Сярод загінулых бацька і яго маленькая дачка. Самаму малодшаму пацярпеламу — 11 месяцаў. Паветраная трывога працягвалася больш за пяць гадзінаў.
Як паведамляе Нацыянальная паліцыя Ўкраіны, абломкі бесьпілётнікаў упалі ў некалькіх раёнах Кіева: у Падольскім раёне пашкоджаны шматпавярховік, у Дняпроўскай раёне абломкі патрапілі ў дом і ўпалі на нежылое памяшканьне, у Шаўчэнкаўскім раёне пашкоджаныя аўтамабілі, у Галасееўскім раёне абломкі ўпалі на тэрыторыі прамзоны.
У начной справаздачы Службы па надзвычайных сытуацыях Украіны гаварылася аб пажарах, распачатых у выніку нападу. У Дняпроўскім раёне пажар успыхнуў на верхніх паверхах дзевяціпавярховіка, загарэўся дах, загінула жанчына; эвакуявалі 27 чалавек. У Падольскім раёне ўзгараньне таксама адбылося ў жылым доме — на 20 паверсе 25-павярховага будынку.
Уначы расейскае войска атакавала таксама Кіеўскую вобласьць: у некалькіх раёнах пашкоджаны дамы і аўтамабіль, вядома аб двух пацярпелых.
Мінабароны Расеі, у сваю чаргу, заявіла, што ў ноч на нядзелю было зьнішчана 59 украінскіх бесьпілётнікаў над шасьцю расейскімі рэгіёнамі, а таксама над анэксаваным Крымам. Большая частка была зьбіта над Растоўскай вобласьцю.
Там за ноч было зьнішчана і перахоплена 29 дронов, 20 бесьпілётнікаў нэўтралізавалі ў Астраханскай вобласьці. Таксама ведамства паведаміла аб зьнішчэньні дронаў над Валгаградзкай, Варонескай, Курскай, Саратаўскай абласьцямі і анэксаваным Крымам.
Паводле інфармацыі часовага выканаўцы абавязкаў губэрнатара Растоўскай вобласьці Юрыя Слюсара, на трасе Марозаўск-Цымлянск з прычыны атакі бесьпілётніка загарэўся аўтамабіль, загінуў адзін чалавек.
Губэрнатар Астраханскай вобласьці Ігар Бабушкін паведаміў, што пры падзеньні абломкаў бесьпілётнікаў пашкоджаны жылы будынак і аўтамабіль. Атакавалі, паводле яго слоў, паўночную частку рэгіёну. Аб зьнішчэньні дронаў сродкамі СПА ў тэлеграм-канале паведамляла адміністрацыя Ахтубінскага раёна.
Расавіяцыя аб’яўляла аб прыпыненьні на некаторы час прыёму і адпраўкі рэйсаў у аэрапортах Валгаграда і Саратава.
Форум