менскі камэрны аркестар.
1969 — створаны вакальна-інструмэнтальны ансамбль «Лявоны» пад кіраўніцтвам Уладзімера Мулявіна.
1990 — пад назвай «Дзень Волі» выйшаў нулявы нумар газэты «Свабода».
1992 — Беларусь усталявала дыпляматычныя адносіны з Турэччынай.
1995 — Беларусь і Польшча падпісалі пагадненьне аб супрацоўніцтве ў галіне аховы гісторыка-культурнай спадчыны.
2006 — «Паход Казуліна на Акрэсьціна»: пасьля мітынгу да Дня Волі ў Купалаўскім сквэры былы кандыдат на прэзыдэнта Аляксандар Казулін заклікаў прысутных пайсьці да турмы на Акрэсьціна, дзе адбывалі пакараньне дзясяткі палітвязьняў, затрыманых пасьля выбараў і разгону намётавага мястэчка. Калёну зь некалькіх тысяч чалавек на праспэкце Дзяржынскага сустрэлі спэцаддзелы міліцыі, жорстка пабілі і разагналі. Казуліна затрымалі і асудзілі на пяць з паловай гадоў за «злоснае хуліганства і масавыя беспарадкі».
2017 — брутальны разгон маршу на Дзень Волі ў Менску. Каля тысячы чалавек затрыманыя.
2018 — у Беларусі і за яе межамі адзначалася 100-годзьдзе БНР.
2021 — арыштаваныя журналіст Анджэй Пачобут і іншыя актывісты польскай супольнасьці ў Беларусі. Пачобуту прысудзяць 8 гадоў калёніі ўзмоцненага рэжыму.
У гэты дзень нарадзіліся
1347 — Кацярына Сіенская, каталіцкая сьвятая, італьянская рэлігійная дзяячка і пісьменьніца позьняга Сярэднявечча, якая пакінула мноства лістоў і містычны твор «Дыялёгі аб Провідзе Божым».
1905 — Аляксандар Вечар, вучоны-біяхімік, акадэмік, паэт.
1905 — Браніслаў Ржэўскі, літаратуразнаўца, пэдагог, удзельнік антысавецкіх пратэстаў 1950-х, палітычны вязень.
1935 — Уладзімер Папковіч, беларускі пісьменьнік і перакладчык.
1954 — Уладзiмер Кур'ян, кампазытар, загадчык музычнае часткі Купалаўскага тэатру.
У памяці
1918 — Клёд Дэбюсі, францускі кампазытар.
1937 — Зыгмунт Нагродзкі, паэт і культурніцкі дзяяч, мэцэнат.
1999 — Вячаслаў Чарнавол, украінскі палітык, грамадзкі дзеяч, праваабаронца, дысыдэнт савецкіх часоў.
2004 — Валянтына Пашкевіч, мовазнаўца, аўтарка Ангельска-беларускага слоўніка.
2019 — Яўгенія Чаплінская (ад нараджэньня Белановіч), пэдагог, культурная дзяячка.
